Mizote nunah hian mimal emaw chhungkua emaw chunga roreltu pawimawh deuh deuh hlawm thumin ; kan thlan lal Lagislator te, kohhran te, NGO tih tein a then theih. Rampum huap atangin veng/khuaah hetiang hian a then tet leh theih bawk.
Mipuite chunga rorel theia awm te hian Rom 13:1 ‘Mi tin an chunga roreltute thu thuin awm rawh se. Pathian thu lovin tumah roreltu an awm si lo; roreltua awmte hi Pathian ruat an ni.’ tih chang hi roreltuten a rorel a fel tawk loh emaw a that tawk loh emaw a an relsakte an lungawi lohvin he chang hi kulhbingah hman a tum phet thin. Amosa 5:24 ‘Nimahsela rorêlna dik chu lui angin luang sela, felna chu luipui kang ngai lo angin luang rawh se.’ tih thu erawh hi chu an chham chhuak duh lutuk lo thung.
Mipui chunga roreltute tan hian mipui zawng zawng duhdan leh pawm vek theih tur rorel hi thil harsa tak a ni tih a chiang a. Mi rorel tawh ngaihtuah chiang hmasa lova sawisel chi mihring hi an awm ve hrim hrim bawk. Chutiang mihring an awm mek lai chuan mi rorel a chhiat leh that ngaihtuah peih miah lo mihring an awm ve tho a. Mi rorel sa chik taka ngaihtuah zui peih an awm tho bawk.
Roreltute tan a hriat tur pawimawh tak chu an rorelsak mipui tam zawkin an rorel an hlawkpui dawn em? tha an ti tlang em? an hmin tlang em? tih ngaihtuah tel hi a ni. Hetiang ngaihtuah tel ran hi chuan chhungkaw bil emaw mahni hamthatna tur emaw a ngaihtuahin a rel theih loh. ‘Mipui that tlanna tur leh lungrual tlanna tura rorel hi rorelna dik a ni,’ an ti thin a, chuti a nih chuan rorel dik dan chu thiam awl tak a ni ang
Bible-ah ‘Roreltu chuan taima takin rel rawh se’ tih kan hmu a. He chang hi Kristian roreltute tan chuan chhinchhiah tlat tur a ni. Kohhran emaw NGO emaw Sawrkar a ni emaw an rorel mipuiin kan han thlir vang vanga taima taka rel ni lo, tih liam puat, a hma kum emaw a tih thin dan emaw zul zuia rorel hi a awm leh thin. Rorel phuailuai, siamthat ngai leh nghal vat tur a rel chhuah te hi roreltute thatchhiat vang a awm a ni thin. Roreltu chuan a relsak mipui an tam zawh poh leh a rel taima tur a ni a, a rel thatchhia a nih chuan a ruattu Pathian a a zah lo tihna a ni ang.
Rorelna mipui tana tha lo taka lek kawh thin tun hnai lawk a mi Dictator Idi Amin etc, Kohhran hmasa siamthat lai (Martin Luther-a te hun), French Revolution te, Indopui pahnihna te, hmanni lawka Iraq War te kha chhui kir ta ila Roreltute rel dik loh vanga khang kha thleng a ni. History hmanga kan ngaihtuah chuan Roreltua awm hi mihring tam zawk hian kan tlin hauh lo tih a chiang a, roreltu tam zawkin an relsak mipuite thusawi engah mah an ngai loh chuan an chunga thil thleng pawh rapthlak thin tih a chiang.
Roreltu ni ila roreltu dik, roreltu zahawm nih hi kan duh deuh vekin a rinawm a. Chutiang nih theihna dan chu chhungkaw inrelbawldan atang hian a chiang ang. Nu leh Pa ten chhungkaw memberte duhsak bik nei lova an enkawl thin ang hian, chhungkaw member ten nu leh pa an zah ang hian awm ta ila roreltu dik roreltu zahawm kan ni thei ang.
Kohhranah a ni emaw YMA a ni emaw Sawrkarah a ni emaw a Committee san dan, a huap zauh dan a zirin a in thu hleih thin a. A hnuai a mi zawkin Committee sang zawk a sawisela, a zah loh te memberin a chunga roreltute thu a awih duh tlat lohte hian A roreltu sang aiin a te lam zawk zel thiam lohna a nasa zawk. Mahni nu leh pate vau a, kutthlak ang mai ni-ah a ngaihtheih.
Pawl hrang hrangte kumthar tirah insiamremin hma lak chhoh a ni leh dawn a, memberte huapzo, memberte that tlanna tur te, Committee sang zawk zahthiam te zirin hmalak zir ila. Committee te zawka awm lai hian Committee sang zawka thut hun a la thleng ang tih ngaihtuah chungin rel ila, mipui, member la nih hun pawh a la thleng dawn tih hriain rorel tum bawk ila kan rorelin mipuite a huap kim ber ang