Thlanlaih hi tam a har ta hle mai, Tlangval 100 (za) chuangin lai reng tura ngaih kan nih laiin tlangval 20 bawr vel lekin an laih chang a tam zawk ta. Kan hunin a zir ta lo nge, a hun in min nang ta zawk? Engati nge tunhma kan phak loh, thlanlai thin tlangval tam takte Pa an lo nih hnua thlanlaih an Pension hnu hian thangthar zingah thlanlaih rawn ching thar an tlem ta si, bakah a lai duh tan hna tul tam tak a lo awm ve tawh bawk nen..
Thalai 1,000 (sang) rual hian mi 20 bawr vel lek thlan laih kan ring fo dawn a nih chuan infuih thar emaw tih dan thlakthleng emaw tal chu a ngai a ni. Kan venga thlanlaih taima tak takte an lo upa ve tan ta. T Section lam Pu Rinsangate dawrah an tul si, Pu Mahmingate Taxi khalh a ngai tawh, K lamah Pu Rimtuia te hun a liam ve ta tial tial a, Valupa Pu Thanseiate’n min ho reng peih dawn lo, CH lamah Tv U Liansanga tha a thum tep tawh, a thawhhlawk thin Pu Laitawia(L) fate ho pawh chhungkhat pa an lo ni tawh hlawm si, V Section lamah Pu Mahera zingkar tluana nau tap thlem char char a ngai tawh, Bawla lah a bawl reng bik si lo, Tv Mahriata te unau lah an senior ve tan si, N Section lamah U Nunsanga te an pahmei ve si, Pu Chulloa hi engchen nge a Undertaker peih dawn. N Sect Tlangval fel Mahruaia te, V Sect Leader Pu VL Thakima te pawn tlaivara thlan lai tura liam zui hi an peih reng bik dawn lo tih hi a chiang reng mai a, K Sect Leader Pu Puia hian thlanlai a vil reng peih dawn em? T Leader Pu Muantea hi a tha a za lo ve tulh tulh dawn. Hawi vel ila thangthar zingah hian in nghahna tlak chu tlemte chauh an awm (kan U rual te ho hming tlemte ka han thailang a, an ni aia taima hlei hlei hi kan u, kan rualpui leh nau ve lehchhawng tamtak thlanlai taima tak tak an awm a ni tih hria ila). Kum 30 ral kai awrh a thlanlaih inti pension ta daih ho pawh hi an demawm reng reng lo, an hunlaiin rawlthar chhuah hlim atanga rei tak chhung regular taka thlanlai an tam, amaherawhchu a chhawktu tur rual thalai chhuak thar kan tam ang huin (Kum 18 atanga 30 inkar ho) hian kan thlawp zo ta lo deuh niin a lang.
Tunlaiin thalai rual sawrkar leh private a hnathawkin kan awm ve diah diah ta a, hei hian engemawchenah thlanlai hi chu min ti tlem deuh ni chuan a lang. Kei ngei pawh holiday-ah lo chuan laih tumna ka nei tlem ta khawp mai. Thlan laih duh si, hman lo an tam rualin, hman lutuk si, laih tum miah lo hlui tam daih kan awm bawk si. Nu leh Pa ten 'thlan lai ve rawh' tia tirh miah loh thangthar kan tam ta lutuk a ni, thalai fel deuh thlan lai peih tur lah a tlaivar taima an ni bawk si. Tlaivar ngai miah lo lah a lai thatchhe hlei hlei. Tunhma chuan (an ti) chhiatni a thlanlaih/ khawharin kal ngai miah lo thalai awmna chhungkuate kha chu an hriat theih viau a, zahthlakah te pawh kan ngai hlawm a, tunah chuan a engmah ti ngai mang lo chhungkua deuh vek kan ni tawh zawk a, zah nachang pawh kan hre tawh chuang lo, zahthlak a nihna pawh a awm tawh lo emaw ni zawk. Hmanlai a zahthlak kha a zahthlak tawh si lo, a thawk chhuak thin mi tlemte an inhre tawn ve chauh ta zawk lel a ni. A chenbeh zawk leh kilkhawr lama chengte’n thlanlaih, tlaivar, khawhar in kal an la ngai pawimawh viau laiin a mualkil, mihlun leh mi neinung/ awmthei zawkte’n chhiatni activity an hlamchhiah zawk deuh tlat nia a lang phei hi chu kalphung kan thlak a ngaihzia tilang tu a ni. Veng thenkhat tih thik in hlawhfa emaw hnatlang in emaw thalaite hian thlanlaih lawk rawt ve se thil tih awm lo a ni miah lo ang.
Tin, thlanlaih chawp aiin laih lawk hi kawng tamtakah a tha zawkin a lang ta. Hlawhfa ruai kher loin, Branch hnatlang -in lai ta zawk mai ila, duh zat zat kan lai lawk mai dawn a ni. Tunah hi chuan a mitthiin lamah buai ngai bawk, thlanah buai ngai bawk, a hla si, tlaivar hnuah thlanlai thingpui pek ngai bawk, Branch / Section hruaitu leh member a hah hote hi chu an hah em a, chhun lama invui hunah meuh hi chuan kan mualpho lek lek thin ta mai. Pa Vena te thahnemngaiin min han vin bawrh bawrh mai thinte hi huat enah pawh kan en duh lo. Kan duh emaw duh lo emaw thlanlaih hi History a chang tep tawh thianpa Mawia vei em em pakhat tunlai thalai tam tak hian an hunlaiin thlan an lai thin tih hre mah se ‘Ka lai ve asin’ an ti thei lo tur hi a ni. A la lai ngailo te khan lai ve mah teh u a nuam asin, thian tha hmelhriat tha siam nan hlei hlei hian a tha asin.
Amaherawhchu Unaute u, kan vengah hi chuan thlanlaih hi kan la kalpui rih dawn niin a lang a, hei ai hian hma a sawn theih dah lawm maw tiin rawtna thar ka han chhawpchhuak teh ang; Thlanlaih apiangin a lai list an pa / nu hming section nen Register-ah fel taka lak a vawn that ni se, thlanlai list hi pa/nu hming section nen hian YMA Aw ah chhuah thin nise, hei hian a tha zawngin min kalpui ang tih ka ring tlat a ni. Hmanlaiin tlawmngai chawimawi nan 'Nopui' te an indawmtir thin a, tunlaiin a rem chiah si lo a (keichu a Nopui zawng hian ka duh a nia). Kan chanchinbu YMA Aw hmang hian tlangval tlawmngaite Nopui kan dawmtir deuh reng mai dawn a, tlangval tlawmngai te lahin an nu leh pate an chawimawi nghal bawk ang a, mipuiin tu nge tlangval tlawmngai leh fel kan lo hre zung zung thei dawn a ni. Thih hnua inchawimawi ai chuan damlai ngei a inchawimawi hi a tha. A tha kan ti a nih chuan, ‘ngawi teh u, kum a laklawh emai’ pawh ti kual chuang loin hmang mai ila thil harsa lote a ni e.