YMA Conference vawi 66-na Kolasib a neih chuan, a vawi 7 na atan Kum 2012 YMA Kumpuan atan “Ram leh Hnam Humhalh” chu a puang leh ta a. YMA Conference dawn khan kan Branch Executive Committee pawhin he kumpuan rawtna hi lungrual takin Central YMA ah a thlen a. Kan duh ang ngeiin kumpuan atan thlan a ni ta. Chuvangin he kumpuan hi a rawttu zinga kan tel ve avangin tha taka bawhzui hi kan ba leh zual a ni. Kan ngaih pawimawh a, a hlawhtlin nana tan kan lak nasat pawh a tul hle mai. “Chanmari West Branch YMA Kumpuan” pawh ti ila a sual tam awm love.
Mizoram khawpui ber Aizawl a veng pakhat Chanmari West-ah kan cheng a. He kan chenna veng hi veng nuam tak leh muanawm, inlungrual leh hlim tlang taka kan khawsak ho theih nana kan thawk thin hi a thain a ropui khawp mai. Kan tihtur dik tak pawh a ni. Amaherawhchu kan khawtlang nawm sakna leh thatna chauh thlira ngaihtuahna hmang a, kan Ram leh Hnam tan a, Chanmari West ramri pela ngaihtuahna kan sen loh chuan eng ang pawhin thawkrim mah ila kan veng, kan khawtlang nun leh kan chhungkaw nun hi a nuam tak tak ngai lovang. Chuvangin keini YMA te, Zoram hmasawnna ngaihtuah tura member rinawm ni tura in pe te hian, Ram leh Hnam chu engtin nge kan humhalh ang tih hi heti zawng hian i ngaihtuah teh ang u.
KAN RAMIN CHHANTU A MAMAWH :
Kan pi leh pu te hun lai atang tawh khan kan ram hian chhan angai a. Ram hmangaihtu kan Lal te leh kan pasaltha te khan kan ram leh hnam, kan zalenna humhim nan nasa takin tan an lo khawh thin. An nunna ngei pawh ram tan an lo seng tawh thin a. Kan ram hian tun thlengin, kawng hrang hrangin chhung lam leh pawn lam atanga min runtu leh min tihchhiat tumtu leh min chimral theitu englai pawhin a nei reng a, heng do let tur hian hmalakna tur pawimawh zual tlem tarlang ila .
1. RAMDANG MI LEH HNAMDANG MITE : Pu Rokunga (RIP) chuan ‘Hnamdang hmusit mai lovin thiana’n i sawm ang u’ a ti a. Ni e, kan hmusit tur a ni lova, kan tina ngawt tur pawh a ni lo. Dan ang taka kan ram a lo lutte chu kan biak that a, mamawh kan in thleng tawn pawh a tha e. Hetih lai hian dan lova lo lut te, mahni hmasial taka kan thau sawh tum a, thil tha lo tinreng rawn pu lut hreh miah lo vai leh Foreigner te erawh hi chu, thiana siam kan ba lova, an thianah min siam bawk lo sela, an lakah hian kan ram hian ‘Min humhalh lul rawh’ tiin min au a ni. Kan chhehvel State thenkhat te anga kan tlai lutuk hma hian tan kan lak a, kan inthlahdah loh a va ngai em !! Electoral roll chungchangah te, Village Census Record leh Ration Card, Gas Card siam chungchangah te, dan lova sumdawng dap chhuah chung-changte pawh kan ngaih pawimawh a tul khawp mai.
