‘Zan khat chu YMA AW cyclostyle hmanga her a nih lai khan, a chhu turin kan thiante an rawn lang hlek lo mai a, ka chhu a, ka her leh a, kan nuin (kan President hi chu ni se ka nupuiin a ti ang) a lo thlep zel a, khawvar rualin kan mu ve hram’ Pu R. Lalchhuanawma YMA AW Editor hmasa ber chuan a ti. Hetiang deuh bawk hian Pu Lalnunthara Sailo pawhin ‘Engti zia nge maw ni YMA AW chhut loh zan pawha lo leng dur dur thin kha tumah an rawn kal mai lova, eng emaw ti tiin Editorial Board member pawh ni lo Tv. Buata lo lut tehmial chu ka chelh a, zing dar 4 ah chuan kan in mamngtha ve leh hram bawk’ a ti.
A dik khawp ang YMA AW hi a phek tam loh leh miten an hlut vak lem loh aiin kan buaipui nasa. Chutih rual erawh chuan a buaipuitute erawh kan hlim thei phian a, term khatah vawi 50 chuan hnatlan pawh hi a ninawm hran lem lo. YMA AW Editorial Board hi kan Branch OB te hian an ruat thiamin an thlang uluk hle turah ngai ta ila. Europe lama an harsatna ang chi vun rawngah in thliarna YMA AW ah hi chuan a awm lo tih Editor kal chhuak Dr. Ramliana te atangin a hriat a, Editor ni tur hian hmel atang chuan an thlang lo tih nikum lama Editor kal chhuak Pu Rozidinga atang hian a hriat mai bawk awm e. An inhnial bengchhen theih em avanga zan khat an thlim hial Pu Rimtuia leh Tv. Tia te hlei hlei hi an leng.
Kuminah pawh hian kan hruaitute hian an ruat dan hi tha the thaw tak a ni. Football team ni ta ang ila, a hminga Editor nih manah ti hian ‘ka team’ ka han sawi vel teh ang. Hman lai chuan centre kan ti mai thin, Pu Chda he hmunah hian a awm dawn a ni, ani hi a tul huna thu ziak thei leh thiam, kan mamawh em em Computer chinchang hre tak, kan duh apaing kan zawt a, min hrilh mai thei thin mi a ni, mi huikhawm a thiam a, kan Board ti phuisuitu tak pawh a ni reng a ni.
‘Right out’ ah inkhelh pawh a tak tak a thiam leh MFA referee certificate nei ngat Tv. Mangheta a awm ve thung dawn a ni. Thu tha tak tak ziak thiam em em mai a ni a, Mizo tawng grammer a thiam bawk a, mahni hna inpe zo mi tak a ni bawk.
Tv. Tia hi YMA AW tan hian a thawk rei ber tawh awm e, Editor naupang ber a ni hial bawk ang. ‘Left out’ lamah a tlan ve thung dawn a ni. Thu chhuah tur han haichham palh chang hian a thu mai mai lai hi ‘Tia han hnawhkhat teh’ han tih hi chuan a chawpchilh pawh hian thu tha leh ngaihnawm tak tak ziak mai thei a ni.
Ka’n sawi theihnghilh tep a, The Big Boss Tv. Masangtea hi a laiah nghet taka ding luah tur a ni. Ani hi chuan tumah a chhuah mai mai lovang. Big Boss hi awm ta lo se YMA AW hi a buai khawp ang, amah pawh. Chanchin thar lakkhawm lama tha em em, mahni hna a tui si a ni. Section lamah pawh hriattir tur chu ‘hma’ taka hriattir zung zung thei mi a ni bawk.
Tichuan kum hmasa lama tlawmngai award dawng ve ve tawh ngat Tv. Mahruaia leh Tv. LalJohnya te ‘defender’ ah an lo awm tlat mai dawn a ni. Anni hi tlangval zuangzang an ni a, an tlangval mah mah tih mai lo chu selna tur an awm lo. Laljohnya hian a ‘T’ Section rilru a la paih thei lo erawh a Section puite pawh hian hriatthiam erawh har an ti.
Tichuan kan innghahna leh kan chakna ni turin a tawp berah Pu Valtea’n hnu a lo dawl tlat dawn a ni. Thil chhinchhiah lam mi duhthusam, kan tisual leh hmaih changa pawh correction siam thin a ni, kan mamawh leh tul apiang kan sawi chuan min ngaihtuah sak zat zattu a ni.
Sap ram inkhel kan en thin a, inkhelte an inthlak chang a, player lo chhuakte Jacket lum lo pe thintu angah hian Tv. Zaitea hi kan hmang ve thung ang. Ani hi kan zinga tel chu ni ve chiah lo mah se, kan fiam a, kan sawm a, ngam taka kan duh kan thlenna, tlangval tlawmngai a ni. Hetiang mi chi hrang hrang hual vel khup ka nih avang hian a hminga Editor nih hi a nuam a, a thlamuan thlak a ni.
Chhuak leh turah chuan he thupui chhunzawmna Part - I Pu R. Lalchhuan-awma’n a rawn ziak ve leh ang a, Part - II Pu Lalnunthara Sailoin a ziak bawk ang, a hnu khar nan leh tlip nan Tv. Thangkhuma’n a rawn ziak leh bawk dawn a ni.