Ram chhengchhia leh hausakna pai lo ni a an ngaih vang emaw ni, an huaisen tawk loh vang zawk emaw ni a an thlen hmasak loh, tunah lem thirchhe zawng leh permit nei lo chung chung pawh a an awm luih hram hramna ram hi eng ram nge maw a lo nih reng le?
Kawng mam metal dum tle hlurhah rawn tlan sawh dawt dawt mah la, an pawisa sen tam zia hriain, nuam ti deuhin chuang delh delh mai rawh. He ram ropui tak chhungah chuan hetiang kawng bak hi beisei tur a awm lova, tlan liam thuak thuakna tur khawp a kawng te pawh hian a ti buai ve tawh lo, ram vannei chu kan va ni tehlul em!!
Rukruk leh inrawkna lian tham, nunna hial channa pawh lo thleng fo mah se mak tiin kan meng phawk tawh lo. Hel pawlte chuan buaina siamin che fo thin mahse peace bonus dawnna daltu atan kan phal lova, remna leh muanna ram kan ni kan tih a bang lova, ram vannei chu kan va ni tehlul em!!
India rama kan state pui thenkhatten electric current an neih loh zeuh avanga an buaina te kan hre theuhin a rinawm. Ram vanneiah hi chuan a dan pangngaia a han thim leh pawh hian ‘a thim leh ta’ kan ti a, mombati kan chhi mai a, ang fiam peih deuhin ‘mombati sawrkar’ an han ti ang lawng lawng ang a, a tawk a ni leh der mai a, kan khawsak a tibuai pha tak tak lova, a ti khaihlak ve pha tak tak lo, ram vannei chu kan va han ni tehlul em!!
Ruahtui hul mang lohna ramah tui tlachhamin kan thu a, thlang lawka tlawng tui pawh pump chhuak tha thei lovin, pipe a puak leh ta pawh rawn ti mahse thil mak vaka kan ngaih lohna ram hi ram vannei chu kan va ni tehlul em!!
Zirtirtute hian hnam siamtu/dintu kan ni tiin an iak an iak thin; mahse, tuna kan ram dinhmun leh kal dan han thlir vang vang hian hetiang a ti ti ngam tur niin kan lang lem lo, mahse kan zak chuang lem hlei lova. Hetiang a tawng vel mai maina ram, tumahin an rawn fiah tak tak ngaih lohna ram kan ni hlauh a, ram vannei kan va han ni tehlul em!!
Mizo nunze mawi leh tlawmngaihna ram thinah hian tumah kan ring tawh lova, tuman min ring tak tak tawh bawk hek lo. Kawr tur tha tak kan nei a, chu chu Kristian Sakhua a ni. Chu kawr chuan ram vannei a mite chu kan inchei a, kan mawi pui hlawm em em a ni. Chuvang chuan ram vanneiah hian i rawn cheng ve dawn anih chuan an kawr ang hian inthuam ve lul suh