Nangni Nu leh Pate u, nangmahni avang hian Chanmari West hian Chanmari West a nih theih phah a, Aizawl vengah pawh veng ropui leh lian pawl tak zingah min hlang kai a nih hi. He veng hi veng dang nu leh pate chuan lu phum nan a \ha tiin an fak fo \hin, chu chu nangni nu leh pate thawhrah leh inpekna vang a ni. Kan vengin chhiat \hat chungchanga fak kan hlawh vena chhan leh mi bula keini \halaite kan hmai a uan theihna chhan chu nangni vang chauh hi in ni. In din, in siam, he veng hian in hnathawh avang hian a chawimawi let ve fo reng che u a ni. Mahse inti teh ang, kan venga nangmahni thlah in fate vang hian a kawng zawh \hin chu a bosal ve \an mek ni hian a lang a, siam \hat a ngai ta em ni?
Nangni pate u, in tlangval laite, pa in nih hun thleng pawh a, \awngkam mawi em em mai Tlawmngaihna chu thua sawi mai lo va, in lo nunpui \hin a nih kha. Mitthi an awmin mitthi inah rang taka tlanin in seng hawi a, hrisel loh chhuanlam tur pawh awm mah se lumen tur a nih chuan in tlai var leh mai a, tlaivar chungin thlan in la lai zui a, chumai ni lovin khawhar inah riakin khawhar chhungte \anpui an ngaihna lai laiah in \anpui \hin a nih kha. Tunah chuan khang ang zawng zawng hna \ul thawk turin in upain in tha a lo \hum ve tawh a, in tlin tawh bik lo a ni. Mahse, fapa, hetiang ti thei rual in neih chuan in lo tih tawh \hin ti tur hian tirh a hrehawm hauhin a rinawm loh. Pathian khawngaihnain in hun in la hmang liam ve ngei ang a, in fapate'n mi nu leh pa thlan an lai ngai lo a nih chuan tu fapa nge in thlan lai tura in beisei bik ang a, khawilam tlangval nge in lumen zana tlawmngai tura in beisei tak ang, tlangvalte tlawmngaih lan chhuahna tur hi nangmahah hian a innghat a ni.
Nangni nute u, in nulat laia in lo beih nasatzia te, nula tlawmngai an sawi changa in hming an sawi rik nalh nalh \hinte kha chu hmanlai an chang tawh a, tun hi chu in fanu hun a ni ve ta. Mitthi lumenna a kal tur te, thingpui lum leh sem turte khan tir chhuak hram hram la, mi dang tan malsawmna a nih kha; in tan a la rawn let leh mai dawn asin. Hmanlaia fanu nula tlawmngai leh fel miten an sawi changa ngaihnawm in lo tih tawh \hin khan tunlaiah hian a la danglam vak chuang lo, chutiang hring tura beisei in ni a, chutiang ang ni lo hringtu nih chu in duh bik hauh lo vang, a la tlai lo a ni.
Nangni nu leh pate u, kan veng tan hian thil tam tak in pe tawh a, in thawk a, in thawh tawh bawk. Tun thleng pawh hian keini chu fiana chaw barh ngai ang chauh kan la ni a, in lak a\ang hian beiseina nasa tak kan la nei reng a ni. In tha thawh tur chuan kan beisei ngam tawh lo che a, in tha tluk zeta chak in fate kha he veng hian a au a, a mamawh a ni. A zirna leh eizawnna tibuai khawp chuan kan beisei ngai lo va, amaherawhchu, an hun \ha ber dawt chu he veng hian a phut ve a, chu chu nangmahniah khan a innghat tlat a ni.
Nangni nu leh pate u, in hun a liam a, in fate hun a lo thlen tawh pawh hian kan aiin upain, hmanlai mi ni mah ula, kan aiin in fing a, in lo tawn tawh tam takte hi kan tan hian a hlu em em a ni. Hmanlai nun hre chunga tunlai hun nen in hmehbel thiam a, min hriat thiam pawh a ngai a ni. In hunlai angin khawtlangah pawh kan tihdan a inang diak diak tawh lo a ni mai thei. Ho in tih pawh kha kan lo tuipui viau mai thei bawk a, \ul lo in tih pawh kha \ul kan lo ti viau mai thei bawk a ni. Chuvang chuan in fate hnenah hian nangmahni hrethiam turin min zirtir ula, tunhmaa in lo tlawmngaihna nun mawi taka nung tur khan min hruai ula, nangni lo chu hmachhuan kan nei lo va, nangni lo chu hmangaihtu pawh kan nei lo a ni. In fanu, in fate hi veng, khawtlang, ram leh hnam tana mi chenfakawm ni tura min beisei chuan chu kawng chu min zawhpui ula, kan kal zelna tur kawng min kawhhmuh ang che u.