Kha mi tuk, Pathianni, Sept ni 2,2012 zinglam dar ruk pelh hreta Chaltlang kawngko chhaklam atanga Lung lian pui pui lo chim kha rapthlak tak a ni, ‘an thawm mitdelte hriat khawpin’ tih ang mai a nasa alawm mawle. Lung lian pui pui kawngah rawn tla in kawngpui a ping hmuk mai a, kawnga chawlhna hmun chang ve lo eng emaw zatte chu kan veng Chanmari West lamah a biling a balanga rawn zuangthla in Pu Rochharliana te In an rawn bitum a, anni chhungkaw zing mutui lai chu thawhphan awm hman hauh lovin a rawn kaitho phut mai, ‘a tlak tlak vanduai’ tih ang deuhin lung den fuh na lai apiang chu an sawp nulh mai, hliam tuar an awm lo hlauh kha a vanneihthlak takzet a ni. Pu Mosia, Pu BMA, Pu Sangtea te In leh Mizoram UPC Biakin hluite a suasam tel nual bawk.
Lung hi: A hmanna tur dik taka hman chuan lung hi an tangkai em em a, Step rem nan te, Lungrem mawi tak tak siam nan te leh Rora atan thleng a tangkai a ni a, Sinai tlang lung phei kha chu hruaitu Mosian Pathian hnen atanga a dawn Thupek Sawm record na’n a hmang hial a nih kha. Kha mi tuka lung lo lum thla zet erawh kha zawngin tangkaina an va han nei lo tehlul em, an tangkai lo ni mai lovin chhungkaw tam tak ti thlabartu leh vengchhung buaina thlentu lek an ni zawk.
a nghawng kal zel: Thawhtan ni a Aizawl khawpui chhung Traffic Jam nasa lutuk kha kha lung lum vang vek kha a ni. Kha thil thleng khan pawi nasa tak khawih mah sela, kawng lehlamah chuan Mizo tlawmngaihna lanchhuah tirtu, hawkdak satliah mai vang ni lova ‘chhiat tawkte tan tangkaina ka nei dah law maw’ ti a mipui kha ti zozai punkhawm tirtu, Disaster management lam hmalakna avanga tanpui ngaite tanpuina tur sum leh pai tam tak ui hauh lova thawhkhawm tirtu leh MZP huaihawk Total Bandh meuh pawh pawisa hleithei lo khawpa a khawnawta hnatlan tir mup mup tu a ni lawi si. Chhiattawkte pawhin vanduaina chungah lawmthu sawi tur an ngah ngawtin ka ring.
a behbawm: Thangsirapa Mai lum khan thil lum rau rau ah pawi a khawih nep hmel deuh a, ‘Inpui sakawl a zuan e , hui ah...’ tih vel kha a ni mai a, khatiang kha a tawk viau asin maw le. Kha mi tuk lung lum zet kha chuan thawkkhat laia kan unau thenkhatte khawchhak lunglum hlau tlanchhiate pawh min ti hre chhuak rum rum mai. Kha mi ni tlai dar 4:00 vel khan Upa Rawna in bul atangin kan thlir a, khawl tam tak, JCB leh B lote hmangin kawng hnawhtu lungpui chhutkeh tumin an ri bur bur a, chutih lai tak chuan kawngko atanga lung lo tla leh in arbawm tiat aia lian zet tih hriat reng reng chu kawngthlang lamah a rawn dak zuau zuau a, a bu luk luk a, a rawn lum tlang dawn emaw kan tih laiin lum tlang lovin kawng sirah a innghat ta ruau mai, E khai! Lalpa zahngaihna ava nasa em, rawn lum tlang vaih sela chuh....!! Ring kham urh khawp a thlir reng tu Vanapa Section nuho pawh kha an fakawm narawh e, thlir mai loh kha chu tih theih dang nei chuang miau hek lo le.
a entir: Lung tam tak tangkai em em an awm laiin pawikhawihtu chu lung tlemte an ni a, kawng daltute phei chu hmanraw chi hrang hrang hmanga tih kehsawma thenfai nghal vek anni. Chutiang bawkin YMA member tam zawk tlawmngai tak tak leh khawtlang tana tangkai em em leh thlamuanpui tham an awm laiin mi tlemte kawhmawh bawl ching, khawtlang pawisawi, mi in dengchhetu leh kawng hnawhpingtu lung ang lek ho hi eng hmanraw hmang pawh a thenfai an ni zel ang. YMA-in “Khawtlang nun siamthat” kumpuanah kan hmang miau a.