Floyd Mayweather Junior ni ta ila, India sanaa tukin zing dar kaw bawr velah hian Saul "Canelo" Alvarez nen MGM Grand Garden, Las Vegas-ah WBC leh WBA super welterweight title inchuhin kan inhnek ang. Round 12 inbei tur kan ni a, ka knockout lo emaw min knockout lo emaw a nih chuan minute 36 chhung kan inbei dawn tihna a ni.
Ka hlutna a sang vet vet bawk a, tun tumah hian a tlem berah Rs vaibelchhe 274 vel i hlawh dawn a, pay-per-view kan hralh that viau chuan chanvo i nei tel bawk dawn nia an la ti cheu va, "Ni e," ka ti ve hram. Kei aiin ka hlawh turah hian contract min ziahpuitu Showtime an lawm zawk mahin ka hria.
Hlawh chhe lutukah ka inngai lem lo va, a chhan chu second khatah Rs nuai 12 chuang la lut thei tura min thlem miau avangin "Nia maw le" tiin ka chhang a, intihtheihna tham vakah pawh ka ngai hran lo. Hei aia sang hi hlawh dawn pawh ni ila thil mak a ni lo va, mahse, mi dangten ka hlawh chanve hi ka hun hman angah hian an la lut dawn a nih chuan miten mak tiin hahipin an sawi thung ang maw le !
Kei chu khawvela tha ber ka ni a, boxer zawng zawng zinga thawkrim ber ka ni bawk a, ka thiamna siam lian tura ka beih nasatzia ka hria; chumi piah lamah miten ka inhnek an en chakna tur leh khawvel mit la ka nih theih nan mi tih duh loh tam tak hmangin mipui rilru ka tizauthau thin.
Ka hnek turte tawngkam awmze nei leh ngeiawm, chimawm taka han sawisakte hi ka hmanraw tangkai a ni. Puipunnaah mi pangngaiin an tih duh si loh; langsar larhna tura nunchang dangdai tak lantirte hi thil tangkai a ni a, mawl min ti viau mah se ka finzia an hrethiam lo va, ka inhnek en chak hlei hlei an ni. Night club-a dollar 100 (Rs 6600 vel) note han hal ral velte hi thil nuam ve tak a ni.
Khawvela car man to 10 chuang ka kawl khawm avang hian tu nge mawl min ti a, ka car pakhat pawh lei zo lote hian " Mi A^" min ti ang maw ? Ka bialnu hlui kut ka thlak avang leh min vengtu ka sawisak avangin danin thiam loh min chantir a, lung inah hial min khung. Thil mawi leh tha a ni lo chiang hle tih ka pawm.
Mahse, tan in atanga ka chhuah hnuaah ka hlutna a pung hle si a, lung in atanga ka chhuah atangin vawi khat ka inhnekah Rs vaibelchhe 200 chuang ka hlawh ziah theih chuan thil tha a ni em em dawn lo em ni ? NLUP la ve lo mah ila, ka vui lo.
Khawvel boxer piang chhuak tawh zinga inven thiam ber ka ni a, ka ran em avang leh ka thiam luat tuar lovin professional ka luhchilh atanga mi 44 ka hnek tawh ka la hneh vek. A dawizep, a inhnek dan a hmuhnawm loh tiin min sawisel thin a, min demtute hi ka inhnek apianga en chak an ni ziah. A ni telin khawvelah hian min ngaisangtu leh ka inhnek en chak an pung zel a, ka sum lak luh tihtlem tum ngial pawh ni ila ka thuneihna piah lam a ni tlat a, tih ngaihna ka hre ngang lo.
Kum 36 mi Mayweather hi chu ni ngat ila, kan branch YMA Zawlbuk sak puitlinna tur mai ni lovin, Aizawlah pawh chhuan tham larh a nih theih nan kan hruaitute hnenah sum ka pek phal mai ka inring a, mahse, a takin ka kutah sum awm ta se ka phal ngut ang em maw ?
A chhan chu MLA inthlan dawna kan Zawlbuk sak puitlinsak min tiamtute khan an ti tak tak niin ka hria a, an thusawi laite pawh ka mitthlaah a lang uar uar mai. Tun thlengin kan hruaituten thi leh thau pawlhin an bei a, mut mawh hnar mawhah neiin kan veng rotling ni tur buaipuiin an la vir buai em em si.
Kei pawh ka pe ang che u ti ve ngawt ila, ka pek leh phal si loh chuan... ! Bible-ah thutiama hlen loh ai chuan tiam loh law law a tha zawk tihte hi inziak lo law law se chuan a ziawm deuh mah na ?
Tichuan, second chanve vel chhunga ka hlawh tur pawh Mizoram Premier League khel tura inbuatsaih mek Chanmari West Football Club tan "Pain a fapa chithlum mum a leisak ang velin" han sih chhuah ila, Chanmari West FC team enkawltute chu an va lawm dawn em tihte thlengin ka rilruah a awm a, a lungchhiatthlak zawnga ngaihtuah pawhin a dawngtu tan chuan lawmawm tham deuh tur a ni.
Mite nen kan hlawh a inthlauhzia aiin mumang ram leh duhthusam pawh duhtawk lo va, suangtuahna nen tangkawpa vanram nawm turzia aia leia ka nawmsakna leh ropuina tur ringawt ka ngaihtuah laiin, Mayweather leh kum 23 mi Alvarez-te inhnek hun chu a hma aiin a lo hnai hle tawh zawk a.