Chawngbawla Section
Tun tum chu kan Article-in khawtlang nun siamthatna lam a hawi dan chu tlemin a zia i lo tidanglam hret teh ang. He hring nun hahchawl thei lo lek a rualawt leh phak loh neih tum a phe reng mai nun hmang mek te nun hi a tih hahchawlh ve deuh nan he “Miller of the Dee” an tih pa nungchang leh khawsak dan hi i lo zir tlang teh ang.
England leh Wales ram inrina ah khuan “Dee” lui an tih kamah chuan chhangphut hertupa hi a awm a, Sap pa naran ve mai, khawvel thil lamah chan tur nei ve lo tak a ni. Mahse chan tawka lungawi thei em em mai a ni. A hnaah chuan kawla nichhuakchhiarin a thawk a, a chhangphut her pah chuan a zai rut rut thin, a hla sak thu chu “Tumah ka awt lova, tuman min awt bawk lo, ka ei khawp ka hmu a, ka nupui leh fate leh thiante ka hmangaih a, ka rulh theih loh tur pawisa tu ta mah ka ba lo”tih a ni.
Mahse chhangphut hertu hian hriat loh a nei,” tuman min awt lo” a ti hi a dik lo, England Lalber Henry VIII-na chuan, “mi hausa leh thil ti thei pawh nilo, chhangphut hertu mai si chuti taka a han hlim thei bik chu a lo awtin a lo itsik em em a, a ni lalber lah a hlim thei der si lo.
Lalber chu an chhangphut herna hnenah chuan “Tuman min awt lo” i ti hi i ti dik lo, keiman ka awt che a ni. Theih nise kan dinhmun hi inthleng ila ka ti a sin” a lo ti a. Engvanga nilenga hlim thei nge a nih a zawt nghal a, chhangphut hertu pa chuan “ Tumah ka awt lova, tuman min awt bik lo, ka eichawp ka hmu a, ka nupui leh ka fate leh ka thiante ka hmangaih a, ka rulh theih loh tur pawisa tuma ta ka ba lo” tiin a chhang a, lalber pawh chuan a hrethiam nghal a. Hlim takin a haw ta a ni.
Kawla ni chhuak chhiara chhang phut her ringawt chu tamtak chuan hna hlimpui vak turah an ngai kher lovang. A chhangphut her hrim hrim kha a hlimawm a ni chuang lova, mahse, he pa hi chuan a nawm leh nawm loh lam a ngaihtuah lo, a thawk a, a thawhchhuah ah a lungawi a, chu chu atan a tawk chiah a ni.
Mihring nun min ti hrehawmtu tamtak chu, kan nihna a kan lungawi loh vangte, kan neih phak loh kan neih chak em em vangte, mi malsawmna dawn kan lawmpui theih loh vangte, mi neih ang nei ve lova inhriat vangte. Keini aia fel zawk bik lova kan hriat ten hlawhtlinna an neih vangte a ni fo bawk a.
Mahni hna a lungawi a, midang itsik lova, kan chhungte leh kan thiante kan hmangaih a, midang chunga rilru chhia kan put miah loh chuan chu aia nun awhawm a awm thei chuang lovin, khawtlang nun siam thatna bul pakhat chu a ni ve ngei bawk ang le.