He inelnaah hian team 8 awmin lawmman pawh Pakhatnain Rs 5,00,000; Pahnihna - Rs 3,00,000; Pathumna - Rs 2,00,000; a hniam berin Rs 50,000. Team 8-te hi inkhel kualin team-te hian vawi 14 theuh an khel dawn a, a chakin Rs 3,000, chak lohin Rs 2,000 dawngin an inhnehtawk chuan Rs 2,500 ve ve an dawng.
MPL hi August 2013-ah tanin November 2013-ah an khel zo ang. Lammualah zana inkhelh theih turin light an buatsaih mek a, MPL pawh hi zanah khelh ngei tura ngaih niin an inkhel hi Zonet-in live-in a pe chhuak bawk ang.
Chanmari West FC leh MPL
MPL hi professional kalphung zuiin MFA-in a kalpui a, Mizorama Football team tha bik 8 zingah Chanmari West football team a tel thei hi thil ropui leh chhinchhiah tlak a ni. MPL khelh hi a hautak hle a, hnatlang type-a khelhtir ngawt theih a ni lo va, subroto huamin state aiawha khel tawh player-ten season khatah Rs 10,000 aia tlem lo an hlawh ngei ngei a ngai. MPL buatsaihtute hian player-te hamthatna an ngaihtuah tel ran a, player-te hlawh neihtir loha khelhtir ngawt theih a ni lo. Hetiang a nih avang hian MPL khel thei team-te an insengso nasa hle.
Chanmari West-in kan khel ve dawn a, player 22 neih a ngai a, chung player-te hnenah chuan mi pakhatah thla tin thla 4 chhungin (a tlanglawn thei ang bera chhut chhinin) Rs 4,000 theuh sen ni ta se 4x4000x22 = Rs. 3,52,000 a ngai dawn tihna a lo ni a, hetiang zozai pawisa hi CWSC hian khawi atangin nge a neih theih ang? Sporting Club hruaitute lu a hai map lo thei lo vang.
Zotea leh Sangha zawrh
A ni lak taka Pu H Lalramhlunate hmel leh hruaitu dang hmel han hmuh hi chuan engzat nge i thawh ve theih ang an ti deuh ziah bawk si. A nih loh leh Sangha Kg eng zat nge in lei ve theih ang? an ti awl lo va, an hruaitu hlun Zotea hmel leh sangha phuhlip thenfai lohte hi a inhmeh rum rum tawh.
Chutiang a nih loh leh ko an han thlak ve a, lucky ticket an han zuar a, pakhat chauh lei han tum ila, phek nga vel an lo pawtthla hman a, sumtuak leh khawn an ngah tawh lutuk avanga inthlahrung em em-in ti lo thei lo dinhmuna ding sia hma an han la thin hi chu an khawngaihthlak letling thin ngawt mai. An tana hlawkna tur awm hauh lo, infiammite tan leh veng hmasawn nan tia hma an la tih ngaihtuah thiampui tan chuan an inpekna hi a zahawm ngawih ngawih thung.
Ruihhlo Vrs infiammi
Mizoramah mipa aiin hmeichhia 14000 chuangin vote nei an tam zawk a, he ti taka mipain hmeichhia kan zat lo hi engnge a chhan ni ang le? A chhan tam tak a awm thei ngei ang a, a chhan pawimawh tak pakhatah chuan Mipate ruihhlo vanga thi an tam vang a ni ngei ang. Ruihhlo hian min tibuai hle a, tlangval changkang leh hmantlak tur tam tak ruihhlo vangin an khawlo a, a hun lovah an thi a, hei hi hnam tan pawh a pawi em em a, chuvang chuan YMA pawhin nasa takin ruihhlo a do hial a nih hi. Hetiang kan nih mek lai hian infiammi ruihhlo laka fihlim tam tak an awm a, chung mite chhawmdawl zawnga hmalak chu a pawimawh hle.
Lam kan them leh kuhsi
kan hlawh pei
Sporting Club hian mipui hnena pawisa an khawn hmain tuna an thil neihte atangin pawisa a tam thei ang ber an hmuhchhuah phawt hnuah anmahni committee huang chhungah kum dang aia nasain an thawhkhawm phawt ang a, chung chu an tih hnuah mipui hriatin an pawisa dinhmun puangzar se la. Miin an theih tawk an tih hnuah an dinhmun hriatsakin puihbawm dan thiam a awlin puihbawm a chakawm thin. Sports hi mi zawng zawngin an tuipui tlur lem lo tih hre chungin Sports-a tuimiten hma an hruai ang a, mipuiin an hnung an zui ang.Infiammite pawhin mipui puih chak khawpa an khelh a pawimawh. EPL-ah Manchester City pawh an chak ngun ve hnuah tantu an nei tam ve sawt hle a, Man United tantu chanve an tling ve thelh tawh ang.
Veng tan
Lala, Chanmari West-a cheng hnen atangin Ruihhlo/zu thahnem tak man a ni. Chanmari West tangvalten an venga leng tlangval pahnih thi lek lek khawpin an sawisa a, an bike an hal sak bawk tih ang reng hi chanchin bu-ah in ziak fo mai sela Chanmari West nih chu a nuam hauh lo vang. Central YMA Football tournament-ah Chanmari West tlangvalte an champion, Olympic-ah India-in gold 7 a la a, heng zinga 5 hi Chanmari West nula tlangvalte lak a ni tihte hi hre ta ila a nuam ngawt ang. Kan veng chanchin a tha zawnga hriat kan duh chuan ‘Veng tan’ tiin kan tanrual a pawimawh. MPL hmachhawn tur hian a hma aia nasain tanrual in tum teh ang u hmiang.