- Dinga ‘T’
Mizoram Presbyterian Kohhran Inkhawmpui lian ber dawttu Presbytery inkhawmpui hman zawh taka thurel hrang hrang zingah Zu leh Ruih theih thil dang do kawngah nasa zawka tanlaka a tul anga YMA thawhpui dan synod-in ngaihtuah se, tihte pawh a tel a ni a. YMA Ceneral Conference lo awm tur Agenda-ah hian Kum puan tur rawtna hrang hrang zingah ‘Ruihhlo do’ tih pawh a tel ve leh bawk a.Marawhchu kan hriat angin thu a kal lut ta lo nge thlan tur pahnih zinga pakhat zawk Ram leh hnam humhalh tih chu kumpuan ah neih a ni ta zawk a ni.
YMA-in Ruihhlo do kum an puang tawh a, Zu leh ruih theih thil dang dangte a tawmimin a zalen lo hle a, man leh thubuai siamsak pawh tamtak an awm a. Chu tih laiin a dotute lam atangin eng emaw chet hleihluakna leh nunna hial inlaksaknate a awm bawk a. YMA-in ruihhlo do kum puana a han neih loh chuan ruihtheih thil chi hrang hrangte chu a rawn pawng leh ta tial tial tih hi hai rual a ni lo. YMA Ruihhlo do kha sawiselna leh fakna pawh atam hle a, chu tiang karah chuan YMA chuan an kum puan a nih angin an kal hmiah hmiah a. Sawiselna leh demna hrang hrang pawh an tuar nasa hle a ni.
Hmasawnna leh thil tha lo inher chhuak tur hian dem leh sawisel hi a hlawh duh khawp mai. Hei hi chu Khawvel huapa thil thleng a ni a, keini ramah pawh a thleng ve thin a, a lo la thleng zel ang. Ruihhlo do pawh thil tul leh pawimawh, khawvel pawhin a kalpui lai reng a ni a. A tuar nasa apiang tan do nat leh insenso pawh a ngai thin a ni. Keini pawh a tuar nasatuah kan tang a, a do tura tha thawh nasat leh insemso pawh huam lehzual turte zinga mi kan ni. Tunah chuan Kohhran inkhawmpui hial pawhin Agenda-ah neihin an passed tawh a, YMA leh Kohhran thawhho dan turte thlengin ngaihtuahna a awm mek a ni.
Beihpui thlak tur hi chuan thawhhona tha hi thil pawimawh tak a ni reng a. Thawhhona tha a awm loh chuan ruahhmanna tha tak pawh hi tih puitlin lohvin a awm fo thin. Tunah hian YMA hian Ruihhlo do kum hi a puang leh dawn nge thil dang a puang dawn tih kan hre lo va, khawmpui thu thu a ni a. A enga pawh hi kum puanah neiha, a hlawhtlinna atana pawimawh tur chu thawhhona tha tho a ni. Kan ram dinhmun kil hrang hrang atanga thlirin ruihhlo-in min tihchhiat nasat dan leh min tihbuai nasat dan hi kan hre theuh a. sawi thui a ngai lo. Sorkar chakna te leh pawlho chakna hrang hranga ruihhlo kan dona kawnga hlawk ber nia lang chu Kum puan kha niin a lang. Thil dangah pawh kum puan hi kan uarin sawt pawh kan sawtpui em em thin a. Heng aia hlawk lehzuala kum puan hi hman tangkai lehzual theih dante pawh a awmin alang a. Ram pum huap thila inzirtirna ngai leh nawr kan duh ang chiah hi chuan pawl hrang hrangte hi tangrual zel ila. Kuminah YMA-in khawmpuia ruihhlo do kum apuan tak loh ah chuan KTP/TKP-te, MHIP, MUP, MZP leh kum puang thin dang zawng zawngte hi chuan kum puan dang nei lovin, ‘Ruihhlo do kum’-ah puang ta vek sela, kil hrang hrang atanga kan hmalakna chuan awmzia a nei lehzual ngeiin a rinawm. Kum puan chungchanga Co-ordination Committee fel takte pawh siamin kum dang zel atana kumpuan hmanga thawhhona turte pawh a ngaihtuah zel theih dawn a ni.
Ruihhlo do kum hi puanglo pawh ni ila, ruihhlo do hi kan thlahthlam thei lo, kan hma lawkah hunpui a lo inher chhuak leh dawn. Kan do loh chuan a tlawm zawkah kan tang ngei ngei dawn a ni. Chuvangin ruihhlo do hi kan tih ngei ngei tur a ni. Ruihhlo kan tihin a huam tur chinte pawh bithliah fel taka siam a pawimawh ang. Khaw hrang hrang leh veng hrang hrang ruihhlo huam chin a in an loh zung chuan eng emaw ho te vangin thawhhona a chhe thei a ni. Kum kan puang emaw puang lo emaw ruihhlo do tur hian Mizo mipuite hi eng lai pawha kan in peih a, kan inhuam a, kan chet chhuah hi a ngai a ni.