Kum 77 val a lo ni ta a, mihring danah chuan a uaithla lam ni ve tawh awm tak a ni. Mahse, chutiang a ni ngawt hran lo, a neitu leh enkawltu mizo thalaite an nih tlat avangin hniam lam pan a hnekin arh lam a pan zel zawk a ni. Kan hnam hi YMA in a chawm leh chen chilh tlat a nih avangin hma pawh a sawn zel ang a, sakhua ang a la tlat maite avang pawh hian a la lian tual tual ang tih a beiseiawm. YMA thlarauvin a chen chilh vek vek tawh te hi chu an tlawmngai rum rut a, an neih, an tha leh an nun thleng hian mi dangte tan hian an pe phal reng a ni. Tlawmngai hmingthang Taitesena pawh khan he YMA thlarau hi a lo chang lawk a ni hial a ni ta ve ang! He kum reilote chhunga thu mawi tak lo chhuak chu “YMA takin aw” tih a ni. He thu tawite hian YMA chu a tlawmngai a, mi dang tan a inpe a, nun mawi taka a nung thin tur a ni tihna a ni.
Hetiang taka pawl pawimawh leh a thlarauin a chen chilh tlat a nih avang hian he pawl ropui tak hi awm ta lo se, buai fe fe chu kan tam khawp ang. HPC(D) te hian he pawl hi Aizawlah hian rawn thiat ve ta ang se, sakhaw pakhat ang a lo hmang Pu Ngurkhuma te, Pu R. Lalhmachhuana te hi chu an buaiin awmdan pawh an thiam lo ngawt ang. Holiday chu YMA hnatlan nana hman tum tlat mai Pu C. Lalmuankimate hian holiday a lo thlen leh hun chuan a buai ru khawp ang. Kan YMA ruhkawl dangte pawh hian an nunphung an hloh vek ang a, a thlakna tur mizo thalai pawl dang din tho kan ngai hial awm e a.
Kan YMA in a ken tel tlat chu YMA AW hi a ni, YMA a awm loh chuan a ding ngawt thei bik dawn si lova, Pathara Sailo chuan hnapui bera a lo neih thin a nih avangin a ui ngawih ngawih a nga, chu aia pawiti leh buai, awmdan pawh hloh phah vek thei tur chu Big Boss Masangtea hi a ni. Boss hian zirtawp zing dar 5 velah YMA AW editorial board leh section secretary-te YMA AW chhut zan a nih thu a hriattirna SMS a thawn thin pawh a ngai tawh dawn lova, news khawn kuala kal kual ruk ruk a ngai tawh dawn si lo va, a khawhar ve khawp ang le.
Literature committee thu-khawm Pu Lianzuala’n a hruai tawh chuan uluk taka ngaithlak ngai thin te, Pu Chhuanawma (hmanlai YMA AW-ah chuan ‘nawhreh dah tel’ tih alang thin) thusawi dik hmel bik riaute, Pu Chawia hovin radio-ah hun an hmang ang a, Pu Zorampelate doordarshan-ah hun hmang tura ruat bik tlat te (an hmel vang a nih hmel), thu tak pawh ni hlek lo va Pu Hruaia VL (YMA AW-ah chuan ‘VL’ tih hi ho tihna a ni kher lo tih a chuang thin) in a sir atanga a lo khai khawm ve ngawt mai te, mu chunga committee meeting kaihhruai han awm tawh lo tur te kha, hei vang hi a ni ngei ang Pu Ramus’n literature committee tawp mai tur ui a, tlai ni tla tur a’n thlir liam vawng vawng kha chu a tap lo chauh a ni e. Hei vang hian YMA pumpui thiah ni ta se kan buai dawn lutuk ngaihtuah ngam pawh a ni lo.
Masi a lo thleng ang a, YMA a awm si loh chuan zan duty-a awm dawn si lova Pu Thuamluaia te, Pu Darthantluangate tihtur hre lo hian eng nge an tih tak ang aw.
YMA thlarauvin a zem hneh tawh laklawhte hi chu an YMA em em mai a, an tel lovin YMA hi a kal thei lo va, YMA tel lo pawh hian an nung thei bik bawk hek lo. Chuvang chuan keini chuan eng tik lai mah hian thiah kan phal ve ngai lo vang.