Ani tih leh a ni tih hi i hre hrang em?
Kan tawng hi kan hmang uluk lo hle a, a chhiara chhiar ai mahin a ziah a ziahin kan tidik lo nasa lehzual. 'Ani' tih leh 'a ni' tih mai pawh hi ziak dik thei lo kan va tam em!
Ka Kid Number 3 Marema
Hmana kid number 3 ni thin Marema chuan 'si’ aiah ‘ci’, ‘awm’ aiah ‘om’, te hi hman a pawi vak lo, a lo ti ve mek a. Ka kid number 1 leh 2 erawh chuan Mizo tawng dik hman pawimawhzia hi kei ai mahin an vei a, ka kid number 3 hi an dem hle thung. Thil lawmawm tak erawh chu Synod in Mizo tawng dik hman a pawimawhzia hriaa hma a la hi a ni.
Pasaltha vrs Pasal tha
'Pasaltha' hi 'Pasal tha' tiin ziak hrang ta ila a awmzia a thuhmun ang em? 'Chanchin' leh 'Chan chin'. ‘Mahse’ leh ‘mah se’ ziah zawm leh zawm lo hian awmze hrang a neih chuan 'Pasaltha' leh 'Pasal tha' hian awmze hrang a nei ve ngei tur a ni ang.
Pasaltha chu Br. YMA OB te
Pasaltha ziah zawm a nih hian kan hmanlai pasalthate panga hming rilru-ah a lo lang a. Kan vengah heng pasaltha pangate aiawh tur hi ka ngaihtuah a, Vanapa leh Pu T. Ngurkhuma, Chawngbawla leh Pu K. Darthantluanga, Taitesena leh Pu R. Lalhmachhuana, Khuangchera leh Pu C. Lalzarliana, Neuva leh Pu RL.Thanhnuna. Kan section leader theuhte leh anmahni section hming theuhte hi inhmeh hlein ka hre bawk.
Pasal tha chu Hruaia (VL)
Pasal tha ziah zawm loh thung hi ka ziah zawh ruala rilrua lo lang hmasa ber chu Pu Vanlalhruaia 'K' Sect.a mi, Pi Manghaki pasal hi a ni tlat pek. (Pu Chhantea Ex-MLA chuan Pu Zotea Chhangte, Pu Ngaihtea leh Pu Matlana-te a mitthla mai thei a. Tv. Ti-a chuan kei hi mi mitthla miah lovang tih ka chiang a, kei ai chuan Pu H. Lalramhluna leh Zotea ‘CWSC ve ve’ te hi a mitthla hmasa hrim hrim ang.)
Pasal tha chu
Pasal tha ziah zawm loh hi Pu Vanlalhruaia (VL) khawsak dan phung atang hian sawifiah tum dawn teh ang. (Pu Rimtuia min hrilh dan a nia.) Hruaia chu zing dar 6:00-ah thoin thingpui a lum zawh hnuah eirawng a bawl zui thin. 6:30-ah naupangho a kaitho a, an home work a tihpui pahin an uniform a nawh mamsak. Tukthuan ei hma deuh in mut hmunah a nupui thingpui a va pe a, a lo let leh hnuah naupang tiffin pai tur a siam a, chumi hnuah tukthuan an kil. Tukthuan ei khamah naupang ho sikul kal tur a siam a, nu berin chaw a eikham ve leh kamthuahna tur tui a pe a, kuhva a barh zui nghal ziah.
Naupangho sikul kal tur a hruai leh a, a haw pahin a nupui chhun thingpui hmeh tur a lei hawsak nghal lo thei lo va, in a thlen ve leh office kal turin amahin a insiam thuai thuai.
Tlaiah an fate sikul bang a hruai haw leh a, offiice-ah a let leh a la ngai zui. Office ban hnuah a nupui ziah sa ang thlapin chawhmeh a lei kual leh a, in a thlen veleh naupang lehkha zirtir pahin eirawng a bawl leh a, rawngbawl pahin pawnah vawkchaw a chhum tel vel pah mai mai bawk thin. Zanriah ei hmain naupang pathum a bualfai phawt a, chumi hnuah vawkchaw a pe a, zanriah eikhamah naupang lehkha zirtir paha chhuat nawt chungin TV-a news an puan a ngaithla a. (En erawh chu a en hman meuh lo, a chala lo kuk rik fawk hi a rem em a.)
A nupuiin chaw eikham thingpui a inna a rei tawh deuh hnuah thingpui a lumsak leh thin. (A chang chuan a ma ta tur a insiam kep ve ngam zeuh zeuh.)
Dar 9:30 a rik hnuah naupang ho ti muin thawnthu a hrilh ziah. Thawnthu a hrilh hma hian ‘chhanna nemin thin ur a tikiang thin a’ tih hi a fate zirtir a a chak hle. (A la zirtir ngam lo mai pawh a.)
Inrinni Pisa kai loh ni hian insuk runpui leh inchhungkhur faina hnatlang (amah chauh vin) a nei ziah. Zingah chawlhni tuk sa tur a lei a, Bazar-ah anhnah a lei leh a, eirawng a bawl leh a, tukthuan eikham atangin nilengin an in velah hian hna chi hrang hrang a thawk thin. (An in leh a vel tih a ‘VEL’ lai tak hi sawifiah deuh atan a tha mang e. )
Hetiang ang taka in chhungkhura pa ber a tangkai hian nu ber tan chuan ‘Pasal atan a tha’ a va ni tehlul em! Hetiang mi hi ‘Thaibawih’ a ni lo, a taima a, a nupui chet ve hmain a che zung zung a, a nupui hi a ti- hmingchhe lek lek zawk a ni. chuvangin hetiang chi ho sawi nan hian ‘Pasal tha’ tih hi hmang ila a dik thei ang em?
(Rta hian dawt a sawi a ni ngei ngei ang hetiang hi mi pakhatin a tih vek sen loh! Hruaia te ang an nih nghal loh chuan.)