Kum 78 zeta upa ka lo ni ve ta, mite chuan tar pawh min ti tawh mai thei. Keima inngaihdanah chuan la vanglai tak leh tha zat hun hmang chauh niin ka inhria. Keimaha keimahah hian theihna lak chhuah tur tam tak la awm bawkin ka hria a ni. Miten min sel \hin, YMA hi awm lo mah se chhiat \hat buaipuitu tur zawng an awm tho vang an ti \hin. A dik khawp ang, harsatna leh lawmna thil a che tur Mizo \halai hi Mizo hnam hian a hmai hauh lo vang tih chu a chiang; mahse, pawl anga inthlun zawmna \ha leh inenkawlna \ha a awm loh chuan thil buaithlak tak a thleng ve ngei ang.
YMA i hlau ve em?
Hmannia India-in zalenna a neih champhaphak a lawm lai vel khan ZOZAM Times chanchinbuah Ruatfela Nu khan 'YMA ka hlau' a rawn ti a, nang hian min hlau ve em? Thufing chuan ‘mi sual chu um lovin an tlanchhe \hin’ a ti, police awm mai mai pawh hi rukru chuan an hlauh em hi. Kum tin hian kumpuan ka nei ve \hin a, tunah pawh hian ram leh hnam humhalh kumah ka puang a, ruihhlo ka do va, Mizorama cheng thei leh sumdawng theite dan hnuaiah ka enfel \hin. He dan pawnah hian mi an awm a, tih loh tur an tih chiah hian YMA an hlau a ni mai lo maw!
Keimah avanga Zofate tui taka in mut siai siai lai hian thil \ha nia ka hriat ka tih avangin tlang rel ka phur a, ka tih loh thleng thleng tiin min sel a, chung zawng zawng chu tuar chhuakin ka tihtur pual chu \ha ni a ka hriatin angin phur takin ka hlen \hin.
Tihtur pual te te:
Ka tihtur atan hian thil chi hrang hrang ka zam ve diah a, thlanlaih te, lumen te, bungraw lakkhawm leh senghawi te, thingpui lum leh sem te, heng chhiat \hata hman tur thutthleng, dekchi, no, gas etc hman tur neih angai a, a chhiat changa siam \hat, a thar lei, a dahna tur bungraw in a lo ngai bawk nen, mamawh leh tihtur hi a tam em em a ni.
Tihtur chi hrang hrang tam em emah hian ka chan \heuh hi nula tlangval zarah hlen hram ka duh a, chuvang chuan mahni chan a lum chu tumah phut buai lo leh mi dang ti ve lo thlir lo va hlen tlan vek hi \ha ka ti em em a ni.
Hetih lai hian ka duh loh thil tam tak a thleng fo \hin. Keimah avanga hming\hat leh hmingthan lo tum tlat te, mi dang tan ni lo va mahni tana hlawk lo tum tlat te, keimah avanga nihna sang chelh tum tlat ka hmuh chang hian ka rilru hi a lo na ngawih ngawih \hin a ni.
I nung tha em?
Kum khat chhungin mitthi vawi 40 zette in nei \hin a ni a, a buai leh hah pawl chu in hah hle ang tih ka ring. Heng zinga vawi 30 talah hian tha i thawh em? Heng tihtur tam tak zinga eng amah hi i lo thawk ve lo a nih chuan i nung chiah em inenfiah rawh.
A nih loh vek leh mitthi in neih a, lumenna a i kal loh emaw thlan i laih lo emaw hian i rilru a hrehawm \hin em? Chutianga mawlh deuh tlattu rilru nawm lohna i nei eih lo a nih chuan i nung tawh lo a ni mai thei.
YMA takin aw.
Tawngkam mawi em em 'Tlawmngaihna' chu ka phu hauh lovin a tlukpui ang maiin 'YMA takin aw' tih a lo chhuak a, he thu mawi tak hian teirei peih, \ha taka tih leh a tawp thleng thlen tih chu a huap a ni.
Tunah hian chakna leh theihna sawrchhuah tur awm lo khawp a tar ka la ni lo va, mi dang \anpuia hma lam pan zel hi Chanmari West thalai vang hian ka phur a, ka thei a ni.