Heti hian Arabian Nights Vol-VIII thuhmahruaiah a letlingtu PL Liandinga chuan kan venga pawl ho ber mai chungchang a ziak a. ‘Thian tha tak tak leh duhawm tak tak, pawisa puka dil hma loh chu thian tha tak, han dil veleh a mi hrang ta hi he khawvelah hian thian engzat tak nei ang i maw! Ngaihtuah tur in hriat loh chang chuan i ngamtlakte zingah tunge mamawh thut thilah pawisa puka i dil ngam, tu hnen atangin nge i dil chhuah ang tih lo ngaihtuah ve mai mai la, i duh chuan, he khawvelah hian tunge i vengte (A bible tawngkam takin) tih i hre thei mah na. Ngawireng pawl nena han inhmuhkhawm te hi chu a nuam ngawt mai. Ngawireng pawl han nih hrim hrim te hi mak danglam ve tak a ni. Mahse, ngawireng pawl e ti lo chuan an inhmukhawm chu bengchheng ve tak an ni. Mizo tawng leh a ziah dante hi a ziaktu lam ngaihtuah reng reng lovin an chai hrep hrep mai a, ropui leh lansarh tum chuang hauh si lo, ngaihdan zalen leh nghet tak mai nei zinga awm chu rinai takin thlarau lamin a ngeihin ka hria.
Ngawireng pawl inhmuhkhawm khatzia te, an inhmuhkhawm pawha mimal hamthatna tur an buaipui lohzia te, intihlar pawh an tum chuan lohzia te leh an thu khel an tih tak takzia te han hmuh a, an boruak han tawn ve chuan mihring nih hi a nuam thar leh thin a. Chu chauh ni lovin mahni hamthatna tur ni kher lo, a bika thil eng emaw buaipui pawl, intheh lar tum chuang si lo han hmuh hian Mizo hnam hi a zahawm sawt thin.
Mahni tuipui lam buaipuia chumi azara sorkar emaw eng pawlah emaw, tu mimal lak atang emawa hamthatna va neih kher tum chuang lo pawl tha tak mai kan mamawhzia hi! Pawl kan din chuan hriat tham nih kan chak nachhan chu sorkar nawr theih nan a ni tlangpui a. Chu lo lehah chuan chuta hruaitu kan nihna hmang chuan han invawrh lara, chuta tanga bawh lam tur melh te kan ching chho ta. Chumi hmu pha chin tan chuan puih kan chakawm tawh lo zo thin.
Chutiang hre ve pha a inngai tan chuan ngawireng pawl, chawlhni tlaia inhmu khawm thin boruak han hip ve te chu tisain a ngeih phian. Ngaihdan nei lo ni awm fahrana J.Nangate thuin ngaihdan awmkhauh zet mai an han vawrh chhuah changte hi chuan a hlimawm zual a. Pu Chawia ten lal hla dap maia thu an han thlep kual a, an han bawl phuan thinte leh U Zorampela ten hmel fai vur mai a, ‘In hre zawk ang a’ an han ti thin te pawh a ngaihnawm khawp. A meizanghlaptu Pathara lah.....” (PL Liandinga hi kum 2004 khan Ngawireng pawl member phur tak ni turin a rawnin pe ve a.)
A chunga PL Liandianga thuziak ka chhiar hian heti zawng hian ka ngaihtuahna a awm. Mizoramah hian pawl a tam hle a, pawl an din tam zawk hi chuan mipui hamthatna tur lam aiin an pawl leh a memberte hamthatna tur lam kawng a zawh tlangpui a. Mizorama Pawl awm zingah chuan YMA hian mipui a huap zoin a zahawm ber a tih ngam a. Chutiang taka pawl ropui a nih avang chuan Mizoram puma pawl lian ber hruaitu nih pawh kawng thenkhatah chhenfakawm tak a lo ni thei a, chu a chhenfakawmna hmu pha chuan chu pawl hruaitu nih chu an inchuh ta a ni ang.
CYMA inthlan-ah te pawh ‘campaign’ tih thawm hriat tur a awm ta hial a, CYMA hruaitu chuan Political party-ah dinhmun sang a luah theih avangin CYMA hruaitu nih chu Politic khelhna rahbi tha tak a ni tih chu mi thenkhatin an hmuin an hria tih chu sawi ngam a ni. CYMA chuan YMA chu pawl thianghlim Political party nena inmihran a nih avangin YMA thianghlim zel nan CYMA OB politics khel duhte tan dan thar a siam a ngai ta hial a ni. Group, Joint leh Branch YMA OB te tan pawh YMA leh Political Party a nihna neih kawp chungchang hi ngaihtuah chian a pawimawh hle, YMA leh Political Party nihna kan kalkawp tir lutuk chuan YMA hian zahawmna a hlauh thei si a.