Nupui pasal neih dan hi kawng hnihin a sawi theih awm w, a hmasa zawkah chuan inngaihzawnna avanga nupui pasala insiam a ni a, pakhat zawk erawhchu chu nu leh pa ten emaw pu ten emaw an sawi rem hi a ni. Hmanlai kha chuan a hnuhnung zawk khi an hmang nasa mah niin a hriat a, tunlai hunah erawh chuan inngaihzawnna atanga nupa a insiam hi kan tih dan tlanglawn ber chu a ni ta hrih a ni.
INNEIHNA CHUNGCHANG - Mizote hi hmasang atang tawhin palai hmangin mipa chhungte leh hmeichhe chhungte an inberem a, mipa lamin hmeichhe chhungte hnenah nupui man an pe a, hmeichhe chhung ten an dawng a, hmeichhia chu a pasal tur te in lamah a lawi ta thin a ni, tunah erawhchuan sakhaw puithiam emaw inneihtirtu tura ruat apiangin an inneihtir mai thin.
Inru emaw, inluhkhung emaw, infan emaw te chu eng chen pawh nupa anga awm dunin fate hial pawh nei mahsela man leh mual in hlanna emgmah a awm loh chuan nupa anga chhiar theih an nilo.
MAN LEH MUAL - Hmanlai atang tawhin inneihnaah chuan mipain a nupui man a pe thin a, chu chu “man leh mual” a ni. Man leh mual hi mihringte inleina a ni lo va, nupui pasala innei turte leh an chhungte ve ve, chhun leh khata insuihkhawmna tura inremna entirna a ni. Chuvangin kawngro nei taka siam a ni.
Man teltu chu pa ber a ni a. Pa ber a awm loh chuan a aiawha pa chan chang apiangin an tel thin, chumi ngei chuan man pawh a sem leh thin. Tunlaiah chuan intih changkanna leh intih remhriatna ni awm takin pasal neitur hmeichhia kha a man an sem tir thin, a then chuan inneiturte pahnih kha hmeichhe man an sem tir bawk thin hei hi chu mibak sawna intih bengvarna emaw intihchangkanna vang mai mai a ni. Mizo nih phungah hi chuan man sem tu tur chu man teltu ngei kha a ni. Man teltu chuan om a chu a theih angin a lawi anga, makchhiat a tawh pawhin a tuam hlawm tur a ni.
Man leh mual hi tangkaa bithliah a nih hma chuan ro thil, thi leh dar te leh sial te an hmang thin a. Tin, bel leh hriamhrei thleng pawha hman a ni bawk thin.
MAN EI TUTE - Mizo inneihna chungchanga man eitute hi PALAL eitu tih loh a dang zawng chu laina bul tak tak an ni vek a, PALAL erawh hi chu khual khua a pasal nei ten a an hmelhriat tha deuh mo pawh lo tuam hlawm thei tur an zawng chawp thin. Tunlai ah chuan a duh leh phur nazawngin man hi an ei ta mai niin a hriat a ni. Inti Mizo hle si hetiang lama Mizo kalphung hre silo nih hi thil zahthlak tak te pawh a niin ka hria.
MAN TANG - Mantang eitu te chu a hnuaia tarlan ang hi a ni.
- Sumhmahruai : Sumhmahruai chu Mantang zinga mi, Pasal nei pa chanpual a ni a, a ni chuan a unaute emaw a fapa indang tawhte emaw a teltir thin.
- Sumfang : Hei pawh hi Mantang zinga mi a ni. Pasal nei pa chanpual a ni a, a ni chuan a unaute emaw a fapa indang tawhte emaw a teltir thin.
- Pusum : Mo pu (Mo hringtu nu pa) ei tur a ni. A pu chu a lo thi tawh a nih chuan a pi (a pu nupui) a la dam phawt chuan a pasal la dam tluka ngeih a ni a, a ni chuan a ei tur a ni. Anni nupa an thih tawh chuan an rokhawmtu ziding ber chuan a ei tur a ni. Pu dik tak ten pusum an tel lo a nih chuan, pu dik tak chuan ‘Pu ban man ’ Sial a thing thei. Pusum tel tur dik ber a thih tawh chuan a fate zinga mi pakhat aia tamin pusum an tel thei a, chu chu ‘Pu phir’ an ti. Chu bak chu mantang eitu zingah pusum teltu chauh.. (Karleh ah chhunzawn leh a ni ang)
AW ZAWLBUK LUNGPHANG SUH
Chanmari ‘W’ Veng hi Aizawl tlak lam, veng thlir nuam em em lem lo, a boruak ah chuan zau ve tak a ni. Chumi chhungah chuan mi rethei te te cheng khawm, tunah tak phei chuan veng lian ve tak a lo ni ta. Amaherawh chu hmun pawimawh tak awm lem lohna a ni si. Kan hmun leh mual neih chhun te lah chen fakawm tak2 awm lem lo a chen fakawm tur pawh a siam awm lem bawk si lo an ni.
Chutih lai chuan YMA ten hmun tha ve tak Zawlbuk kan han sual ve ngawt chu a ni a, Sorkarah te a theih ang kawng kawngin fund te han dil ve bawk thin nain hmuh chhun lah a bei tham thin si-a ban pahnih khat han siam ila a zo der mai zel si. Bei nge sei run dung tih ang hrim in mipui ah a meikhu chhuahin han khawn bawk thin mah ila, a lut tam thei tak tak bawk si lo.Thu nei thei deuh leh huhang nei deuh te lah hian han vei ve thin mahse an chil perchiah bak chan tur a awm leh thin bawk si lo. Mut mawh hnar mawha neitu tan chuan bei te pawh hi a dawng rum rum thei mai awm e. Han ngaihtuah ve teh!! Enge i ngaih dan le.
Aw Zawlbuk ka va han khawngaih tak che em. Pi Pu te hun lai kha chu ni se, Veng nu leh pa ho hian Zawlbuk te chu an sa zo thei ngei awm si a le. Mahse lungphang suh a chhunga cheng YMA te hian YMA member han pun khawmna tur tal chu an khawr phui ngei ang chumi atana hun leh tha thawhtute zawng zawng chungah lawmthu a sawi rualin la tang fat fat turin kan in ngen ani. A lem hi a takah chang zel ang-Zawlbuk.