Vanapa hi mi tlawmngai tawpkhawk, tunlai mite’na kan hriatthiam dan ber tur zawngin “YMA-a hnim phum leh chhum hmin zan” a ni ber mai. A nunah hian YMA member-te hian entawn tur kan ngah hle awm e. Vanapa hi Kristian, mi piangthar a nih kan hre lo, mahse Isua Krista ringtute’na kan tihtur awm tak tak ti \hin mi a ni tlat mai. Kristian-nain Mizoram a lo thlen hma leh YMA din a nih hma hauhva Kristian nundan \ha ngaisang a, zawm mi leh mi dangte tana malsawmna nih tum tlat mi a ni. Tunlai mite'na Vanapa kan entawnna tur kawng hrang hrangte i lo thlir ho teh ang:
a) Ei zawnna kawngah: Ei leh bar zawnna kawngah thiamhnang deh lam hi a tuina leh thiam zawng a ni a. A hna a ulukin a tui em em a, a hnathawhah a rilru a pe a, a hlawhtling viau reng a ni. Thil ti mai mai ngai lo mi, tih tawh chuan theihtawp chhuah mi a nihna hi entawn a \ha khawp mai. Eng hna pawh thawk ila, Vanapa ang hian hlawhtling ngei tura kan rilru zawng zawng kan hnathawhah kan pek a pawimawh khawp mai. Mi dangte pur buai lova, mahni intodelh tum tlat mi a nihna hi a entawntlak hle a ni.
b) A nungchangah:Vanapa nuna entawn tur pawimawh tak pakhat chu a mizia a thlak danglam thei hi a ni. A thinchhiat lutuk avanga nupui pawh hmu zo lo, kum 40 thleng rawka “Tlangval Damrei” an tih a ni a. Mahse tun hun thlenga a chanchin kan sawi tam ber chu a zaidamna hi a ni ta zawk a ni. Thinchhiat lama vantlang khum, Vanapa pawhin zaidam lamah vantlang a khum leh theih chuan keini paw’n kan nungchang \ha lo laite hi kan siam \ha ve thei dawn lawm ni? Vanapa hian khawi University a\ang mahin zaidam a zir chhuah kan hre lo, mahse zaidam lamah chuan Doctorate Degree pek hial phu a nih si hi. Chuvangin mahni nungchang \ha lolai siam \ha tur hian mi dang pan chi a ni ngai lo, mahni tawka , zir chhuah mai chi a ni e.
c) Mi hawihhawm a ni: “Sem sem dam dam, ei bil thi thi” tih thupuiin Zoram khawvela ro a rellai pawha mi hawihhawm lawrlak, ei leh in thua mi dangte kian thei reng mai Vanapa hi lo tho leh ta se engtin min ngai ang maw? “Ani’n chang se, kei chuan nei ve lo mai ila” ti \hintu Vanapa nun leh tunlai Zoram khawvela Gas semna leh tui kang nghahna hmun boruak inthlauh tawhzia hi chu sawi fiah thiam chi pawh a ni lo hial awm e.
d) Hruaitu ropui a ni: Hruaitu fing, rorel thiam, mi dangte tana nun pe mi, Vanapa ang hi kan tunlai Zoram hian a mamawh a ni. Hna hniam ber a\anga a sang ber thawktute hian Vanapa nun hi entawn in zir ta ila, vawi tam tak “Siam thar lehna Gospel Camping” kan siam ai hian kan hlawk zawk mai lo maw? Eirukna leh hlemhletna kawngah Kohhran hruaitute pawh an bang chuang lo. Lang leh mai tur pawh ei ru duhtute hian, Theipui hmin pakhat, mahni chauhin lo ei pawh nise tuma’n thiam loh an chantir miah loh tur Vanapa nun hi ngaihsan a, entawn nachang i hria ang u.
“Nangmah i inhmangaih angin i vengte i hmangaih tur a ni” (Gal 5:14) tih thu hi “Kan buk rawn luah leh turte’n an mamawh ang e” tia tui leh thing chhek khawlsa diama buk kalsan \hin Vanapa nunah hian ava han lang chhuak chiang tehlul em! Lo neih nikhuaa “Hmeithai leh chhumchhe zawkte’n a hnai hnaiah nei sela, Lal leh Upate’n a lai lumah, kei chuan a vausa ber, ral dovah ka nei ang” ti \hintu Vanapa nunah hian zir tur leh entawn tur kan ngah hle mai.
Nang leh Kei hi
Vanapa hunlai angin tlawmngaih han chhuahna tur, hmalakna kawng a tlemin khawsak phung a dang ta em alawm, kan ti a nih pawhin a dik ve reng. Mahse, tunlai huna tlawmngaih kan chhuah theihna hun leh hmun tlemteah pawh hian “Tlawmngai ta lo hian kan tlawm” ta zawk chu a nih si hi!
“Aw Zonunmawi chul tur par ang lo vul leh nan,
Nang leh kei hi kan pawimawh ber si a;
Mizo nih mai hi a tawk lo, i ram hmangaih mai a tawk lo,
I nunah Zonunmawi inlar chhuak ngei rawh se”
tiin Vanapa hian \hangtharte hi min au asin. Engtin nge kan chhan ve dawn le?