Mahni in chhung pawh luah lum hman mang lo khawpin, kum pui lingletin, khawtlang tan, in tha leh zung, in thiamna leh finna, theihna zawng zawng sengin, mawng vawm ba ang maiin in chet chhuah leh chu a ngai dawn ta sia le!!!! In va han chhuanawmin, in va han awhawm loh si tak em!! Mi hna hmu tharte chu chhung leh khatte nen chawhluite kilhoin an hna hmuh an lawm thin a ni ngai a, nang erawh chuan lawmpuitu i hmu kher lo ang. Thlan tlin i nih rual rual khan, mawhphurhna sang tak pek i ni tih hriatthiampuitu che chuan an lawmpui kher lo che a nih pawhin mak ti suh. I mawhphurhna, i kova tla hi a rit em a ni. I nupui fanaute phei chu an lungawi vak lo hial mai thei a nia. Mahse....Khawtlang Hmangaihtu, Y.M.A.Hruaitu i ni miau va. I hmaa awm apiang i hmachhawn a ngai dawn ta a ni.
A ni reng lah taka, veng thler a zauin, YMA hmalakna pawh a lianin tihtur a tam reng a. Mitthi lumen, Khawhar Ina kal, Thlanlaih, Hnatlang, Committee...... a tam khawp mai. Chu a chhapah, mahni Kohhrana mi tangkai leh a pawimawh ber berte in la ni bawk si. I indaih lo viau dawn a nia. I insemzai thiamte pawh a ngai viau ang. Khawtlang Hmangaihtu, Y.M.A. Hruaitu i nih kha.
Hlawkna tel tur pakhatmah, (sum leh pai zawng phei chuan) awm bawk si lo. Hlawk chu sawi loh, mahni ipte atanga i phawrhte pawh ala tul ang. Mi dangte tan i inpek ralraih te pawh ala ngai dawn. Khawtlang Hmangaihtu, Y.M.A. Hruaitu te tihtur a ni fo si.Chung lama mi khian i thiltih kha a hriatpui che a nia.
“Chuti chu, khaw nge” tiin tan han la sa teh mahla, i hlawh tur chu a ngai reng tho. YMA thiltih nikhuaa i hmel kan hmuh loh a piangin keini member Phunchiara te ho hian kan rel leh hrep thin ang che nga. I lo kal pawhin engvakahmah kan la ngai chuang lo zui. “Hruaitu a ni a, a tihtur reng alawm” tih bak chu Chawimawina NOPUI hlan tur che kan la nei miah lo leh nghal.
Khawtlang thatna tur leh hmasawnna a nih chuan tiin zan khaw tairek thlenga i thawh leh i vahchhuah pawh a la tul dawn chauh. Keini member Phunchiara te’n inthiam lohna nei miah lova, zanlai au thawm leh Dar Ri Mawi Lo kan muthilh hnan leh mai theih lai hian nang chu, “Chanmari West Veng mipuite hriat tur...” tih rual rualin i mu zui thei tawh miah lo vang. Hruaitu i ni miau va. I awmna section huam chhung a nih ngat phei chuan Eizawnna tlansan thak khawpa i buai pawh a ngai dawn. Office emaw eizawnna lama i thawhpuite mitmeng kawi te pawh i hmu hial mai thei a. Chuvangin. i tuangte pawh han ti chhah deuh la. Hruaitu i nih kha.....
I tihtur, i kova tla ni chiah si lo, i tih ve ngai ziah si, ka huphurhpui em em mai che chu, mi inchhung buaina, mi nufa leh pafa, unau kara inhmuhthiam lohna thlenga ban phar tura an rawn ko leh tur che hi a ni. Mahni inchhung ro pawh rel fel hleih theih loh changte pawh a awm ve lai kara mi fate sual zilh lo ngai leh fo bawk nen. Hei... ha..... Theih tawpa Khawtlang tana sual dova, mi fate awm tha duh lo thu tha i hrilh, i rawn haw lam kha kawngsir atangin keini member Phunchiara te ho hian, i hnung lamah kan nuih zui che tih leh zel hi chu ka hrilh tawh lo mai ang che. I rilrute pawh a na lutuk palh ang. “A fapa/fanu pawh....chuti...khati.....” tiin i chanchin chhelai ber ngaihtuah chhuah phet tumin kan rilru kan lo la seng ve leh ta nghal a. Aw...i dinhmun hi a khirh a ni. Khawtlang Hmangaihtu, Y.M.A. Hruaitu i ni miau sia le.
A tawp berah chuan, keini member Phunchiarate ho thusawi leh kan lo teh vena che hi engah mah ngai duh suh, tih hi kan hrilhru teh ang che. A ruk tak chuan, keini member thatchhe ber berte pawh hian kan ngaisang chein kan zah ru ngawih ngawih che asin. Kan dah san lutuk vang zawk chein kan phut sang che a, kan beiseina che hi a sang ve leh zel zawk a ni. I lakah kan pangchang em mai a, i tel lova, YMA hmalakna a kal tur hi kan ngai ngam lo zawk mai a ni. Theih tawp chhuah la, kal zel rawh. Khawtlang Hmangaihtu, YMA Hruaitu i nih kha. Tin, ka member pui te u, kan mi duh zawng Hruaitu kan thlang chhuak ta bawk a, an hnungzui turin i inpe ang u. Mi fel leh dik ber berte an ni kher lo vang. Mihring ve tho an nia, tihsual chang nei thei, chauh chang leh theih loh chang nei ve thei an ni tih hriain, an dik lohna laia sawisel mai lova, thurawn pe tu nih i tum theuh ang u.
YMA VUL RENG RAWH SE.