Kei ve zawng vai ramah hian ka kal zeuh zeuh thin tih mai bak chu tun anga kumpui linglet a awmhmun khuar zawng hian ka vawi khat awmna a ni a. Ka lo rin dan leh suangtuah dan nen in mil ta chiah lo pawh ka hmu ve tan.
Kan kal chhan inang lo ta chu, kan tawn pawh a in ang vek thei lovang. Zirlai ni chunga experience te, sawrkar hnathawk experience te, Missionary experience tlem tlem chuan inang lo deuh turah kan ngai ngawt a. Keini Mission hna thawktu te hi chuan ‘Thim chhah tak’ hmuhin kan hmu a, eng chhit ngaiin kan hmu a ni. Sawrkar hnathawk lam pawhin hmuh dan an nei ve ngei ang.
Khawvel thiamna a thang chho zel a, thil a danglam ta hle mai. Kum 1492 a Columbus-a’n America a hmuh chhuah khan, an ram lal chuan a hnu thla nga velah a hre ve chauh a; 14th April 1865 a Abraham Lincoln a thih pawh kha Europe lam chuan a hnu ni 12 ah an hre ve chauh a nih chu! Kum 1969 a Armstrong te thla lawn lai kha chu khawvel ram 50 vel atangin mi maktaduai 700 vel in an en thei tawh thung. Tunah chuan Live in an pet goal lai kan thlir thei ta! Phone SMS etc…kan inbe mai. Lehkhathawn pawh a outdate deuh der tawh mai. Chumai a ni hleinem! Computer phei chu dawr atanga an siam thar ber kan lei rual hian a aia tha zawk an lo siam hman zel an ti!
He khawvel finna thang chak tak mai hian min tuam mup mup reng a. Thil hrang hrangah hian Computer, Bike, Car leh Mobile handset ho ngat phei chu New model a awm reng mai anih hi maw! Kan tunlai khawvelah thiamna kan ngaisanga, theihtawp chhuahin kan um a ni. Mizoram leh Mizote pawh kan bang bik lo.
Brad Pit channa Troy film kha i en ve tawh em? A nih leh Trojan Horse i hria em? A hming tal chu i hre lo maw? Hmanlaiin Troy lal fapa Paris-an Spartan lal Menelaus-a nupui hmeltha tak mai Helen-i a tlanbopui a, Menelaus-a unaupa Agamenon-a hovin remchangah la in Troy kulh chu lak an tum a, nasa taka an beih hnu pawhin an la thei lawk lo. A tawpah chuan Greek ho chuan thingin sakawr lem an siam a, kulh bulah an dah a. Troy hovin an hmuh chuan an lawm em em a, kulh chhungah an la luta, ropui takin an lawm a ni. Mahse, Sakawr chhhungah chuan sipai thenkhat an tawmru a, an inrin loh hlanin an lo chhuak a, Kulh kawngka an hawng a, Troy kulh ropui tak chu hnehin a awm a, Mipa zawng zawng an that a, Hmeichhe tam tak salah an man ta a ni.
Keini ho tan hian tunlai khawvel hmasawnna leh changkanna tam tak te hi Trojan Horse a ni ve thei ang em? Kan mamawh leh tul chin chu a awm ngei a lawm. A bak kan lawm zawng thil chi hrang hrang kan mamawh ber ni lem lo te hi kan thliar thiam a ngai khawp mai. A hmuhnawm, changkang, mawi tamtak chhungah hian sipai an lo tawmru ve reng anga, Trojan Horse a ni ve thei tlat.
Zirna sang belin hmun dangah te keini mizo te pawh kan kal ve ta zel, a tha khawp mai. Philosophy hrang hrang leh ideology hrang hrang te mi tam tak chuan an chhiar zau zel a. Rinna Foundation nei tha lo chu nasa takin a nghing thin. Bible chhiar ngai hek lo le! BIBLE aiin Evolution Theory an bel zawk a Mizo dik tak evolution theory pawm em em kan nei nual tawh em le? Kan neih ka ring. Humanist, Marxist, etc.. tui pui em em kan awm tlat alawm!
Mizoramah khian mi thiam tak tak, doctor, officer etc fel deuh deuh, zuk leh hmuam ti lo, Zu pawh in lo. Inkhawm bawk hek lo kan ngah tan ta khawp mai. Eng nge a chhan ni ang le?
Sunday School, Kohhran leh chhhungkuaa Pathian thu zirna nei mumal thei lovin thenkhat chuan an hun tam zawk Hostel-ah an hmang zova. Pathian thu te hi an hre lo khawp mai. School tam tak chuan Manner and etiquette aiin Mark Percentage an ngai pawimawh zawk a. Zirlaite future ngaihtuah ni awm takin, a tak takah chuan an School hmingthatna bak an ngaihtuah lo!
Khawvel thiamna leh finna, media chi hrang hrangte hian tan lam an nei. Eng lam side nge an nih tih kan chian a ngai fo mai. Trojan horse ang khan lawm takin kan lo la lut ve anga, min eichhetu virus leh min ti mualphotu a ni palh ang e! I Fimkhur ang u.