- Sawm Sawmi Pu
5. Hming hawhtir: Kan sum duh luatah mawi lo taka sum zawnna atana hnamdang hnena kan hming hawhtir hi sim hmak ila. Kan vengchhungah ngei pawh an la awm tih YMA hian a hria a ni.
6. Hnamdang Pasala neih loh: Amah Central YMA President kalchhuak ta Pu Chunga’n ‘Kan nulate chhul atangin mizo naute ngei piang se’ a tih angin, hnamdang pasalah neih loh tur. Kan fanuten mizo tlangval ngei an thlan zawk theih nan nu leh pate pawhin tan i la zel ang u. Hnamdang pasal an neih hian kan mizo-na chawplehchilhin a bo nghal a ni tih i hria ang u.
7. Fa neih tlem (Birth control): Tlem hi in chimralna kawng awlsam tak a ni a. chi thlaha leilung luah khat tura thupek kan nih angin, chhungkuain a tlin chhung chu fa neih tamah hian tan i la ang u.
8. LSC dahkhama loan lak: kan intunnunna leh hmasawnna rahbi atan loan lak chu a tha e. Mahse, mi tam zawkah a nihna angin kan hmang lo tlangpui a, a tawpah kan thatpui tura kan ngaih hian chhiatna ah min hnuk lut fo thin. Hei vang hian sorkar hriatpui loh Bank atanga kan LSC dahkhama loan lak loh a him. Tunah hian hetiang avang hian hnamdang kutah kan ram hlu tak te a lut mek a ni tih thil chik miten an sawi ta sep sep mai. A dik ngeiin a rinawm.
9. Hnamdang hlawhfa a chhawr: Kan ramin hma a sawn rualin mimal leh chhungkuain hma kan sawn zelnain, a hrin chhuah Zoram buai hmaa kan hriat phak vak loh, industry tenau leh kan in leh lo sakna hmanruate a lo danglam tak avangin hnamdang rawih kan ngai ta hi a lawmawm a. Amaherawhchu, kan hlawhfa (hnamdang) kan lakluh dan hi a felhlelin kan fimkhur lo takzet a ni. Tupuirala mingo valte’n min kalsan dawn khan hnam tlem leh hriatna zau lo kan nih te hre rengin, chimrala kan awmlohna turin North Eastern Frontier Regulation Act hnuaiah Inner Line Permit (ILP) min lo siamsak hi keini mizote tan a va hlu tak em! He dan tha tak zawm lova keini zofate ngeiin kan hna thawktu tur kan lakluh dan hi a pawi takzet a ni. Kan hmasawnna avanga hnamdang kan lalut a nih pawhin ILP dan hi hnamdangin min chinral lohna atana kan hmanraw neih that ber a ni tih hre mawlh ila, dik takin i hmang ang u.
Tunah phei chuan he ILP dan hi hlih a nih theih nan kan chhehvela vai ho hian ngawrh takin hma an la mek a, an hlawhtlin hma chuan hma an la reng dawn a ni tih i hria ang u. Hei hi thiah a nih vaih chuan chimral kan nih loh nana a man kan pek tur chu a sang viau ang le! Central YMA kaihhruainaa ni 24.4.2013 zana ILP check runpui neih a nih khan veng dang chu sawiloh, kan vengah pawh hnamdang sawmhnih khat lek nei tura kan in ngaih laiin, za chuang kan lo khawi reng mai te hian ngaihtuahna a va ti thui em!
10. Pem Lehkha: YMA-in Pem Lehkha fimkhur taka a kalpui hi chhawm nung zelin, rawn pemlut tharte, section a bial neitute finfiah bakah Section/Branch- te’n uluk takin finfiah zel a va tha em. Hetih rual hian rawn pem tharte hian YMA-ah chauh kan khawtlanga awm phalna lehkha hi an rawn keng a ni lo, Local Council/ VC leh Kohhranah an rawn dil ve bawk. Local Council leh Kohhran kan sawi nepna ni loin, anni hi chuan ‘in dil chu hmu tawhah inngai rawh u’ ti ang deuhah an in ngai em ni aw ka ti thin. YMA fimkhur tluka kan fimkhur thei lo a nih pawhin, a fimkhur peihte hmalakna ngaichang hram hram se tih hi hun rei tak atang khan ka rilru luahtu a ni fo thin.