Mipate hian 'pa' an lawm tlangpui a, hmeichhiain 'pa' an tih leh mipain 'pa' an tih a inan leh an loh ka hre lo va, mipaten 'pa' kan tih zawng pawh a inang vek lo mai thei. Hnam tinin 'pa' tak hi an ngaisang fo va, Mi pakhat nungchang rilruah a cham reng a, a mak danglam riauin ka hria a, 'pa' riaua hriatna ka nei bawk.
Ze vawt raih, thil thleng thuta nghing ve lo; hlimna vawrtawp leh thinrim runthlak em em bakah, zuan tawr tawrna tur khawpa hlawhtlinna lawmawm leh hnual rawihna tura chanchin lungchhiatthlak karah pawh pangngai reng thei a ni.
"Iceman" tiin a hming lem an phuahsak a, a zia leh nihphung nen a inhmeh hle. Hollywood film star ni ve mai awm tak; hmeltha no deuh chuk mai, ram vawt atanga sei lian tih hriat tak a ni a, a vun no tak phenah khaw vawt lutukin a hmeh khang zawh lo ze tak fei zet a pai tel niin a hriat. Fiahna tam tak paltlang tawh ang mai a ni a, zan lama intihhlim leh lam hlimna lam ngaina tak a ni tel bawk a, hei tak erawh ka ngainat zawng a ni hran lo.
A hmel enin fit tha leh inelna hautak leh hrisel ngai em ema tel ve chi ni pawhin a hriat loh. Mahse, a tel a, a tha ber pawl a ni a, infiamna huanga a hlawhtlinna ai mahin a ze maksak ang reng tak chuan rilru a hneh zaw mah. A telna hi a hautak viau niin a lang a, Nico Rosberg chuan he infiamna hautakzia a sawifiah dan chuan : "Intihsiak kan hmachhawn apiangin marathon tlan ziah ang kan ni," a ti.
Tunlai Mizo thalaite hian eng mizia nge 'pa' an tih hriatthiam a har. Tuna kan sawi lai mek hi 'pa' tak chu a ni lo mai thei ? Amaherawhchu, a mak tiin Kimi Raikkonen-a nungchang hi an sawi fo thin.
Kei pawhin mak tihna chhan ka nei ve nual tawh a; 2001-a kum 22 mi ni chhunga F1 a luhchilh tirh atangin chanchin danglam tak a nei nghal. Naupang tak ni chungin inelna hautakah a tel ve dawn a, mahse, he Finn driver hian helhhawlh emaw pressure tia an sawi thin hi a nei lo hle niin an sawi. An tlan hma lawk thlengin a hmel hmuh tur a awm lo va, Sauber team an buai hman. Darkar chanve vel chauh a awm tawh tihin tui em emin motor home-a a mu bawrh bawrh lai an hmu a, mi pakhat phei chuan 'he pa hi mi danglam a ni a, a lar dawn chiang khawp' tiin a sawi nghe nghe.
2001 season a tawp a, driver ropui Mika Hakkinen chuan F1 a chawlhsan a, hetih laia Ferrari nena inel ber McLaren chuan an driver tha an chan tak avangin amah thlak tur an dap. Hakkinen ang bawka Finland ram atanga zi chhuak, tawn hriat tlachham tak Raikkonen chu an la lut ta a, kum nga chhung British team car a khalh zui.
McLaren-a a awm chhung hian Raikkonen a vannei lo hle a, driver tha ber pawl leh mipui tan hlawh em em chungin vawi khat mah world champion a ni lo. Mak deuh maiin a hmelin hmeichhia a hip a, a nungchang vangin mipate tan a hlawh tlat. McLaren-a a awm chhung hian a nungchang lang fo mah se a vawrtawp a thlen miau loh avangin a la fiah tawk lo.
2006 kum tawp khan F1 driver hlawhtling ber Michael Schumacher chuan chawlh puangin Ferrari a kalsan a, Italian team hian Schumacher thlak turin Raikkonen an la lut. Ferrari tan season khat a hmannaah mak tak maiin season tawpah Raikkonen a champion a, intlansiak tawp ber an hmachhawn hmain championship-ah pathumna a ni a, F1-a thil thlen dan enin tihtheih loh tluka ngaih a ni a, mahse, F1 chanchina season tawpa thil thleng danglam ber ang hiala ngaih a thlentir.
