Pa ber emaw, nu ber emaw, chhungkaw ei bel mi dang tu emawin sum thianghlim lo hmanga chhungkua a relbawl chuan amah emaw, a fate emaw, a chhungte emaw chu sualah a hralh tihna a ni a, sual chu ram leh khawtlangin a huat ber a ni a, ram leh hnam humhalh lohna bul\hut a ni bawk.
Eiruk hian ram leh hnam a humhalh lo mai ni lovin, chi \ha lo tam tak a hring chhuak \euh \hin. Khawvela ram awhawm lo leh buai nasa, tharum hmanga inbeihna leh ruihhlo hluarna, ram ralmuang lo kan tihte hi eiruk nasatna ram a ni deuh zel a, eiruk hian rah \ha pakhat mah a chhuah lo.
Bible-ah chuan "sum ngainat hi sual tinreng bul a ni" tih kan hmu a, hetiang taka sualna bulpui thil dang hriat tur a tam lo. Sum avanga patling emaw nutling emaw a at tawh chuan ram leh hnam a humhalh lo tih sawi lan kher a ngai hran lo. A sahmim tihpuarna chiah ngaihtuahin nawmsak leh ropuina thlira sum chu Pathian anga a biak tawh chuan amah leh a chhungkua ngei pawh sualah thuk takin a hnuk lut \hin.
Mihring inthlah chhawng leh chhuan inchherchhuan chhoh dan hi thlir ila, mi hlemhle reng reng hmuingil an awm ngai lo. Thlemna do zo lova eiru \hinte hian hmai phih tumin kohhran leh khawtlang bakah, \anpui ngaite tan an sum theh chhuak \hin mah se, sual tipunluntu mai an ni a, an chungah meiling an chhek tam ting a, mi dang a kangkai zel bawk nen hlauhawm tak a ni ringawt.
Kristiante Pathian phei chu mihringte sualna avanga phuba lak hmaih ngai lo a ni a, ka eiruk rualin kei mah mai ni lovin setana hnenah ka fapa emaw ka fanu emaw ka eng emaw ber ka pe a ni deuh ber a, chu chu pawisa lova kan eiru zel a nih chuan tuar tura kan inpeih a \ul tihna a ni.
Sorkar leh khawtlang phal loh hmanga sum hui \euh \euh a, ruihhlo hmanga sumdawngte hian an thlarau chunga roreltu an chhaih kawlh tih pawh hriat a \ha hle. Tuin emaw a dam chhung atan nawmsak a duh avanga dik lo taka sum a lak luh hian nghawng a nei thui thei em em a, chhuan tam taka a thlahte thlengin sualna kawngah a hruai lawk daih tawh.
Thlahtu bul chhuitu pakhat chuan a hun laia zahawm taka nun hmang a, Pathian tana rinawm taka rawngbawl tlat \hin leh a hun lai veka zu zuara intihausa, suma rinawm lo khaikhinin an thlahte a chhui zui a, kum 100 chuang chhunga an thlah kal zelte a bihchiang.
A hun laia sum leh paia ropuina nei lo, a nun rinawmna avanga mite zah em em \halbe a\ang chuan ram tana mi chenfakawm leh \angkai tak tak leh rawngbawltu eng emaw zat an chhuak. Zu zuar \hin thlah kal zelte chu suahsualna avanga thi, ruihhloa buai, ram leh khawtlang tibuaitu, khawtlangin a mamawh miah loh mihring eng emaw zat bakah, tualthi ta mai mai an awm nawk niin an tarlang.
Kan khawtlangah hian rinawm lo, suma lei theih, mahni zahawmna pawh zah zo lova sum awmna pan ruak ruak, eiru leh dik lo taka sum la lut kan pun zel chuan ram leh hnam humhalh tumin infuih vak vak mah ila, mi lawilo kan pung tual tual dawn.
Europe-a Scandinavian ram tia an sawi thin Norway, Denmark velah khuan eirukna a awm ve ngai lo tluka ngaih a ni a, khawvel ram zinga eiruk tlemna ber an ni ngar ngar \hin. Ram leh hnam humhalh an mamawh lo ni lovin humhalh tura inkar chiam chiam an mamawh hran lo niin a hriat.
Scandinavian ramte hi sualna lakah an fihlim vek lo na a, dan bawhchhiatna lian tham leh sual tawrawt tak tak bakah, indo thu thang emaw inthahna chanchin rapthlak an nei ve ngai mang lo. Sum lak luh kawnga rinawmna chu mihringin a tih turah an ngai a, nun dan phung pangngai a nih avangin thil harsaah an ruat lo va, rinawm lohna avanga hausakna chu nuihzatbur nihna a ni.
Eiruk hi piangsualte tih tur ang thaw thangin an ngai a, thil kalphung pangngai zui mai chu hnathawh dan awlsam ber leh mihring hlutna a nihzia an man hle a ni ngei ang.
Ruihhlo do rem vekin hnam dang nupui pasal innei awm miah lo pawh ni ila, ram leh hnam tana hlauhawm ber eirukna a pung zel a nih chuan ram din chhuahna a hla telh telh tihna a ni tho. Chutiang mi chu Mizo zingah hian an pung chak hle niin an sawi a, kohhran leh rawngbawlnaah pawh timna nei chuang lovin an lut hnem tial tial.
Retheihna hi rinawm lohna bulpui pakhat a ni a, sorkar kalphung fuh lovin mipui rilru a tihchhiat theihzia leh a chawikan nasat \hinzia ngaihtuahin, sorkar hruaitute'n ram leh hnam humhalh loh kawngah mawngphurhna an nei nasa em em.
Intlan dawna $ 500, $ 1000-a lei theihte hi mi khawngaihthlak an ni a, an rinawm lohnaah dem ngawt theih an nih loh chin tam tak a awm. Thingtlang mite leh khawpuia awmte tan pawh hnathawhin awmzia a neih theihna tur khawp sorkar kan mamawh a ni.
Sorkar \ha hnuaiah chawp- lehchilhin mi nawlpui an \ha mai a, an rinawm mai. Khawvel chanchin en hian sorkar \ha nei turin ram tam takah siam\hatna a thleng \hin a, thisen tam tak hmangin sorkar \ha zawk an lei \hin. Rethei an punna hmun apiangah rinawm lo an tam a, mi hlauhawm an \hahnem tial tial bawk.
Miten eirukna leh dik lo taka sum tam tak an lak luh reng lai a, dik taka hnathawh duhin a inchawm zawhna khawp hnathawh tur a neih tawh loh chinah chuan a rilruah sorkar laka helna a intuh nghal a, he chi chhe tak hi a \han len zel chuan ram leh hnam humhalh lohna a thleng \hin.
Hnathawhin awmzia a neihna ramah \awngkaa rinawm tura infuih chiam chiam a \ul lo fo va, hnathawh hlawh late hian an duhkhawp sum an nei a nih chuan eiru leh dik lo taka insiam liante an awt lem lo va, an hmuhsit loh vek pawhin mi pangngai anga en kher an ba hran lo.