A hniam lo a sang
West tih a veng hming tawpa a awm avang ngawt hian bir lutukah ngai suh. A nihna takah chuan Tuifinriat atanga a san zawng teh a nih ngat chuan Chanmari West hi feet 3600-3800 ? vela sang a awm a ni daih a. Bethlehem Veng te khu feet 3000 vela sanga awm an ni. Mihring cheng kan thahnem hle a, District Capital ho a tiat lo deuh a, thingtlang khaw dang chuan an tiat lo vek. Kan veng hi verng mawng lam atanga i chhoh thlir chuan a va rem ang reng si em i ti rilru ang.
Tehfung hmang fet lo la
Sub-Centre, Anganwadi Centre, Primary leh Middle School bak Sawrkar inkhuarna engmah hmuhtir tur che kan nei lo. Bank dawra, ATM te hman i duh a nih chuan, kan veng thenawm veng hnihah ATM 4 vel an hunga tah chuan i kal mai a ngai ang. Taxi a i pan dawn a nih chuan Taxi stand kan nei lova, a tlan lai i phar din a ngai ang. City Bus a chuan i tum chuan kan vengah City Bus a tlan lo tih i hriat loh kan duh lo. Aizawla awm kan nih avang ngawtin khaw changkang an tehna thin tehfung hmangin min teh lo la, kan veng hmun thuma thena hmun hnih dawn phei chu Kolkata a kutdawh veng nen khuan in angrengin kan VC ten sawrkar an rinluh tir hial a sin.
Khalh zawi la park tum suh
Kan venga i lo kal dawn a nih chuan step chhoh kal leh chhuk kal i peih hle a ngai. Veng mawng leh lu lirtheia i kal duh a nih chuan veng pahnih kal pel lo chuan a kalpawh theih loh tih i hriat a ngai. Kan kawngte hi veng mipui hmangtu kan thathnem ang huin a tein a tlabal hlawm hle. Lirthei kal theihna a lirthei nen i lo kal chuan khalh chak lo la, i park dawn a nih chuan i motor atanga i chhuk fel hmain traffic i ti jam nghal dawna, i lirthei hunna zawngin i buai fe ang. Chuvangin ke hnih nei rawn keng mai la i vannei zawk ang.
Sporting Club hmalak dan a zirin le
Infiamna lamah chuan Volleyball hi kan hmingthatna ber a ni a, rampum huapah top 5-ah hi chuan kan tel pha reng. Football hi chu hmanah First Division kan kai ve zawka, 2nd div ah hian a tha pawl kan ni reng. Indoor Stadsium hi Sawrkarin hman theih tur nia a ngaih Minister velin an hawn ang hi kan nei lova, sawrkar hawn loh sak zawh chiah loh kan nei ve. Kan Indoorah hian tunhnai atang khan Cock vuak kan uar hle a, hetiang ang renga kan kal chuan nakumah te chuan Mizoram aiawh a vairama cock vawpha hi sawm lai kan tirh theih a rinawm. Basketball khelhna ‘zawi deuhvin’ kan nei tih tur chu a awm ve.Football, Boxing, Hockey,Taekowndo, Karate, Judo etc i khel duh anih chuan khelhna tur kan nei lo. Boxing ring, Indoor chhunga hunnan Sporting Club hruaituten sawrkarah pawisa an sawi chhuaka. Indoor pawh an cheitha zo tawh a,an insawi anga hma an la a nih chuan boxing ring kan nei tep ang tih min rinpui rawh.
Kan duat liak liak
Mizo hnamlam hi kan chemkalna a ni a, hei hi chu kan vengin , kan duat liak liak a ni a, chhawmnun zel pawh kan tum. Kan nula tlangvalte pawh vairam chu sawi loh sapram thlengin hnamlam entirin an fehchhuak thin tih hria la. Hnamlama i tui a nih chuan i tan vengnuam lutuk a ni ang.
2nd Class Magistrate hlawhchham
Hetiang kan ni tih hriaa i lo pem lut dawn a nih chuan Gas a harsa hle a, veng thenawmah an sem zing deuh bik tih i rawn hre ve ngei ang. Ui leh ar khuakhirh chungchangah VC term chelh tawh te an la hlawhchham zel tih i rawn hmu ang . Ruahsur laia ekin sah ching sim duh mang lo te nen Sunde sikul in kal ho dawn tih hria ang che. Dan leh thupek chhuah sam tak a bawhzuina lama thatchhe tak thuneituten an awp thin kan nih avangin dan leh thupek hi kan ngaipawimawh vak lo tih i rawn hmu ve hlauh ang tih erawh kan hlau.
YMA kan innghahna
Chuti chung chung chuan YMA-ah i rawnin tatlut a nih chuan rin aiin an lo thawk nasain veng an lo va hmangaih em i ti thung si ang. Mizoram sawrkarin thil tak takah YMA te a hmachhuan thin ang tho hian he vengah pawh hian YMA hi kan hmachhuan a, YMA hi kan innghahna pawimawh ber a ni a. YMA hian kan tanrual loh chuan mi veng kan pha lo tih an hria a, chuvangin inlungrualna hi an thupui a ni.
Bawngpu par/Nihawi par
He veng hi nuam kan ti a, kan pemsan phal lova, veng hmasawn a nih kan duh reng a. Masi dawnah venglu lamah Nihawi par a rawn par ziah thin a, chu Nihawi par chu par tur a awm tawh loh hunah pawh he venga chengte hian he veng thatna tur hi an duh reng dawn tih min hriatpui dawn nia