Enge kan sawi tak ang le, khawngaihna chu alo pun leh zual theih nan tih ziak ang khan Zohnahthlakte hi i inkhawngaih ila i in hmangaih ang u. Engtinnge Zohnahthlakte hi kan induhsak a, kan in khawngaih theih ang le?
Entir nan :
(1) Inluah chungchangah : Engvangin nge khung Delhi-ah te, Bombay-ah te leh etc.. ah hian Mizoram anga hnamdang an tam tlur loh le. A chhan ni a ka hmuh ve dan chu In luah tur awmloh vang a nih ka ring, in luah tur hrim hrim chu Mizoramah aiin In luah tur chu a tam ngei mai. Mahse, anni chuan a chipui bak chu In luah a tan an ti vak lo niin a lang. Kan ram zimte Sq Km 21.087 leka zimah hian hnamdang Zohnahthlak ni hran lo 348494 kan khawi dur durna chhan chu kan In neitu ten kan In luah atan hnamdang kan luah tir thin vang niin a lang. Heng kan ziah Zohnahthlak ni lote hi In luah tur hmu lo ta se, heng zat zat hi kan khawi dur dur lo ang maw le. Heng 100/10 bak hi chu Zoramah hian hnathawk leh thil dangah kan mamawh in ka hre lo, a Zohnahthlakte hi In luah tur chungchangah hian kan Unau Zohnahthlakte hi induhsak ang u.
(2) Heng kan ziah mek lessonah hian thil dang inthup inhai lang leh lawk teh ang. Kan ram dep entirnan: Burma, Manipur leh etc.. atanga Mizoram lo chuang chhuakte hian zir ve tur kan nei ve tlat mai le. Kan awmna NGO leh YMA Section angahte hian theih tawp a kan inhman ve deuh chu a ngai. Chhiatniahte hian inti mikhual lova chet ve bawrh bawrh pawh a ngai khawp mai, inti mikhual lo va awm a ngai, thenkhat chu an fel em em laiin mahni ina awm chut thenawmte chhiatni thatniah pawh lang lek lo pawh kan la awm hi chu a zia lo khawp mai, Zohnahthlak te i inngaihtuah chiang teh ang u.
(3) Kan ram neih chhun khawpui berah invei lawk teh ang. Kan ram khawpui ber Aizawl, chuta chhapah veng lar tak, kan ram khawpui darthlalang chu zing dar 6 atanga 8 inkarah i kal chuan i hmuh tam ber chu hnamdang anni ngei ti ila kan sawi sual lo ang. Zawlnei nih kher a ngai hran lo, heta tang hian Zoram chu a him tawh lo hle mai.
(4) Heng kan ram kan khawpuiahte hian hnam dang thilti thei tak takte neiin private company ang chiahte leh etc.. kan Mizo Zohnahthlakte chhawr kualin hlawh lah chu tam lem lo. Thlakhatah 3000 bawrin min chhawr kual mek a. In leh Lo luah chawp a khawsate tan chuan kan hlawh kham chu thil harsa tak a lo ni a, kan Pathian pawh hian sum chu indaih turin a siam lem lo nge ni sum ngainat chu sual tinreng bul a ni a ti hial a. Mahse khawvela cheng indaih lo hrim hrim kan ni na chungin kan hlawh ringawt chuan intunnun ngaihna a awm lo tih chu a hretu kan ni vek a. Kan hlawhte a tam loh avangin kan zahawmnate kan hralh hial a lo ngai ta hialin alang, kan nula tleirawl ten tunlai mobile phone changkang takte an lo duh zel bawk nen top up manah hnam dang lakahte an inhralh ve mek zel zawng ni ta berin a lang. Hengte hi ngun tak a kan ngaihtuah chuan kan In leh lote hnamdang miin an luah nasat luat vangte a ni thei hialin alang. Zohnahthlakte chu kan induhsak in kan inhmangaih tur a ni bik.
Chanmari West-ah hian chhiatni thatni kan nei ve reng thin a, a bikin CHHIATNIah hian chhiat tawk ten an mamawh abikin tui lam hi a theih china kan veng thu neitute hian chiat tawk chhungte tan tui hi office emaw thiltih theihna kawngah hmalak sak thin nise a duh awm hle ang. Chhiat tawkte, mi Inhnuai luah ve mai mai nih theih a ni a, In neitute tui awm sa hman zawh sak vekte phei hi chuan a inthlahrunawm duh hlein ka hria a. Heng kawngah hian kan veng thuneitu ten Zohnahthlakte induhsak a inhmangaih tur a nihna a lo lang dawn nia.
Kan veng, kan neih chhun hi a chhunga cheng ten kan inlungrual a, kan inhmangaih tlan hian a nuam a ni mai, hei lo hi kan veng Chanmari West dang a awm chuang lo, kan lei Jerusalem neih chhun a ni.
Hmangihna hrui vuanin, thinlung hmun khat puin tih hla phuahtuin a phuah kha i vawng reng ang u tiin ka sawm e.