June ni 15,2011 YMA dincham vawi 76-na kan lo thleng leh dawn ta, min hruai zeltu Pathian hnenah lawmthu sawiin, kan dinchamah hian YMA member zawng zawng te duhsakna chibai ka buk e.
Thuvawn ropui “YMA chu tanpui ngaite tanpuitu a ni” tih hi he hunah hian lantir zual ila, kan tanpuina mamawhtu apiangte hnenah a theih ang angin tanpuina hna i thawk ang u.
Kan khawtlang nuna siamthat ngaite siamthat hna Zoram dung leh vangah YMA in a thawka, kan thawhrimna chuan tunah leh nakinah rah tha a chhuah ngei ang. Kum tharah eng nge kumpuan thupuiah kan hman dawn kan hrelo, hun tlemte kan neih chhung hian kan khawtlang nun a chhe lai siamthat hna thahnemngai takin i thawk zel ang u khai.
Hna tul a pung :
YMA in kumpuan thupui kan neih changin ti-hlawhtling turin theihtawp kan chhuah thin. Kuminah hian nidanga kan buaipui ngailoh, buaipui a ngaiin Committee sangin a hria a, kan ram leh hnam tana thil tul a nih avangin theih ang angina kan buaipui ta a ni.
Kan kumpuan thupui ‘Khawtlang nun siamthat’ chu a hnuaia tarlan ang hian kan pawt fan a, hma kan la mek a ni.
1.Vai mistiri leh helper rate kan bithliah ta mauh mai : Aizawl khawpui mi hrang hrang atangin, Vai mistiri leh helper rate an duh hun huna an tihsan thin avanga sawiselna Central YMA-in a dawng tam hle mai. Vai ruai thinte hnen atanga nawrna a nasat avangin kan ram leh hnam tan tiin Central Co-ordination Committee(CCC)meeting 13.4.2011-a thukhawm chuan rate a bithliah ta tawp mai a ni. Vai emaw, vai lo emaw pawh nise, an rate bithliah hi YMA-in a ti ngai lo. Mipui nawrna avangte, rate mumal an neih loh avangte leh sorkar nawr nan YMA chuan rate a siam ta a ni. A bak zel chu sorkar-in a bawhzui tura ngaih a ni. Vai mistiri rate sang ber in ni 1-ah Rs.300/- aia sang a la tur a ni lo bawk. Hei hi vai ruai thin zawng zawngin zawm vek nise tih hi YMA rel dan a ni. YMA duhdan hi min ngaihpawimawh sak hram turin YMA chuan mipuite a ngen a ni.
2.Bank lema sumdawng : General Conference thurel bawhzuiin Central YMA chuan, kan rama bank hmanga sumdawngte uluk leh fimkhur takin a chhui chiang a, tunah hian hetiang bank lem hmanga kan rama rawn sumdawng, tunah khawiah nge an awm tak tih chhui hleih theih loh 22 vel an awm tih hmuhchhuah a ni. RBI phalna neia rawn sumdawngte pawh phalna an neih angin an thawk em tih pawh chhui zel a ni.
Thil pawi tak pakhat chu, a dik leh dikloh ngaihtuah hmasa miahlova, reilote chhunga hausak thut Mizoten kan duhna hi a ni. Chiahpuam in a ben harh zawh loh kan ni a, a hman hmanin min bum ta mai hi a lungchhiatthlak ta khawp mai.Fimkhur a ngai tak zet a ni.
3.Tuikuk lakluh chungchang : Central sorkar in Tuikuk, State pawna raltlan te chu March 31,2011 ral hma ngeia Mizoram a lut leh vek turin a ti a, hei hi an zawm lo hle a, zawm turin Central sorkar pawhin a tihtur a ti biklo-chu chu anmahni chhawmdawlna tur pek a tum chu a hunah a pe theilo a ni. Hetih lai hian Sakhan tlangdunga Mizo awm, chhungkaw 80 vel , nasa taka Tuikukte avanga harsatna tawk, Central-in chhawmdawlna pe ve tura Mizoram political party zawng zawng leh NGO zawng zawng te ngenna chu tun thleng hian tih puitlin a la ni lo.
Tuikukho, anmahni duh thu ngei a, dawt phuahchawpa kan ram tlanchhuahsan lui, Mizote min hektu te mahin chhawmdawlna an dawng a nih chuan, an kut tuara mangang Mizote pawhin an dawng ve ngei tur a ni tih hi YMA ngaihdan a ni tawp mai. Ni 16.5.2011-a political party-te aiawh leh NGO aiawhte chuan, ‘Sakhan tlangdunga Mizo, Tuikukte avanga harsatna tawkten chhawmdawlna an dawn hma chuan Tuikuk lakluh hi tawp lai lawk nise’ tiin Central sorkar-ah rawtna a thlen ta hial a ni. Union Home Minister hian Tuikukho lakah beng dawhin vawi khat lo kal tawh in, a vawi hnih nan ni 18.5.2011 khan Tuikukho bawk rawn hmuh a tum a, khawchhiat avangin a lo kal thei ta lo. Mizote lakah beng a dawh duh si lo hi hriatthiam a har hle a ni.
Sakhan tlangdunga Mizo te an phu anga chhawmdawlna pek an nih hnu-ah Tuikuk lak let chungchang hi date line sim tawh nise tih hi YMA duhdan a ni.
4. Kan in thlang leh dawn : Tum anga kan awm chuan October ni 27, 2011 ah CYMA hruaitu tur kan thlang leh dawn. Thlan tura chhawp chhuahte zingah tumah mahni insawi mawiin midang dem lo se, mimal taka insawichhiat leh inbeih hi MLA/MP inthlanah pawh kan tih duh tawh loh a ni a, YMA-ah phei chuan tih loh hram hram a tha. Member ten a hun takah an hruaitu tur an thlang mai dawn a ni tih hria in, an chhia leh tha hriatna pawt peng thei zawnga thil tih loh a tha. “YMA chu politics rawng kai lo, pawl thianghlim a ni” tih hrerengin, YMA Thianghlimna i vawng nung zel ang u. YMA -vul zel mawlh rawh se.
Ka lawm e.