Mizoram Premier League (MPL) season hnihna khel turin Chanmari West Sporting Club kan inbuatsaih mek a, huphurhawm hle mah se Pachuau kan sual laklawh tawha tawpsan thei kan ni tawh lo. Vengchhung mipui chakna hmangin veng hming tihthata chawi lar tumin theihtawp kan chhuah ve mek a ni.
ENGNGE MPL :
Thenkhat MPL buaipui reng renga kan buai lai hian hre lo pawh kan la awm thei awm e. Mizoram Football thuneitu sang ber Mizoram Football Association (MFA) leh ZONET tang dunin an buatsaih MPL hi Mizoram chhunga Football Club tha bik pariat ten nikum atang khan an khel tan.
Professional zulzuiin semi-professional anga ngaih a ni a, lawmman atan pakhatnain Rs nuai 5, a hniam berin Rs 80,000 an la thei. Club tan zawm tur dan mumal tak siam a ni a; (1) Club chu Firms & Society hnuaiah a in-register ngei tur a ni; (2) Club-in sum (bank account-ah) cheng nuai 4 a nei tur a ni; (3) Club-in Physiotherapist puitling emaw MFA hnuaia Physio training tawh a nei ngei tur a ni; (4) Club-in Rs 50,000 aia tlem loa sponsor-tu a nei ngei tur a ni; (5) Club chu sorkar kuta awm ni lo pawl emaw mimal ta a ni tur a ni; (6) Club chu coach, AFC 'C' license nei chinin a enkawl tur a ni; (7) Player hlawh bithliah a ni a, a hlawh hniam berin Rs 3,000 a hlawh ngei tur a ni etc. tih vel a ni duah mai.
2012-2013 season hmasa bera playoff khelh kan tum tan ve lai khan keini Chanmari West Sporting Club tan chuan Sl No 1 leh 5 chiah khi kan tlin tawk chu a ni nghal, khelh ve kan duh tlat si a, lu a hai tan nghal hle mai.
ENGTINNGE KAN KHELH VE NGAWT:
Season khatna playoff kan khelh dan chungchang han tarlang lawk ila, a tan tirhna a ni a, 1st division club record tha zual 4 automatic qualification an pek hnuah hmunawl 4 chuh turin club a duh apiang tan qualifying khelh theih a ni.
Keini ADFA hnuaia 2nd division-a sang ber kan nih avangin automatic qualification min pe tur a ni tia kan dil pawhin an phal si lo a, kan veng thalaite hmakhua thlirin kan hruaituten khelh ve an duh miau si a, hma kan han la tan chu a luhai thlak rualin tum chuan kawng a lo awm ve mai zel.
"Tum chuan kawng a awm a ni", tih thuvawn vawng tlattu Chairman Pu Ramhluna leh secretary Tv Zaiteate kan nei a, khelh ve an tum miau si a, hma kan la ta alawm maw le !
Physio training chhuak tu nge kan biak ang tihah kan lu a hai em em a, Pu R Lalsangzuala'n (Sangzual#*nga'n) kan nau Rebeki hi Physiotherapist a nia, a hman theih ang em ?? 'theih tehreng mai lo be ta che', Physio atan , Pu BTA fanu Dr Rebecca Lalrinngheti phawt.
Coach-ah le ?? Central YMA football-a final min thlenpuitu Pu Maneiha kha assistant Pu Malala leh kan YMA team buaipuitu Tv Zaitea'n lo be mai ta che u, OK.
Rs nuaih 4 engtinnge aw kan tih ang, kan beidawng tep tawh a, kan inhmuhkhawm zut laiin Pu Zotea varanda atanga beidawng thawk lak paha dak chhuak Pu Ramhluna'n, " Khuuu, Pu Zote, i kawmthlang pa bank lam Babu Pu Ramzauha khu i zu leng teh ang", Pu Ramzauha'n 'veng tante chuan' tiin buai chung chungin tih dan min lo zawnsak.
Tlaikhawhnuah, mi club an inbuatsaih tan suau suau tawh hnuah document tul ang ang nen last date-ah ngat engtin emaw kan va inziak lut ve thei hram a, a buaithlak deuh bawka ‘veng tan a ni bawk a’ hnathawhna lama ka pu Dy. SP Tv Biakkima pawh ka tir kawi zeih zeih mai. Kan inbuatsaih tlai deuh bawka team 8 inel zingah uiawm deuh deuha chak loin 6-na niin kan tla a, MPL khel pha club thenkhat lakah kan player neih that zual kan chan zui bawk.
Tichuan, nikum season chu ADFA hnuai 1st div club zinga titha ber dawttu kan ni a, district tin atanga club 2 zel playoff khel thei turah Aizawl district atangin kan inhlangkai ve leh ta. CH Sect Tv senior Mawia'n an department Coach Nl R Lalnunsangi min biak felsak hnuah inziak lut felin, tehna hrang hrangah club thenkhat an tlin loh avangin Aizawl veng hausa ber pawl Electrict Veng FC leh in sang thum khuaa inchhal, district capital chuh ngam Khawzawl FC te nen May khan kan khel a, EFC nen 1-1 a nih hnuin 2-0 in Khawzawl kan a hneh a, MPL season 2 atan fel fai takin kan inpetkai ve ta phawt mai.
ENGNGE MPL KHELH A TULNA, A HLAWKNA :
Tlangval intihbuai hrat tlem tein, 'Kei chu Rahsi Veng ka ni tlat mai' an tih thin vangin Lunglei khawpui a veng ropui tak pawh ni bik lo Rahsi Veng chu Mizoram veng hming lar ber pakhat a ni tlat. Khawvel ram tinte hian lar, len, ropui leh thiltithei nih kan inchuh.
Chutiang bawkin he laiah pawh veng tinin veng hmingthatna bakah lansarh kan duh. Indo bur bur te, insual rum rum te a rem tawh lo. Sport leh thil dang hmangin ram lak kan tum zawk hlawm a ni. Sport hi a hlawkna leh a hlutna ngawr ngawra chhut chi a ni lo. India-in Olympic medal pahnih khat hlawh chhuak tura sum a sen hnem ziate hi a sum leh pai zawnga chhut chuan hnawmhne pawh a tluk lo.
Amaherawhchu, hmingthatna zawk kan zawng a lo ni reng. Football avangin England rama khaw lian ber pawh ni lo Manchester khua chu United leh City Football Club avangin Mizote mai bakah khawvel puma khaw lar leh mi tamtak thinlung luah ngawih ngawihtu a ni.
Khawpui ropui New York aiin London veng pakhat Chelsea hi Football vangin kan hre zing zawk. An khaw Football Club hi awm lo se heti takin Madrid, Barcelona, Milan tihte hi Guwahati, Silchar, Bagha tih vel ai paw'n kan lam zing dup lo tawp ang. Khawvel ram ropui ber pathum USA, Russia leh China pawh hi Football ram ropui ni se a let deuh thawin an ram hming a ropui zual ang.
Mizoten football kan hlutzia hriain ZONET neitute Zoram khawvela mi 'a' lo tak takte hian pawisa tam tham tak thapin MFA kaltlangin football hi sum peipunna atana hman tumin chawmhlawm state tiha mawi lo khawp, MPL hi Mizoram puma en theih turin Live Telecast-in an pe chhuak.