Pu Buchhawna Thubuai rem dan hi a mawlin a tawi hle na a, he thubuai remdan hi a ropuiin a entawn tlak em a ka hriat a vangin lo hre nual tawhte awm tawh mah ila, ka veng , Chanmari West a hetiang chanchin pholanna awmchhun, lar leh darh zau ber YMA AW ah hian kan pholang ve ang e.
Pu Buchhawna Thubuai (Civil Case) pakhat rem dan : Chu thubuai (Case) chu Kohima Basti-a mi, Ralleng (Naga) pahnih uite inchuh thubuai a ni. Thubuai neitute chuan “Uite chu ka ta a ni, a hming pawh chutiang khatiang chuan ka phuah a, ka duat em em a, ka nei ngei tur a ni” an ti ve ve tlat mai si. Ui note hming an phuah erawh chu a inang lo.(Ralleng hovin Ui an duh zia leh an ngainat zia chu Pu J.F.Laldailovan ‘German Ral Run’ a ziahna bu page 74, para 32 leh page 75, para 3 kha enla).
R.Buchhawna chuan Ui note chu Dhobasi Circle Inspection (Tawng lettu ti mai ila) chu a pawmtir a, office kawt zawlah hlam za (100) vel a inhlatah a dintir ve ve a, “Uite chu Dhobasi-in leia a dah hunah in ko ve ve ang a uite in a pan zawk zawk chu a neitu dik tak an ni ang” tiin a hrilh lawk a. Tichuan, a bul a ding Dhobasi chu Uite dahthla turin a han hrilh a a dahthlak chuan uite chu leiah a bawk ta a, a neitu inti te chuan an ha ko ve ve a, Uite chu a tho nalh a, dinglama ding zawk pa lamah chuan a tlan ta nal nal mai a, a neitu chu a mei chuan hem velin a ke te a va nawk vel a, chupa chuan nui vur vur chungin a lo pawm a, Pu Buchhawna pawh chuan a neitu dik takah ngaiin a pe ta a ni.
Commemts : He thubuai rem har tak mai tur, Pu Buchhawna’n awlsam et a a rem, dik deuh mai sawiselna tur awm si lo hian Thuthlung Hluia Solomona’n nu pahnih naute inchuh thubuai a rem danzia chiah chiah kha niin a lang a, a ropuiin a remhriatthlak hle.
Khang hunlaia kan thubuai remtute kha an thluak a lo va tha em! A dik bawk si, tunlai zirthiam intite hian kan tluk pha ngut angemaw chule..
Thubelh:
KUM 20 HNU A PENSION HLAWH LA THEI CHAUH!
Bombay, Maharashtra Sorkar chuan Siddarth College zirtirtu, Prof. T.A. Kamata pension chu engemaw thil hote avangin, a pe duh lawk lova, a pension hnuah kum 20 chhung tawp mai sorkar-ah a nawr a. Amah chu kum 82 lai a lo tling hman a, a upa tawh si a, a pension hlawh la hman lova thih mai pawh a hlau hial a ni.
A tawpah chuan Bombay High Court rorelna sangber, Chief Justice, P.D. Desaia hnenah a mangan thu hrilhin a zualko ta chawt mai a ni. He High Court-a thu roreltu pahnihte chuan Prof. T.A. Kamata thu hi an ngaihtuah ta vat a, a pension zawng zawng, a arrear nen lam chuan sorkar chuan thla hnih chhungin a pe ngei tur a ni tiin thuthlukna an siam ta a, thu an pe ta a ni. High Court chuan heng zirtirtu upa tak tak leh hriselna tha tawhlo ten tanpui an ngaihzia theihnghilh lo tur leh pension dan thar hman dawn tep a lo pension hman tawhte pe vek turin thu an pe ta hial zawk a ni. (Source: Bharat Pensionners’ Samaj. Aug. 1992)