Kan veng hmel lanna pakhat YMA PARK chu ruihhlo ti \hin ten ruihhlo tih nan hmun tha leh remchang, sual rawngbawlna hmun atan an chang ta. Vengchhung Nu leh pa ten kan fa tleirawl/rawlthar te leh naupang zawkte hnena kan sawi nawn fo YMA PARK-AH KAL SUH U AW tih a lo ni ta maw! Chanmari West YMA PARK chu HMUN TIHBAWIAWM leh BAWLHHLAWH, RUIHHLO HMUNAH a chang a ni ta ber mai. Nu leh Pa, chhungtinin kan fate he hmunah hian ruihhlo ti lo tur leh sual rawng bawl zir lo tur leh ti lo turin kan duh a, mahse a zual tulh tulh niin a lang. Mithiam zawk leh kalhmang hre zawk te cho chhuaktu a nih beiseiin heti hian duhthusam rawtna kan siam ve ngawt teh ang.
Park Committee din nise : YMA, Local Council leh NGO dangte Joint meeting neiin Park Committee din nise. Park Committee chuan a venhim leh cheibawlna senso turin chhungtin hnenah Rs. 20 \heuhin Park Fund thla tin a khawn ang a. Heng bakah hian vengchhung nu leh pa, veng hmasawn nan leh sual do nana mi inphal tak tak Rs. 20 aia tam pe duh pawh an awm \euhin a rinawm. Park Fund hmang hian tun aia nuam leh mawi zawk, changtlung zawk a nih theih nan leh ruihhlo tihna hmuna a chan zel loh nan hetiang hian hma lak ni ta se.
Chhun zan zawma vengtu/enkawltu tur rawih:
Park Committee-in Chhun Dar 10 atanga Zan dar 10 chhung a inchhawk a veng tur leh enkawl tur mi pahnih emaw atul angin aia tam pawh Duty tur a ruai ang a. Duty te chuan ruihhlo tih leh sual rawngbawl tum te an awm loh nan am veng tlat ang a. Thuawih lo leh huai kawm bawl lui an awm chuan Park Committee hnenah thlenin, Park Committee-in a hnuai ami ang hian action a la ang.
Hremna 1-na:
Ruihhlo ti \hinte leh sual rawngbawl nan hmang \hin, Duty-te thu awih lova Park Committee hnena report-te chu man an ni ang a, Police kutah hlan zel a ni ang.
Hremna 2-na:
A chunga hremna 1-na an chunga lek pawha la sim lo fo an awm a, veng chhung mi a nih chuan YMA Member a nihna hlihsak a ni ang a, veng pawn lam mi a nih chuan a Nu leh Pa hnenah leh an veng YMA/LC hnenah hriattirin YMA Park-ah ruihhlo/sual rawng bawl tawh lo tur leh thu a awih loh chhunzawm zel chuan a chungah engpawh thleng se lo hrethiam tura ngen an ni ang a, Park Committee-in na zawka hrem dan tur a chungthu a rel ang.
Cheibawl:
Park Fund a\angin tun aia nuam leh tha, changtlung zawk, veng dang pawhin an entawn a nih theih nan \hut chawlhna leh naupang infiamna hmun tur te changtlung zawkin a siam theih bawk ang a. Chutianga kan thawhkhawm a\anga enkawl a nih chuan veng mipui ten tun ai hian kan ta neih lehzual bawk ang a, a chhiat a \hat thuah pawh kan \hahnem ngaihna a nasa lehzual ngeiin a rinawm.
A bul \an nan chuan YMA/LC-in veng chhung nu leh pa zawng zawng ko khawmin meeting neih nise. Kan fate chungah heng hremna te hi a lo tla palh a nih pawha hrethiam turin kan intiam theuh ang a. Chutianga kan ngaihdan leh rawtnate sawiho na hun Joint Meeting kan neih chuan hmalak dan tur \ha zawk pawh kan sawi chhuah theih ngei a rinawm tlat a ni. Chutiang taka ven leh enkawl a nih chuan kan hman dan leh a hmel pawh a danglam sawt sawtin a rinawm.
Kan Pathian thu pawhin ‘Sual dovin thisen chhuak khawpin in la \ang lova’ a ti si a.