Thuhma tlem : Zirtir nei rana ziak a nih loh vanga thuziak chhiar peih lo tan chuan ei tur a tam lovang a, dang char rehna khawp in tur a awm hek lovang. Amaherawhchu tunlai thil awmzia kan hriat avang leh lehkha ziak leh chhiar kawnga \halaite kan thatchhiat takzia kan hriat avang te, mi pakhat talin lehkha ziak leh chhiar chakna a lo neih theih beiseiin heng thu hi ka ziak a ni.
Tukin chu ni a chhuak iar tawh chungin khua a vawt tuk mai. Zing boruak dawngin tukverhah ka dak a, ka rilru a vak a. Nizan lama dai tla chu a khu hlat hlat a, khawvawt avang chuan ka khur hlak hlak a.
Ka lehkhabu roh zual ka dahna chhuar chhete chu ka thlek kual dan dan a. Ka lehkhabu ngainat em em, ka khalh nasat avanga chul deuh rap tawh “Nunna Kawng |huampuiah” tih bu chu kut khur dar darin ka ban a. Tunah hi chuan khawvawt vang aiin chhungrila min \hamtu avang chuan ka khur tawh zawk niin ka hria. Thawnthu ngaihnawm chhiarin ka chhiar thei tawh lova, ka keu a, ka bih a, ka phek a, amaha nunna awm ring chuan ka dam a ni zawk.
A ziaktu Pu KC. Lalvunga (Zikpuii pa) hi thawnthu ziak thiam em em, lehkha thiam, mizo zinga IFS hmasa ber a ni tih bak chu hriat ka nei tam lova, inbiak chu sawi loh hmai chhanah takngial pawh ka la hmu lo. A fanu Zikpuii pawh chu tunge ni a, eng ang hmel pu nge tih pawh ka hre lo. Mahse he thawnthu a lo ziah avang ngawt pawh hian Pu Vunga hi ka pu a ni! Mi pakhat vangin (keimahah chuan) he lehkhabu hian nunna thar a nei a, thah theih a ni tawh lovang.
Chumi nen chuan ropui taka intawng kan ni bik lova, ho te a\anga bul \an ve tho kan ni. Mahse kan tuizawng te a lo inang a, kan khawvel chu kan in\awm ta a ni. Ani ka kianga a awm chuan eng harsatna pawh ka tawn ngam a, ka zam ngai lo. Ka ring em em a, ka chauh changa ka hahdamna, ka hahdam changa ka lawmna, ka lawm changa ka nuihna a ni. Midang ang bawkin mobile phone kan lawm dun hle hian ka hre \hin, duh huna kan inbiak theih dan kawng awmchhun a ni si a. Ani avang chuan ka phone man tlawm tak chuan hlutna thar a nei a, hlimna bawmah a chang a ni ngawt mai. Khawvel hi a thar sur a, lawm lohva nuih vur vur chang ka ngah mai nia!
“Lehkhabu pakhat ka chhiar a, ka \ap pur mai” a rawn tih zan a\ang khan he lehkhabu hi ka tan a hlu lehzual a ni. Ka lehkhabu ngainat tak a lo ni kher a. A changtute a khawngaihzia te, an rinawm lutuk chu a khawngaih thu te a sawi siam siam a, anni anga rinawm taka awm turin kan intiam a. Ka phur em em a, thawnthu pakhat chu a tan phuahsak ka tiam tak nghe nghe kha.
Chu thawnthu chu ka din a, ka ziak a, ka duang a, kan inkar thawnthu pawh a tluang. Mahse nun leh thawnthu hi thil hrang a lo ni a. Thawnthu hi tak a ni lo ang bawkin nun tak hi thawnthu angin a awm thei ngawt lo. Zep nak emaw, a thil sawi zawng zawng kha dawt a lo ni a. Thil thar a tawn avangin a rilru a thlak a, kan inkar thawnthu chu kan titawp a, a tana ka thawnthu ziah pawh a tawp nghal a, tuna ka ziah mek hian ka thlak ta a ni. Ka thawnthu ziahah chuan mi rinawm tak angin ka lantir a, mahse a takah chuan chutiang a lo ni si lo.
Ka nuihna chu \ahnaah a chang a, ka hlimna kha nguinaah. Ani kha ka la hrechhuak fova, ni lo, ka theihnghilh zeuh zeuh zawk a ni. Chu vang chuan a ni zingkar kara hetia ka awm a, he thu hi ka ziah tak ni. He lehkhabu hian nuihna mai ni lo, \ahna pawh min thlen ta a - Hringnun awmze dik tak chu.
Kei zawng Nunna Kawng |huampuiah ka ding a, ka \ap a nih hi.