2. INTODELH A TUL :
Kan Ram leh Hnam humhalhna tha ber pakhat leh chu kan intodelh hi a ni. Retheih lutuk leh intodelh loh reng mai chuan rilru tha a neih theih loh avangin thil tha lo tih hreh lohna neih a awl thin. Mahni inhralh duh mai na te, dik lo taka sum hmuh pawisak lohna te, rinawm tlakchhamna te a keng tel vek a. Hnam inlungrualna tak tak a awm thei lo. Chuvangin Ram leh Hnam Humhalh duh tak tak chu a thatchhe thiang lova, hnathawh hreh a nei tur a ni lova, a rinawmin a rintlak bawk tur a ni. Engtinnge ka dinchhuah ve ang ? tih hi YMA member rilru put hmang tur chu a ni dawn lawm ni ?
3. HNAM ZIA (CULTURE) HUMHALH :
Kan pi leh pu te kha an thatchhe ngai lova, an intodelh a, mahni hma an sial ngai lo. Kan hnam ze tha chhawm nung turin an tang mar reng thin. An hawihhawm em em a, tlawmngaihna an vawng nung a, rinawmna, chhelna, huaisenna an in zirtir reng thin. Hengte hi kan chhawm nun zel a tul. Aia upa zahna te hi chhawm nung reng turin YMA Member te hian mawh kan phur a ni. Kan veng tlangval te hi fakawm tak tak ka hmu fo thin, thlanlaihna ah leh chhiattawhna hmundangah leh hnatlanna hmunah te aia upa leh hruaitute mitmei veng thiam tam tak kan la nei a, a lawmawm ka ti thin khawp mai.
4. HNAM INPUMKHATNA :
Tunah hian Mizoramah mihring nuai sawm leh singkua vel chauh kan la awm a ni a. India ram puma vai kan tih te nen in hel nuai dawn ila Mizo pakhatin vai sangkhat vel zel kan hmachhawn a ngai dawn a ni. Heti zat lek kan la ni chung hian a inla hrang zawng leh inthendarh zawngin kan la khawsa chho reng bawk. In pumkhat lo leh chibing anga inla hrang tham kan awm lo. Hetiang tireh a inpumkhatna tana hma lak hi kan tihtur pawimawh tak a ni.
5. ZIRNA UAR LEH NGAIH HLUT :
Thalai, rual el, thiamna leh finna kawnga intlansiak a tul zia hria a bei mek tam tak an awm laiin, nu leh pa thawh chhuah ring a chawmhlawm hawi pir ve ringawt, thalai hmathlir nei miah lo, mi duh ang engkim duh ve tho si kan thalai te zingah kan pung chak hle mai. Heng mite hian Ram leh Hnam Humhalh tura ke pen turin chakna thahrui an nei thei ngai lovang. Thalai lehkha thiam leh hawi zau kan ramin a mamawh tam deuh deuh dawn. Chutilochuan hnam dangin kan Sorkar hna lian an chang zo ang a, nakinah Industry lian pui pui kan la neih turah te hmun an luah zo mai ang tih a hlauhawm khawp mai. Tan lak ava ngai tehlulem!.
6. ZU LEH RUIHHLO :
Zu leh ruihhlo hi kan khawtlang nun ti khaw lo tu, chhungkaw chawk buai tu leh ti tlaran tu, min ti ralti tu leh thihna tam ber thlen tu a nih avangin kan do lo thei lo. Chuvangin a zuartu te hi kan ram hmelma anni a. A tih chingte leh ruih avanga mi pawi sawi leh buaina siam chingte chu Ram leh Hnam Humhalh nan chuan kan zilh ngam tur a ni. Hetiang tih ching ten puipunnaah hmun tha leh langsar lai an chan pawh kan phal loh ngam a tha ang.
Awle, heng kan sawi tak te hi a hlawhtlinna tak tak chu tun maiah kan hmu nghal mai lo a nih pawhin, kan kumpuan ang hian thahnemngai taka kan thawh chuan, engtik hunah emaw chuan Mizote hi Zoram nuam, khawtlang tha tak leh chhungkaw hlim tlang leh lungrual min neih tir ang tih beisei ila, chutiang dinhmun a kan la din theih nan he “Ram leh Hnam Humhalh” kumpuan hi hmang tangkai ang u.