Ka nu khan ni khat a pum chhungah khan min han pai leh hram sela chuan YMA DAY leh ka piancham a inrual mai tur. YMA DAY a lo thlen hian eng emaw ti takin rilru-ah hian a thawk a, lung lam lamte pawh a leng deuh roh thei nia. Chanmarians semtu atanga tanin YMA Chhang Committee member kan han ni ve a, a kum leh maia Leader kan han ni chho a, YMA member kan ni chho a, lumen, zualko, mitthi dar vuak, thlan laih, khawhar in riah, hnatlang leh thil tul chi hrang hrangah kan han YMA chho ve zel a, hetianga chanchinbu semtu atanga tana YMA chhoh ve ngar ngar tan chuan YMA DAY hian thinlung a luah lo thei lo va, rilruin ka lenrual lungduh te u,... tih hla kha sak loh theih loh a ni.
Khawi nge chang khat chauh tal in um zui teh ang aw.
"Ami'n sel lo u, hmingtha lo hlan ve u, chanai tha
Hleite'n a dang lo a thang ri, khua tin mawitu a lo ni;
Chanhai riangvaite puitu, thlafam lusunte hnemtu
Kristian eng chu an lo chhi, duhaisam chu hei ngei hi.
A tlar khatna chauh pawh hi sawi zau tham a tling. Hmanni lawk-ah Saikhumphai leh Vaphai buaina chungchangah YMA chuan thuchhuah a nei a, MZP lamin YMA rorel kalh zawngin hma a la thung a. Mi tam takin YMA an sawisel a, YMA member leh YMA hruaitute hial pawhin an sawisel a. India khua leh tui kan ni a, kan duh duh sawi turin zalenna kan nei a ni.
Amaherawhchu, member kan nih vena pawlin hmalak dan tur an duan kan sawisel dawn a nih chuan an rorel thuchhuak hi a chepakai atanga kan ngaihtuah hmasak phawt thin a pawimawh hle. Mizoram hmun hrang hrangah vanduaina rapthlak tak tak a thleng fo va, vanduaina tawk tanpui kawngah YMA-in engtin nge hma a lak thin tih chu YMA member leh hruaitu chuan hrilh nawn leh kher ngai lovin hre sa tura ngaih kan ni.
YMA-in tanpui nghal loh tha a tih chuan chhan lian tak a awm tihna a ni mai a, a rorel khawlah branch hrang hrang aiawh YMA-a baptisma chan hial duh an ther fup a, chung kan aiawhte thurel member-in lo sawisel vak vak mai kha a finthlak loh hle a ni.
MZP hian vanduaina tawkte tanpui kawngah eng tiangin nge kum 78 chhung khan hma a lo lak ve tawh le ? Tuna taka YMA kalh zawnga an hmanhlel hi engnge a chhan ni ang ? Heng zawhnate hi kan chhang dik thlap thlap theia YMA aia MZP-in tanpui ngai tanpui kawnga hma a lo la tha zawk thin a nih chuan YMA chu sawisel ila MZP chu fak ila a ni mai. YMA kumpuan leh YMA hmalaknate hi a inkawp lo thei lo tih hraitthiamte pawh hi a ngai ve bawk ang. E, tlar khatna chauh pawh sawi tur a va tam em!
Tlarhnihna kanin tlar thumna hi um zui leh teh ang. Tlar hnihna leh tlar thumna sawi zau tur hi chuan kei lo deuh hi ni se an tha ang. Hetiang thuril leh tha lutuk sawi tur hi chuan Branch OB tal lo ni tawh ni thei se duhthusam a ni. He hla tlar hnih hi eng tiangin nge sawi zau se kan tih hlawm le ? Han chhiar vang vang hian a fiah nghal viau mai a, uluk taka han chhiar nawn phei chuan lusun tap thawmte pawh hre thanin kan inhre lo maw ?
Nge, ‘chhantlak ka la awm e’ tia rum ri hre viai viaia inhriain chu thawm lo rikna lamah chuan ‘thlaphang reng reng suh, kha kan lo kal e’ ti chunga hlauhawm pawh ngaihtuah hman lo va chet chhuah i tum zawk ? Nge ni a, inkang thelh tur, leiminin mi in a hnawlna lama phek chhuak tur, chanhai tanpui ngai ngawih ngawih tanpui tura kal chhuah i tum rilru zawk ? Chumai ni lova Mizoram leh hnam chhan a ngaihna kawng chi hrang hranga chhan turin pen chhuah i tum zawk ? Chutiang ti thin YMA-ah chuan i tel a, han ngaihtuah chiang teh. Tanpui ngai tan chuan i va hlu em ! tiin sawi se i ti rilru em ?
Tlar lina hian Bible nena sawikawp a phut deuh tlatin i hre ve em ? Nge, Bible sawi tel hmain kan pi leh pute lung bul hlaua an inthawi lai atanga Krista tana Pasaltha kumpinu khua leh tui Zosaptharate sawi hmasak zet i duh zawk ? A ni tak a sin, kan misionnary sapte khan kan pi leh pute khawsak dan kha chik taka an enin mak an tiin changkang tihna lai an nei a, ‘Mizo te hi hnam changkang tak ni thin an nih loh pawhin hnam changkang tak nen rei tak khawsa ho tawhin eng emaw vangin heti hian bul an tan tha leh a ni ang a, hetianga inrelbawlna tha tak an nei hi a mak a ni’ an ti ve thlawt a sin.
Chu Mizo inrelbawlna tha tak mai ‘Tlawmngaihna leh Kristianna chu YMA hian tham kawpin Mizo tan kum 78 chhung zet mai hma a la chho ta a, Mizote tan chuan ‘duhaisam chu hei ngei hi’ a tih loh theih loh.