"Thisen hlu, Thisen hlu, Thing Kraws chunga luang khan, Sual lakah min tlanin, Misual thiam min chantir" tia Biak In lamtuala leng lo khawpa kan tuipui "Thisen Hlu" ngei mai kha mi dangte nun chhan nan a lo hluin a lo pawimawh reng a ni tih hi kan ngaihtuah ngai em aw?
Kan thlahtu bulte bawhchhiat lai a\anga tun hun thleng hian, changkanna leh hmasawnna hrang hrangin khawvel hi a tuam a. Hringchar (Silchar) thlang lamah mihring an lo awm reng a ni tih pawh hre ngai lo Mizote paw'n khawvel letliama Miss Universe an thlanglai chu mahni in chhung lum a\angin chil thli tla lo chauhin kan lo thlir ve thei ta reng mai. Thiamna a sang zel a, mihring taksa chungah ngei pawh Pathian min din dan aia thui hretin thiamna hmangin damna mai piah lamah pianhmang mawinate insiam chawp thei tawh mah ila, nunna atana thisen kan mamawhna chu a bo thei chuang si lo chu a nih hi. (Deut 12:23, Lev 17:11)
Pathianin mihringte hnena finna leh remhriatna a pek hmangin, damlo thi mai turte chu thisen pek vanga damna an chan theih dante zir chhuah leh hman \angkai a lo ni leh ta zel mai. Mizote hi hnam huaisen, tlawmngai leh "Thian chhan thih ngam" tiin kan inchhal \hin. A dikna chen pawh a awm ang. Chu kan Mizo nihna chu mi dangte nun chhan nana Thisen kan pek hian a tilang chiang lehzual awm e.
Kan hnam hnufual em avangin he lam kawngah hian kan \hangharh tlai hle, hriatna kan nei chau hle bawk. Kum 1974 vel a\angin Mizoramah thisen pek hi kan hmelhriat ve \an chauh va. Chumi hnuah, tun hun thleng pawhin, a \angkaina hriat tawk loh vang leh zirtirna dik lo vangin thisen pek tulna leh pawimawhna la hre lo Mizo \halaite zingah engemawzat kan la awm tlat mai hi a pawi khawp mai. Dr Jame Blundell (British Doctor) chuan kum 1818 khan thisen pek (mihring bikah chuan) hi nun chhan nan hlawhtling takin a lo nei daih tawh.
Thisen pek dan hi chi thum a awm: 1) Professional Donation (thisen hralh leh lei)- hei hi Supreme Court-in a khap bur. 2) Replacement Donation (tu emaw tan bika pek)-hei hi a \ha viau. Mi mamawhlai taka \anpui theihna a ni a, tih zel tur pawh a ni. Mahse mamawh laia petu tur hmuh loh palh chuan damlo tan chhiatna tawpkhawk thleng thei a ni ve thung. 3) Voluntary Donation (mahni duh thu liau liau, tihluihna tel lo) - Hei hi kan sawi tum ber leh YMA leh Kristian-te tihtur awm tak chu a ni. Voluntary-a thisen pek chu eng nge a \hat bikna? 1) Blood Bank-ah thisen test sa diam, emergency-a hman mai tur a khawlkhawm theih phah. 2) Thisen petu nei ve lote'n an hmang \hin. 3) Blood Group mamawh ang petu tur an awm lohvin a thleng theih. 4) Damlo chhungte tan thisen petute hnenah lawmthu sawi nan engmah senso a ngai ve lo. 5) Zanlaiah te (emergency-in) in kohkhawm chuk chuk a ngai ve lo. 6) Hetianga petu an tam chuan thisen petu tur inzawn buai a ngai lo. Voluntary-a thisen petu chuan a let leh phut miah lo leh beisei miah loin mi dangte tana malsawmna ni turin a inpe tihna a ni a, Lal Isua zirtirna nen pawh a inmil viau a ni (Luka 6:34).
Mizo Kristian \halai ni ve si, mahni Blood Group hriat loh te, thisen pek ngam loh te, pek nachang hriat loh te, thisen pe ngai lo nih te, pek tulna pawh hre lo nih te hi a Pathian Thu lo tih i hre thar ang u. Kan rin kan Pathian hi Tidamtu, |anpuitu a ni tlat. Hriselna dinhmun leh taksain a zir loh vanga pek ve duh ngawih ngawih, pe ve thei lo chu a wm theih tehmeuh mai. Hetiang mite tan pawh hian Blood Donation Movement-ah thahnemngai takin hun leh thlantui sengin \an a lak theih tih erawh hriat a \ha awm e.
