Kan Editor hian article pahnih phutchhuah dan kawng a hmu fuh a, Pu Chhuanawma’n kar hmasa khan a ziak tawh a, hei! ziak lo thei lovin min siam tak hi.
YMA AW enkawl hi teirei peih ngai pawl tak a ni ve a, issue khat buatsaihna atan darkar 7 vel tha sen a ngai. Kum khatah issue 54x 7hrs = 378 hrs, chutichuan 378 hrs divided 12 hrs = 31.5 days. YMA AW buatsaihtute hi YMA leh khawtlang tan kum khat chhungin thla khat ai tam mah an hnatlang tihna a lo ni.
YMA AW enkawl tur hian thiam thil nei nih angai a, thiam thil neite chu nikhatah Rs 350/- hlawh lo chuan chhawr theih anni mang lova, chuti a nih chuan YMA AW enkawlna man hi 5x350x31.5 = Rs. 55,125/- lai a lo ni. Section tina Agent leh a semtute hi hlawh nei ni ta se YMA AW hi Rs 90,000/- vel leh Press a chhut man Rs 50,000/- nen Rs 1,40,000/- lai sensona a lo ni ang. Branch hruaitute hian hetiang a ni tih an hriat avang hian Editorial Board te hi an duat hle reng a ni.
1996 khan Type writter hmang thiam miah lo kha Jt. Editorah min ruat mauh mai a. Pu Chhuanawma, Pu Lalrammawia Khiangte leh Tv.Lalruata Hnamte te hnungzuiin ka inzir chho ve nawk nawk a, kum chanve kan hman zawh hnu kha chuan Type writter chhut leh cyclostyle her kha ka thiam chho ve viau tawh, ‘Ber’ thla kan chuan kai meuh chuan Cross Word pawh ka type ve thiam hial tawh a ni.
YMA AW enkawltu zingah kum 11 zet ka tel ve avangin mi chi hrang hrang mize inang lo tak tak ka thawhpui nual hman a. Tlana, ‘V’ Sect. Secy kha pa danglam tak, thil duh uluk em em mai a ni a, YMA AW kha a fiah loh a hlau hle thin a, cyclostyle hlui lam tawh hman kha chuan a fiah lo a awm duh zek a, Tlana khan zinglam dar 2-ah pawh cyclostyle kha a thiatin a siamtha peih reng a, thawhpui ten a hming lemah kuaibungbua an tihphah hial. Pu R. Lalhmachhuana hian YMA bungrua hi a rohin a dim thiam hle a, Editor a nih avangin type writter kha a mawhphurhna a awm liau liau a ni a, chuvangin Type Writter lian chi kha zirtawp zan tin an in atangin kan inah a rawn pu chhoin a pu haw leh ziah peih thin.
Inzir chawpa cyclostyle her kan nih avangin stencil kha her bun a awl em em a, zing dar 2 velah cyclostyle a rik deuh buk a, a hertu leh a puitu an ngawi hmak a, inthlahrung takin ‘a bung’ an han ti fan raih a. Kut zungchal pahnih chauh hmang thiam tan chuan legal paper phek khat chhut nawn leh kha a huphurhawm duh hle a, boruak pawh a rit churh zel.
Khel lova chawlhni zinga chhuah ngei ngei tur buaipui ta nafam chu December ni 23 zante hian kan han buatsaih a, Tlangvalte kha an kang-lang thin hle a, a vauin kan invau bet a, a chhuak ve zel chu a ni. Tum khat chu December Ni 30 zanah YMA AW kan buatsaiha, Taitesena Section aiawha editorial board a rawn tel khan nula min rim san daih mai a, midang khan ko haw rawh min ti a, Tv. Lianzawma hi kan koh tir thin a, vawi li kan koh hnuah pawh a lo haw duh lova, a vawi 5 nan tiin editorial board a tel zawng zawng kha a nula rimnaah kan kal a, kan thut ve hma hmain chhuah hmanhmawh berah a tang a, a duh aia rei kan rimpui a, a lungawi lo hle.
Thawkkhat lai khan Tlangval mahni section loa ngaihzawng nei kha fiam teh-ah kan neih a, Tv. Lalawmawia ‘T’ hian ‘V’ Sectionah YMA member fee a pe, Tv. Lalberan ‘Ch’ Sectionah a pe tiin kan han chhuaha, inngaizawng tak tak chauh kan chhuah duh lehnghal a, khang laia tlangval kan fiam thinho tan khan a lo hrehawm ngawt ang, an ngaihzawng neih kan puanzar sak nasa em mai. Chhantea (Ex-MLA) pawh hi a nupui neih dawn khan palai an tirh ten inneihni an bithliah kha an chhungkua pawhin an hriat kim hmain YMA AW ah kan chhuah thawt thawt pek a, a pain inneihni tura kan tinzawn chhinte han chhuahte chu a, a ti hial a. An inneihni tur nia kan chhuah lah chu an sawn leh ta nghal a, mi chhungkaw thuruk nen lam khan kan han chhuah ta thin a, kan ngamtlak nih kha tawrhchhel a ngai dawn hle a lo ni.
Kan cyclostyle hman kha a hluiin a chhe tawh hle a, Nilai zan khawhar lenpuinaah khatih laia kan Branch President Pu Vanlalsawma kha kan titi puia, a ni khan YMA AW te chu a pawimawh a, lei intih chuan kan lei mai tur a lawm, Branch committee-ah rawn thlen ula kan lei mai ang, tiin min sawipui a. Zirtawp zanah YMA AW kan han buaipui leh a, stencil vawi 3 ngawt mai a eichhia a, phek hnih pawh kan zo thei lo a, a tuk inrini-ah Biak Ina Pu Sawma hnatlang lai chu kan kal chilh a, YMA AW hi naktuk chu a chhuak thei lovang, cyclostyle a chhe tlat a’ kan zu ti a, ani chuan OB hnatlang awmte a be rawn a, a thar lei an ti tlu nghal a, Cyclostyle thar kan va lei a, mahni ta tur ni hlei lo YMA cyclostyle lei e ti lo khan mahni thil thar lei haw aiin kan hlim haw zawk hial.
Kum tirah Editorial boardte kan han inhmukhawma YMA AW enkawl awlsam zia ti hian kan sawi thin, kutzungchal pahnih leh kut zungpui pakhat hman thiam a tawk. Kutzungchal pahnihin type writter kan chhu boh boh ang a, paper thlehlet leh chhiar nan kutzungpui a rim hle bawk ang, chung zawng zawng aia pawimawh chu men rei theih hi a ni. A ni lah taka ‘98 inthlanpui result kha inrinni zanah an chhiara kan nghak zel a, chawlhni zing dar 6-ah chuan YMA AW chu kan zo ve thei mai .
1998-2005 inkar kha YMA AW ‘hot’ ber lai a ni mai awm mang e ka ti rilru thin a, khang hun lai khan article te kha chhuah sen loh kan dawng a, duh kan thlang thin. James-a award-te khan ngaihlut a hlawh hle a. Chutihrualin nula tlangval khan ‘kah/fiam’ kha an hlau hle a, keini lah khan kan kah/fiamte an zaha an sen tawn tawnna tham lo tur kha kan chhuah duh der lova. Tum khat chu ka zin bo hlanin YMA AW an buatsaiha phek tinah min kahna thu a chuang a, ‘Front page-ah te em chuan in kah loh tur a nia’ kan ti dek dek a, zin leh la, a haed-ah nangmah kahna kan chhuah tawh ang an tih meuh chuan ka ngawi dak mai. Computerised hnu lam chu a leng ta lo.