Mizoten Thaibawih kan tih, Sapin Henpeck an tih, Vaiin Joru Ka Gulam an tih, Kawlin nupui hlau an tih ve mai hi nupui te’n an duh duha an kawh kawi theih leh an thu hnuaia an dah theih pa ber sawina a nih chu kan hre tlang vek awm e. Ma’rawhchu, eng vanga Thaibawih nge an nih tih erawh Thaibawih lo leh a Thaibawih ate ngei pawhin an ngaihtuah zui ngai vak awm lo ve.
Thaibawih an awm chhan kawng hrang hrangte chu, (1) Nu zawk mi hausa fanu a nih vang emaw, an nupa leh an chhungkuain hmeichhe chhungte an pur chamchi vang, (2) Pa aia nuin sum leh pai a lak luh theih zawka kawng engkima a zei zawk leh chhungkaw mawhphurhna latu zawk a nih vang, (3) Nu ber chu chhungkuaa lal ber leh thu nei ber nih thlahlel mi a nih ve hrim hrim vang leh nu nasa tak a nih vang, (4) Pasal te lu bera neih loh leh zah thiam loh hi mahni mawng inhlimna mai a nih bakah chhungkaw lungrualna leh zahawmna tichingpen vek thei a ni tih an hriat loh vang, (5) Pa ber chu mi tawng tam lo leh zaidam, mi thu ngaichang thei mi a nih vangte a ni ber thin a ni.
Thufing pakhatin ‘Pa hlawhtling zawng zawng phenah thurawn petu hmeichhia an awm ziah thin’ a tih hi a dik vek kher lo a nih pawhin a dik tlangpui thin a. Nu fing leh felte chuan an pasalte hmalakna kawng hrang hrangah ngaih dan tha leh fing an lo thawh ve mai bakah anmahni ngeiin hma an lak vena avangtein an chhungkua a lo changkangin an khawsak a nawm phah a. Pa ber chu tling lo leh kaihhruai ngai zawk pawh ni se, hmuhsit nan leh inlulin nan an hman phah kher ngai lo va, hmingthatna chu an pasal te an khumtir hlauh thin. Nu fing chuan hmingthat leh lansarh tum kher mah suh se, an felna chu tu’n an hai ngai lo va, fak leh ngaihsan an hlawh phah hlauh thin.
Hla phuah thiam Patea (Thavela tih anga lam) fapa, Thaibawih an tih fo thin chuan, ‘Mipa tan nupui te ngam loh tak tak thu a awm lo. Tuk tha, ni tha hmuh kan duh avangin ngawih kan chuh mai mai thin a lawm.’ a ti a ni awm e. Pa pakhat paw’n, ‘ Ka nupui ngam tur chuan tualthah ngam a ngai a sin’ a ti e an ti bawk. Heta tanga chiang taka lo lang ta chu, Thaibawih kan tihte hian an nupuite an hlau hrim hrim bik a ni lo va, an nupuite chu mahni thuduh leh luhlul, ancheh leh mawihawih dawn nachang hre lo, ka chauhva ‘Hmeichhe lu chu mipa a ni.’ tih ching mi an ni thin tih hi a ni.
Hmeichhiaten an cheng an man phawt chuan mipate hi bawng pachal hnarhrui thil ang maiin an duhna lam lamah lungawi taka an hnuh kawi theih an ni deuh vek a. Tawngtheihna, tihluihna leh chungtlaknaa hneh an tum erawh chuan an duhnate tihlawhtling lui thei pawh ni se, anmahni chiah an lungawi a. Nupa lungrualna leh hlimna erawh a chingpen zo va, pa ber thinlung chu pheikhawka lung te bun hnan ang hrimin a titohvin a khawhar ru reng thei thin a. Nu ber leh an chhungkua pawh miin an hmuh hniam phahin an nuihzat ru thin tih hi hmeichhe lungmawlte hriatthiam phak ngai loh a ni fan a. Tin, an pasal te Thaibawih an ni tih hi an pawm theih ngai loh a ni kumkhua bawk.
Hmeichhiate zia hi a mak dangdai ve hrim hrim a. Mi hausate ina mo nia lawi lut thenkhat chuan ka theih tak emaw tiin an thenrual leh hmelhriat hluite pawh hre tha duh lova hawi pir ta mai an awm fo va. Zaikhawmnaa hleihluak taka lam leh ninawm khawpa Haleluia pek ching te, concert-a zai thiam larte hmuh vanga thidanga an zawn chhuah vu vu thin te, inkhelhnaa te chel chul thin te hi hmeichhia an ni ziah thin a. Mawihawih dawn lo leh nunphung pangngai ramri pel rawka khawsak chin hi hmeichhiate zia ve reng reng a ni ti awm ta sela, tu nge hnial fithla thei teh lul ang le!
Nu fingte erawh chuan pa ber duhzawng leh tuizawngte tihlawhtling hmasain an rilru an hminin an hneh hmasa te te a. Pa ber a tihlungawi tawh ber chuan eirawng bawl, thleng sil, chhuat nawh leh nau awm thlengin phur takin an thawk zel tawh mai thin a. Pa ber tiha mawi leh mawi lo erawh an thliar hransak thiam a. An ngaih dan leh duh dana thil kalpui zel chung siin pa ber chu lawm takin an siam thiam a. Pasal te tithangtlawm chuang hauh si lovin nupa inrem, chhungkaw tangrual, mite awh leh entawntlakah an chang hlauh thin a ni.
Kan sawi tak ang khan, Thaibawih awmna chhan bul chu hmeichhe mawl leh ancheh, pasalte aia lansarh leh chungnung zawk nih tum tlat thinte vang a ni zel a. Hmeichhiate hi thuhnuairawlh, inngaitlawm leh Pathiana tih tak tak mi ni vek sela zawng Thaibawih leh Thaibawih tih tawngkam hrim hrim pawh hi an lo piang hauh dawn lo a lo ni!