Kan thupui hi "Nilai leh Beirual Thupui" ang ema ram leh hnam hnuk khawih phak leh Thlarau nun chawm phak turah kan ngai chiah lo a nih pawhin; kan Pathian mit hmuhah chuan mi rethei chan ai sum leh pai ei ruk hmanga in leh lo ropui tak dintute leh sawhchiar ei ruk vanga thiante riltama siamtute dinhmun hi "Van Lal nau anga a tahna Kalvari-ah chuan an dang chuang dawn emaw ni le"?
Sawhchiar generation-ah hian eng chen nge kan la awm dawn tih hre chiah lo mah ila, tun dinhmunah hian YMA member-te hian sawhchiar ei leh sem chungchangah hian zir tur kan ngah khawp mai. He sawhchiar sem hi 'Zanriah hnuhnung' ang zeta urhsun tur leh 'Mo lawmna ruai' tluk zeta puar leh fanna tham a ni miah lo. Mi tlawmngai, meng rei leh zai hahte pum ruak lutuk, tlem tala a lo chhawk theihnana tamhnem atan chauh a ni tih i hre thar leh ang u.
Kan hruaitute'n beng sika an ngaihtuah hnuin a daih ngei tur nia an hriat an han sawhchiar ta thin a. Hruaitute beisei aia thahnem sawhchiar sem hun thlenga kan lo la meng a nih chuan a lawmawm lamah ngai ila. Chuti ni lova, tute emaw duham leh koham vanga tlawmngaia sawhchiar semtu nulate leh a siamtu tlangval tlawmngaite a daih lo thin erawh hi chuan rilru a ti na deuh thin.
Kan mi hrang kal hmasa, Vanapa te'n ram palailenga theipui hmin pawh mahnia ei hmasa duh lova, thiante an koh khawm laia, mi dang siamsa kan lo ei ru thin hi chu a zia lo lam hret lo maw? 'Sem sem dam dam, ei bil thi thi' nunze mawi tak leh tunlaia kan thalai thenkhatte nundan hi chu a va han inpersan ta em! Sawhchiar thleng hnih eia puar taka i pum i zut i zut lai khan a siamtute leh a semtu nulate chuan a tlem tawh avanga ei bik nih duh lovin tlawmngai takin an inhnawn kual ve thin asin. Hetianga nula leh tlangval tlawmngaite che vel han hmuh erawh hi chuan rilru a va tihlim thung si em! Mi dangte ei zat leh chan zata kan lungawi ve lo leh puar taka tlaivar kan tum a nih chuan mahni tawka ei tur ken mai kha a la mawi zawk lo maw? Tu ma'n an sawisel ka ring chiah lo.
Mahni chan tawka lungawi lova, mi dangte chan tur lo chheprelh thinte hi kan nula tlawmngai, sawhchiar semtute hian an hre thei viau leh nghal; an hmu nikhua vak ngai lo, zahthlak tak a ni. I sim hmak ang u. Kan chan tur tawk chiah kan chan hian riltam lutuk avang chuan kan chauh phah em loh turah ngai ang. Riltam bik hlauh vang ringawta mahni chan tur aia tam sawhchiar thleng hnih lo la mai duhtute hian retheih hlauh vangin mipui chan ai sum leh pai pawh an ei ru duh mai law'ng maw?
Zoram khawvelin a buaipui ei rukna hian tlawmngaih chhuahna hmun, mitthi lumennaah leh zel hi chuan hmun a chan ve i phal lo vang u. Tlemte chungah pawh kan rinawm zo lo a nih chuan tam tak chunga kan awm hunah rinngam kan va han har dawn tehlul em!Kan Pathian pawh khan ei rukna leh hlemhletna hi a huat em kha maw? Kristian kan nih si chuan kan tih atan a mawi lo tih i hre thar leh ang u. Anania leh Sapphiri te nupa chunga thil thleng rapthlak tak kan hmuh pawh kha ei rukna avang a nih kha. (Tirhkohte 5:1-10). Hnam dang ring lo mite chuan an lo ti duh a nih pawhin a la hriatthiam theih. Mizo tlawmngaihna leh Kristianna atang erawh chuan thil tih thiang lo tawp tlukah a ngaih theih awm e. "Nangmah i inhmangaih angin i vengte i hmangaih tur a ni" (Galatia 5:14) tih ziak a ni si a.
A chunga kan tarlan tak sawhchiar thleng khat lo eirutute aimaha demawm leh mawi lo zawk an la awm cheu. Chung mite chu tute nge ni a? Khawi lam atanga lo kal nge an nih? tiin ka'n inzawt chhin a. Tlangval thenkhat, sawhchiar sem hun hmaa Lumenna hmuna lang miah lova, khawilai emaw a zu leh ruihhlo dangte nena lo interek a, sawhchiar sem dawn chiaha Mitthi in rawn pan thinte hi an lo ni a.Heng mite hi an zahpuiawm leh zual, an tlaivar ngai lo tlangpui lehnghal. Heng mite chetdan en chuan thleng hnih nena tlaivar tumte chu Chawimawi tlak hial an ni zawk awm e. Engpawh chu nise, a eiru duh chuan lo eiru zel rawh se, tlawmngaia ei tur chang lo ngam zawkte hian ngaihsan an hlawh zel tho ang.