Zirtirna dik lo leh hriatchian tawk loh vanga thisen pek hreh tlat te, taksain a tuar dawn tlata hriate kan la awm hi a pawi khawp mai. Thisen petu turte hriselna hi mithiam (Doctor) te'n an endik hmasa vek zel a, chuta \ang chuan a pe thei turte chauh an pektir \hin tih hriat tur. Chuvangin "buan hmaa kherh" nghal ngawt loin kan pek theih leh theih loh tal chu i enchhin ngam ang u. Kan lo pe thei ta lo a nih chuan kan taksa \hat tawk lohna tal kan hriat phah ang a, inenkawl zui dan tur hre turin Doctor pan nachangte pawh hre zui leh ta zel ila, kan hlawkpui tho lo'ng maw?
June ni 14,2004 khan a vawi khatna atan Johannesburg-ah World Blood Donor Day hman a ni a, tunah chuan khawvel ram hrang 80 laiin he ni hi an hmang ta \hin a ni. He ni June ni 14 hi World Blood Donor Day atana thlangtute chu- The International Federation of Red Cross, Red Crescent Societies, the International Federation of Blood Donor Organizations leh The International Society of Blood Transfusion-te an ni a, anni pathum hi World Health Organization (WHO) hnuai a mite an ni. World Blood Donor Day pual hian thupui (theme) thlan bik neih thin a ni a, kum 2012 khan "Every Blood Donor is a Hero" tih chu thupui atan thlan a ni, he thupui hian Thisen Petute ropuizia a tarlang chiang hle awm e.
Mihring puitling (mi hrisel pangngai) ah hian thisen 4000-6000ml (4-6litres) vel a awm tlangpui a, chuta tanga 300ml vel chauh lakchhuah hi hriselna atan a pawi lo. Darkar 24 chhungin a tam lamah ngai a awh leh thei. Tin, Hb pawh hi thla khat chhungin a pangngai leh \hin. Chuvangin, mipa tan chuan thla 3 danah a pek ziah theih, hmeichhe tan erawh chuan thla 4 danah ni thei se tih hi mithiamte thurawn a ni. Kan thisena RBC hi englai pawha kehchhia leh insiam thar reng a a ni a, ni 120 bak a dam thei chuang lo, chuvangin thisen kan pek loh paw'n a keh chhe tho zel tih hriat a \ha awm e. Hetiang hi kan taksa dinhmun a nih avangin Pathian min din danah pawh hian keimahni tana hlauhawm miah lova mi dang tana malsawmna ni thei tura din hi kan lo ni reng lo maw? Pathian remruatna hi chu ava thukin ava ropui tak em!
Thisen pek tumte tana hriat tur tlemte chauh lo tarlang leh ila: 1) Pek hma chiah zanah mut \hat tur, mut tam tur. 2) Ril\am laiin pek loh tur. Thil ei \hat a, tuiril lam in tam tur. 3) Ruihhlo (Zu, meizial, kuhva etc) te tih loh tur. Thisen pek zawhah chuan: 1) Tuiril lam in tam tur 2) Thisen pek zawh a\anga darkar chanve chhung tal meizuk insum tur. 2) Chaw ei leh hma zawng zu in loh tur. 3) Pek a\anga darkar 24 ral hma chuan hna rim lutuk leh insawizawina hahthlak lutukte tih loh hram tur. 4) Band-Aid hi darkar 5-6 hnuah chauh phelh tur. 5) Ei leh in tuituah vak hi a \ul kher lo.
Hmuh let beisei vang ni miah lova thisen petute hi an hlu a, ngaihsan nachang hriat pawh a \ha. Pathian thu hi a takin an nunpui tlat a tih loh theih loh. Chhandamtu ni em si lovah chuan fak phu pawl tak an ni. "Damlo mangangte'n i thisen pek hun nghakhlel takin an lo thlir reng asin! Vawi khat mai ni lo, vawi 10, 20, 50, 100 thlenga thisen pe turin i rilru siam rawh le"