Kamkeu nan Tuizem leh Vanapa Run
Pu Chatea leh Pa Zova Tuizem khawr kha choka chhungah an uluk hle a, tlai lama an khawr zawh hnu chuan an thleka an nui leh ruh ruh thin a,tuizem nge kan vuakthiah dawn kawngkhar tih kha an ngaihtuah zui ta a. Hetiang deuh hian Pu H. Vanlalvena leh Sawma V & ZCC-te chuan Vanapa Section trela in tur an sa dun a, an sak zawh meuh chuan an dah tur ber hi inchi 4.5-in a leng lo va an nawr lut thei lo. Tunah hian two wheeler dah nan an hmang ta mai mai.
Thlahleinga zan theihnghilh
Thla han tih hian thenkhat rilru-ah chuan ‘thlahleinga zan’ tih a lo lang a, lunglen an tum nghal ringawt zel. Tunlai chuan eng (electric) kan nei tha a, inchhung lumah TV kan en heuh heuha, chuti a nih loh pawhin facebook, internet kan luhchilh a, hetiang khawvelah hi chuan Thlate chu lo bialin lo eng ruih mah se engteh-ual-ah kan ngai ta lo. Thlahleinga zante chu kan theihnghilh rem rum tawh mai.
Thla-a thil dum khi kan pi leh pute chuan bung niin an hria. Pu C Lalzarliana erawh chuan Ui khuahkhirh loh niin a ngai a, Pu F Zosanga pawhin Ar khuahkhirh loh niin a hria. Pu C Lalmuankima erawh chuan hnatlang kohna tawtawrawt emaw ti a, Tv. Zaitea ve thung chuan YMA Logo emaw a ti. Tunlai bikah hi chuan Pu Mahera chuan tonic solfa inziak tlar emaw pawh lo ti se, Tv Masangte-an Mangheta nula rim tur kal zan zan lai ni tlatin ngai se a mawh lo ve, thla bial lawma tingtang nena khaw laia zai vawng vawng an tlem tawh em hi maw !
Heti ringawt hi a ni thei chiah lo
Tun hi hman a la chang dawn. Rei lote emaw kan tih laiin ‘Panlai nau rual leng zawngte kha, hmanah cho ui rim nam maw,....’ tih hla YMA chhangin kan zir that that laite kha han sawi ila kum 27 liam ta a lo ni daih tawh.
Chanmari YMA Games-ah Chawngbawla section pakhatna anni han ti ila tuna T leh K section inbelhkhawm hun lai kan sawi tihna a lo ni a. Pu T Bualzika, Chanmari Branch YMA President a nih lai han sawi tel bawk ila, kum 27 vel liam ta a lo ni daih tawh a, Chanmarians kan sem zak zak laite pawh a rei ve ta hle mai.
Hetianga thil rei tawh han ngaihtuah hian mihring hi lunglenna eng emaw tak hian a rawn luhchilh nghal vat thin. Thlahleingate pawh hi ngaihtuah lem loh chang awm mah se ngaihtuah hun a lo inher chhuak lo thei lo.
Kan sawi ta sa sa, Zawlchhak
in sawi teh ang aw
Zawlchhak han tih ringawt hian Primary school naupangin pathum hmun an sawi rual dial dial lai bengah a lo ri a. Zawlchhak hi a hun lai chuan Gladiator ni tura mipa naupangte inchherna hmun pawimawh ber a ni.
Aia upaten ‘chala chil inhnawm hmasa sa’ an tih avanga insual ta hi engzat tak awm ang maw ? Insualna hmun chauh a la ni lo cheu; playground pawimawh tawpkhawk a ni tel tlat ! Ball, cheng hnih man ke lawnga petna, insakawrchungchuanna, inkawibahna, zuan san leh zuan thuia inelna, tuaingawt leh rawmung inbakkaih tirna hmun,... eu ! sawi vek lohin a fiah zawk thei dawn tlat mai !
Pu Lalkunga sikul kawt leh a sira zawl changpha lote tan khan zawlchhak kha a va hlu em ! Incho deuhten insual tura an in hrilhin ‘banah zawlchhakah kan insual ang’ tih kha an sawi tel ngei ngei a ni.
E he! Thlan-in pawh sawi tel a ngai tlat mai
Thlan in chunga lawn theih kha kan chak thei hle. Mahnia thlan in chunga kan han lawn ve theih meuh kha chuan thlan in chung atang khan a hnuaia awmte kha thil lei turin kan tir kan tir a, an hnial ngam ngai lo.
Aw, kha thlan in kha tawng thei ngat se chuan puan tur a va han ngah dawn tak em ! A thenin ruahsur laiin tawm hul nan an hmang a, a thenin sikul tlanbo nan, a thenin meizial zuk ruk nan, a thenin ganja zuk ruk nan, a thenin ruih nghah harh nan, a thenin ngaihzawngte tawmpui nan, a thenin innghahkhawm nan. Thlan In kha tawng thei ngat se chuan a ka hup chak an tam ngawt ang.
Thelret huan leh sekhupthur
A huho deuhin a rukin thelret sawk turin kan lut ru a, thosi tam dan chu namenlo tak a ni thin. Theiria a rah lai a nih chuan a tla kan chhara kan eisen huam thin. Thelret kha a saksi a, nilenga kan thial pawhin a nem thei si lo, nem thlap thial nuam tak ni tur khan ni engzat nge kan thial thin pawh ka hre tawh lo, a chang chuan tuilumah te kan chiah thin.
Thelret huan kawr kamah hian sekhupthur a awm thin a, a thur tui thei vawt vawt hle. Kawrpuiah hian silaimu kan chhar zeuh zeuh a, a fing deuhin thi-ah siamin intithei fein an awrh thin.
Pamchung Veng, Thlanmual mawng (Tlabirh) leh Pu J-a Veng
Pu J-a veng, Pamchung Veng leh tlabirh tih vel kha veng thler sawi dan pakhat a ni a. Pu J-a veng leh thlanmual mawng (Tlabirh) lama miten Vanapa section lama mipa naupangte kha ‘Pamchung Veng’ an tih khum vaih chuan insual a ngai deuh ziah. Leimin veng an tih erawh chuan inmelh rumin a inthathen theih.
Pamchung veng lamin tlabirh an tih vaih chuan hnek nghal dawt a ni mai a, thlanmual mawngho tih erawh chuan inmelhrum deuh hlekin a inthathen theih bawk. Pu J-a veng lam hian veng hmingah huatthu an nei lo, theihai erawh an nei thei hle.
Tuna Hruaia (VL) pate in bawr vel khu Theihai huan an ti thin thanin ka hria. Khu lai khu hmang thiam fe fe pawh an tam ta ve ang, keini veng lu lam chuan kan hriatpui ve chiah lo nachungin rinna chak vak lo tan pawh nula leh tlangvalin chawlhni tlaia len vel nan an hmang ngei ang tih hi rinhleh theih a ni lo ti raw, RT. Ruahsur cherh cherh hnuaiah rizai sin thanin ngaihtuah chhunzawm ila a fiah zawk awm a sin.