Kan editor-in article kan khaihlak tlat mai tiin ka kutah a dah a, thu tangkai dang han ziah tur a awm si lo va, pathiannia tan tur MotoGP Championship rilruah a lang zawk a, he lai hmuna awm atan inhmeh lo viau mah se, dah awl ringawt ai chuan a ziawm deuh ang chu..?
Kumina champion turin Casey Stoner chuan rin a hlawh hle a. Australian rider hian kum li chhung Ducati bike khalhin Italian team tan hun a hmang a, nikuma season a tawp rual khan Honda-in an la lut a. Pathianni hian Honda team tha ber Repsol Honda tan Qatar-ah intlansiak a hmachhawn tan ang.
Stoner hian Redsol Honda vohbik tia an sawi thin Dani Pedrosa a kawp dawn a, season hnih Pedrosa nen inkawpa Honda factory team No. 1 bike khalh hman Italian Andrea Dovizioso luahlan mah se, Doviozioso hian No. 3 dinhmun luahin Redsol-ah hun a hmang zui dawn tho.
2005 khan 250 championship-ah title inchuhin Pedrosa leh Stoner an inbei nasa hle a. A tawpah Spaniard zawk dingchangin title a la a, Honda chuan rider pahnihte hi MotoGP-ah seng lut ve vein, 2006-ah Pedrosa chuan team tha Repsol Honda tan bike inelna sang berah season khatna a hmang nghal. Stoner erawh chu Honda team chhe zawk lamah MotoGP-a a season hmasa ber a hmang ve thung.
2006 kum tawpah Australian rider chuan a rilru thlakin Ducati a zawmsan a. Italian team tana season khatna a hmanna 2007-ah hnehsawh takin world champion a ni. Stoner hi Ducati tana history ropui tak siamtu ni telin Italian team hian kum li kal taa trophy an lak bak MotoGP-a hun an hman tawh chhungin world title an la hlawh chhuak lo hrim hrim.
Yamaha-in hma an sawn laiin 2008 atangin Ducati an talbuai leh a, Stoner chuan a title hum zo lovin nikum thleng khan hnehna chang turin a ler a luah let zo tawh lo va. Bike a neih that tawk loh mai bakah, hliamin a tibuai nasa.
2006 khan vannei ang reng takin Nicky Hayden-a kutah world title a tlu lut a. American rider hi season pumin tlankawng pahnihah chiah pakhatna a ni a, a elpui Valentino Rossia chuan pakhatna nihna ngah zawk viau mah se, Yamaha bike chhiat ching tak vangin Italian rider hian season tawpah world title a kawl lai hum zo lovin point belhkhawmah Hayden a pha lo.
Hayden-a hnuah Honda-in world champion thei rider an nei zui leh tawh lo va. Beiseina sang tak nen kum nga chhung Pedrosa an thlir tawh a, an la hlawhchham zel. Japanese team pahnih inel em em zingah Honda aiin Yamaha an lian tawh hle a, season liam ta kum sarih chhungin world title vawi nga an la a, tun kum thum chhung phei chu Yamaha-in thunun hneh.
Kum liam taah Jorge Lorenzo a chungnung a, Spaniard hi Yamaha-ah nghetin Rossi meuh pawh a nek chhuak thei hiala ngaih a ni a. Rider ropui ber zinga mi Rossi lahin 2003 kum tawp khan Honda chunga lungawi lovin Yamaha a zawm a, kum sarih a cham hnuin a pianna leh seilenna Italy-ah kirin Italian team tan season thar hmang turin a inbuatsaih. Pedrosa nghak chhuak thei lo Honda-in rider an dap a, bike tha a neih chuan world champion a ni thei tih a taka lantir tawh Stoner la kir lehin, hmana team tha an khalhtir duh loh kha an bike tha ber an pe. Australian hi season tan hmaa team hrang hrang inbuatsaihna hnuhnung berah a chak ber a. Losail-a an intihsiakna tur inpuahchahna hmasa, ningani zanah pawh Stoner aia tlan chak an la awm chuang lo.
Season tan hma atangin Honda an lawm a, Yamaha hnuaia rei tak an kun tawhna atanga tal chhuak thei turin Stoner-a chungah beiseina sang tak an nei a. Tun pathianni hian Stoner, Lorenzo leh Rossi-ten bike inang lo theuh khalhin inelna bul an tan dawn a, tunlaia rider tha pali zinga mi Pedrosa chuan kum nga a hlawhchham hnuah champion tumin bul a tan tha leh dawn bawk a, season hmuhnawm tak leh inelna nasa em em tura ngaih tan a ni ang a, Rossi hmun ruak luahtu Lonrenzo teammate thar Ben Spies theihnghilh chi a ni lo mai thei