Pawl 2 ka nih laiin kei aia mawl(?) zawk leh harh ve fe mai (Zosangpuia) nen tlar hnungah kan thu duna, zirlai ngaihtuah lovin ‘Aw Kros, Aw Kros’ tih hla Crusader sak kha dang leadin kan sa dun a. Kan zirtirtu chuan min dintir a, kan zirlai chu min zawt thut a, keini pahnih chuan ‘a rim a ra pawh kan hre si lova’ thiam loh leh harh hrem nan hmeichhe naupang fel Heleni (d/o Pu J.Kapthianga) bul-ah kei min thut tira, Nu-i(d/o Pu Leta) bul-ah ani a thut tira, phuarbeha ka hup sak aiin a sawt zawk chiang hle, kan thaw ngam feih feih chauh a ni.
Nikhat chu kan pawl-ah kal thar mipa naupang ve tho hi a awma, ka bul-ah a rawn thu a. A hming leh an awmnate ka zawt a, Tete-a a nih thu leh Thelhret huan piah lam-ah an awm thuin min chhanga. Zirtirtu a lo luta zirlai bu kan phawrh sap sapa, kal tharpa chuan phawrh tur a nei ve lova. Zirtirtu chuan mahni theuhin a riin ‘Rungi nu’ thawnthu chhiar turin min ti a. Ka bula mi chuan chhiar tur a neih ve loh avangin ka lehkha bu chu ka pe a, keiin a chhiar ka lo ngaithla a. Kei aia a len deuh avang leh a upat deuh avangte, Champhai atanga lo chhuk an nih avangte a ni ang a chhiar thiam hle.
Tun hnu-ah hian Kum 1978 kuma ka bula lo thu Pu L.Nghakliana fapa Tetea te in hi Zirsangzela’n hla lunglen thlak lutuk mai ‘Luah loh run’ a phuah chhan in ram neitute an ni tih ka hre tlai khawhnu ve chauh a. He hla ka ngaihthlak hian pawl 2 kan zir kum kha min ngaihtuah tir ziah a. Pawl hnih kan nih kuma thil thleng lah chu hriat ka nei tlem em em mai a, Sikul naupangin Hmun kan sawiri dial dial leh naupang bengchheng thawm ri niai niai chauh ka hria.
Pawl 2 ka zir kum-ah hian Zirsangzela chu tlangval ni tawhin Champhai-ah a zin a. Champhai-ah chuan In ram, hun rei tak luah tawh loh hi a han hmu a. Chu in chu mihring lo chen tawhna hmun, tuma luah lum loha khawhar tak maia lo awmta chu hla kungpui tan chuan a lunglen thlak ngang a ni ang a ngaihtuahna-ah a thi thei lova. Kum 1979 June Ni 9 khan Aizawl-ah a lungleng insum thei lo chuan ‘Luah loh run’ tih hla hi a phuah ta a.
Remkimi Cherput (a awah chord kim mawi tak a awm a) sak ngaithla chhunzawm ta ang ila.
A changkhatna-ah hian, tlai lam khawthiang tak, romei zam chiai hnuaia, ngaw hring dap mai mitthla-ah a lang phawta. Chutah in ram, pangpar par chuai tawh lam leh hnimin a bawm ding awn liai mai mitthla-ah a lo lang leh a.
A changhnihna-ah chuan ni tla suar suar thlir liamin, in thenkhata eng lo de tan thliah thliah leh naupang tualchai mahni inlam pana haw tur ‘tin dial-ah tin dial-ah’ ti lai te, chaw ei tura inko thawmte, chhungkaw kima zanriah kil ho laite min mitthla tir a. A thil min mitthla tirin ngaihtuahna a ti kalding viau a, chutih lai chuan tuma luah loh, mei de pawh hmuh tur awm ve lo, thimhlim khawharthlak tak hnuaia khawhar hmel taka hnim leh pangpar te nena ding za, in ram, thim thiap mai min mitthla tir leh ta fo a.
Changthumna-ah chuan. ‘Hmanah chuan chu in ram-ah chuan nula rimin tlangvalte an leng ve thin ngei ang a. Vawk chaw chhum so ri berh berh te, ar khuang rite hriat tur a awm ve thin ngei anga, tunah chuan eng thawm mah hriat tur a awm tawh lo. An kawngkharte pawh hawngtu leh khartu an awm loh avangin a inkhar renga, an thukte pawh hman lohvin a awmdai zo tawh’ tiin chu in ram hma chu min chhuikir pui a.
Changlina-ah chuan In ram chu a biakin min biak tir a. ‘Eng vangin nge luahtu awm lohva hetia i awm tak mai le? Thihna rapthlakin a rawn chamchilh che a, nagmah luah lumtute hian an thih zawhsan che em ni? Nge Mihring ten kan ei leh bar kan zawnna kawngah leh rokhawlhna dang vangin an pemsan zawk che’ tiin zawhna kan zawta. Min chhang thei lo inram nen chuan min in hmachhawn tir a. Chu in ram chuan kam khat mahin min chhang si lo, a van beidawn thlak teh lul em!
A chang tawpah chuan chu In ram leh mahni min in hmehbel tira. Kan ngaih ngawih ngawihte min ngai ve hauh lo a, hlim taka an leng lai min mitthla tir a, chumi hnuah chuan hlim taka kan hun hman tawh koh kir theih loh min mitthla tir a. Nu leh pa sun tawhte, u leh nau sun tawh te, pi leh pu sun tawh te, thian tha sun tawhte tan hun kal tawha hlim taka len ho lai nite min ngaihtuah chhuah tira. Khaw hrana in awmbo san pawh a lunglen thlak teh lul nen a aia runthlak ngaituah lo thei loa min siam hi a runthlak.
Zirsangzela vekin ‘Nun hlui liam hnu’ tih hla-ah ‘In dawn ve thin em nunhlui mualliam hnu,... Lenrual kim te’n kan len lai. Hun thar zelin hman lai a chan tak hi.’ a la ti ta deuh deuh a. (2008 October a mi kan la chhuak, a ziaktu kan dil miah lo! ngaihnawm kan tih erawh a bo chuang lo!