Pu Enga leh kei hi chu hming pawhin kan in ko hman mang lova, kan inhmuh chang hian ‘K Section them tlaw bera chu’ tih leh anin ‘Ch Section mihring lo ber’ tih chu kan in biak hmasakna tlangpui a ni thin.
Pu Enga hi a hming alo pu zo hle in ka hria. A mah hi Pa ngo tak leh mi langsar veng vawng leh hmeltha tak pawh a ni hauh lova. An Nu tih loh chu hmeltha ti tu pawh an awm ka ring bawk lo a. A hming dang leh chu Maumual Rambo ani leh nghal a, that vak ngaihna chu a awm lo a ni. Amaherawh chu a tum a ruh a, a rinawm a, a thil tihah a hlawhtling thin a ni.
Hla phuahtu chuan Lal Davida leh Hruaitu Mosia hi Lei Arsi lian an ti a, chutiang bawkin kei chuan Pu Enga hi Chanmari West Arsi lian ka ti ve tlat a ni. Pu Enga fam a chan ni khan khawtlang a thawng hle a, Chanmari West YMA-a a thawhpuite kan ngui hle a ni. Chanmari West YMA Arsi lian a herliam ni meuh chuan a herliamna hmun thlen hmasak tumin an tlan ta zung zung a, tumah thian tha leh unau an inzai hman lova, a tute mahin inbiak buaina hun an nei thei lo ani ber e. Motor remchang changah an tlan liam ta chur chur mai anih kha. A hmun zuk thlen meuh chuan Sairang Khawpui pawh a reh thuap mai zawng anih kha. Tumah engtizia nge ni ta a tia inzawh buai pawh a awm hek lo, mipui lah chu atam amakin an ding ngawi thup mai a ni. Chanmari West Branch YMA hruaitu te leh pawhin pawi anti...... a ni mai lova an thinlung a kehsawm a ni tih hai rual lovin tu hmel hmaiah pawh a lang nghal a ni.
Chumi hnuah Sairang YMA tawp chin nei lova mi tlawmngai ten kuang mawi tak minlo siam sak a.Thlahna hunserh Ropui taka an hman zawh tawh hnuah Motor tam takin a hnung lam leh hmalamah kan zui chhova, a In pui ngeiah arunrem dawhsangah a sakruang chu zalh alo ni a. Tlaivarin mipuiin kan zaipui a, hemi zan hian Chanmari West Branch YMA OB leh a thawhpuite thusawi thei tumah an awm lova, an dem awm love. Chhingmit luaithliin a lehkhalh zel si a, a tawpah khua avar hnuin Branch Vice President Pu Valtea’n lungchhe takin tinna hun a siam thei chauh anih kha.
Pu Enga hi Salvation Army a ni a, an pawlah hian atui lo a ni reng reng lova, Lal Isua duhdan tanpui ngaite tanpui kawngah zau zawka rawng a bawl theih nana thil tam tak angaihtuah avangin an Biakin-ah pawh a lang tlem deuh mai thei a. Amaherawh chu an Kohhran hi buaipui tlat se khawtlangah a lang tlem deuh pawh a ni thei bawk. Chuvangin, Bengsika angaihtuah hnuah Kohhran Pawl Pakhat maia rawngbawl lovin, INDAIDANNA thiattu YMA chu a luhchilh ta a, khawtlang tan theih patawp chhuahin a inhmang thin ta a ni. Tanpui ngaite tanpuiin, Kristian Nundan tha te, hunawl nilo mahni hun pawimawh, chhhungkua tan hunhlu kalsanin, mi chhiat tawh ni khuaah zan lai eng ang pawh nise a kal chhuak a, mite tan a inhmang thin a ni. Chung chu alawm Vengtawp lehlam atanga lehlam kilkhawr thlenga mi hriat a hlawhna leh a enna tak chu. A hming a pu zo hle in ka hria a ni. Miin chhiatna harsatna an tawhin a kal hmasaah atanga, mite angin asirah athu ve mai mai ngai lova, hna hautak ber kuang siamtuah atang hman ziah bawk a ni. Chanmari West mitthi kuang tam tak a siam a, thlan tam tak a lai a, thlan tam tak siamnah a tel ziah bawk thin. Mahse, AMA KUANG ve chu a thian ten kan siam sak ve lo ani. Rilru ana duh hle mai.
tan Branch YMA huntawp hman zan kha i hriat ve ka ring. A thawhpui YMA-te leh khawtlang Nu leh Pa te kan thahnem hlein ka hria, ralna leh thildangah alang a ni. A laiah ka thu a, ka sirah Baptist Upa te, dinglamah UPC engemaw zah, veilamah Salvation, hmalamah Presbyterian leh Kohhran dang dang kan thu kim hlein ka hria. A mah Pu Enga thiltum alanna ropui tak niin ka hre bawk a ni. Zai a nuam a, tui takin Lalpa Pathian fak leh a Kohhrante tana a buatsaih ram ngaiin kan zai mup mup mai a nih kha. Zion Ram inlungrualna tlang a entir berin ka hria.
Awle, tupawh hian kan zinna ram hi kan hawsan dawn a, reilote...... kan cham chhung hian Pu Enga anga tanpui ngaite tanpuia mite tan Samari Mitha nih i tum theuh ang u.