McLaren-a a awm chhunga a talbuai tawhna ngaihtuahin he title hlutzia hi Raikkonen ni ve kher lo tan pawh a chiang a, a lawmawm a, a hlimawm tak zet. Mahse, he hunah chiah hian tun hmaa an sawi fo tawh Raikkonen-a danglamzia chiang em emin a lang. Zuang lama khek chel chul awm tak a ni a, "Iceman" erawh chu an intlansiak zo chiah a, tum dang ang thovin muangmarin a car atangin a chhuak.
Intlansiak vawi khat an chak tum pawhin mi dangte chuan an team member-te lam panin lawm em emin an inkuah a, kutzaizir nen an hlimzia lantirin aw rawl an chhuah nasa thei hle. Raikkonen erawh chu champion tih pawh hriat lovin a team-te lam hawiin a ban pahnih vawi khat a phar chhuak a, inchhung lamah a luhsan nghal daih a, a champion avanga lawm em em Ferrari team member-te erawh chuan an hlimzia nasa takin an lantir a, mahse, Raikkonen-a chet dan atangin an tan pawh a inthlahrunawm rum rum ang.
Mahse, Raikkonen a ni miau a, McLaren car a khalh lai pawhin a ze dangdai tak hi chu a lantir thin. 2005 khan Fernando Alonso nen season tawp lamah title chuhin an inbei fal a, intlansiak pawimawhah Alonso aia point hmu tlem hret Raikkonen chuan hmahruaiin chak thei ngei tura ngaih a ni. Intlansiak pawh a tawp lam a ni tawh a, mahse, a car khawl a chhia a, a pawi em em a, title a beiseina zawng zawng a tawp nghal titih a, chak se champion thei turin a dinhmun a siam thung ang.
Mi dang ni se an car atangin an chhuak tau ang a, anchhia lawhin an chhuih zui vel ngei awm si a, an hmelah pawh an thinrimzia hai rual a ni lo vang. Mahse, Raikkonen a ni miau va, a car chhia atangin a rawn chhuak a, a thinrim tih pawh hriat lovin a car chu a kalsan zui nal nal a, a hmel atangin engnge a vei a hriat theih loh; season tir lama vanduaina a tawh thin nen a chet dan a inang reng.
Mak leh em em mai chu tun season-a thil thleng a ni a, Raikkonen hian 2009 kum tawp khan F1 kalsanin kum hnih a awl a, kumin atangin Lotus team tan bul a tan tha leh. A mizia nena inmil takin season tluanin a tlo em em a, 2012 chhungin vawi 20 an tlan a, vawi 17 an tlan thlengin pakhatna ni ve miah si lovin championship-ah pathumna a ni thei.
Abu Dhabi-ah hun danglam tak inher chhuakin Raikkonen chuan rin loh deuhin hnehna a chang a, 2009-a Belgium-a pakhatna a nih hnua chak ber a nih leh hmasak ber a ni. Lotus car a chak tha tawk lo bawk nen a lawmawm hle ang tih a chiang em em. Mahse, Raikkonen a la ngai reng a, intlansiak zawhin a hunna turah a car a dah a, hmanhmawhna pawh nei chuang lovin a car atangin a chhuak.
A bul maia Lotus team member-te lawm avangin an khek a, an lo ban luai luai bawk. Mahse, a car chungah dingin a ban pahnih rei vak lo a phar a, inchhung lam panin Lotus team lam ngaihven awm lo takin a lut daih a, pahnihna leh pathumnate ai pawhin lawmman semna lam a pan hma a, kawng a la hai zui leh nghal.
He intlansiakah hian hma a hruai laiin Lewis Hamilton-a car a chhia a, a hmasa berah Raikkonen a awm phah a, Lotus chuan a che sual ang tih an hlau em em. Kuminah chak theihna hun tha an hmuh hmasak niin team engineer chuan a chak ngei theih nan radio atangin phur takin Raikkonen a fuih thin a, 'Iceman' erawh chuan a ngai thei lo hle a, an inchhang.
A tawp dawnah safety car a lut a, hetih lai hian engineer chuan Raikkonen chu intlansiak an tan leh ruala chak taka a tlan nghal theih nan a tyre tilum turin a hrilh fo va, Raikkonen chuan a ning viau ni tur a ni "Second tina hrilh ka ngai lo; ka tih tur ka hria, min ngawih san la, min rawn tibuai tawh suh" tiin a chhang.
Hetah hian a tawp mai lo va; boruak a awm deuh hat hnu hian Finn driver chuan T-Shirt 500 siamin a hmaah "Min ngawihsan rawh u, ka tih tur ka hria" tih a nem kai a, Lotus team member zawng zawng hnenah a sem vek. Tawng duah lo mah se Lotus chuan an driver rawih hi an ngam meuh lo va, a lakah an nem ral ta niin a hriat.