Kan khawtlang roreltu tur Local Council member kan lo thlang zo ta. Party hrang hrang atangin kan inchuh a, kan thlan tlin te hi party ta mai ni lovin Chanmari West mipuite chunga roreltu tur an ni tih hre renga thlan tlinte hian ro an rel a duhawm hle ang.
Democracy Sorkarah chuan rorelna tha siam tur chuan mitinte huapzo, a tam ber lungrualna, thlei bik neih lohna, rorelna lang tlang leh awmze nei leh chak, mawhphurhna hlen chhuak thei, MLA te leh Ward Councillor te thawhpui thiam leh dan anga rorelna keng tlang ngam an nih angai.
Hei hian a chung lama rorel theitu te bakah pawl hrang hrang, Sorkar Department hrang hrang, Voluntary Organisatin te thawhpui thiam angai. Entirnan, MUP, MHIP,VDP, YMA, BPL te hi kan area-ah chuan a langsar zual an ni ang. Hengte nena thawhhonaah Local Council ti danglam thei leh ti hmelhem thei tur lakah erawh chuan an inven thiam angai a ni.
Vengpum huap thil tha ber an ngaihtuahna kawnga hmalakna daltu an awm anih pawhin thiam taka sawipui a, an thuneihna hman a tul pawh a hmang ngam nih a ngai lawi si. Mi rethei leh harsate chanvo fel taka enkawla humhalh angai a. Hleih bik nei lova sem zai thiam pawh angai thin.
Vengchung hmasawnna tur ngaihtuahna senga an tha leh zung thawh tura mipui rilru chawhphur thiam a tul dawn a, Sorkara thil dil tur a awm pawh a plan & estimate(ruahmanna) felfai tak siam a tha fo. Mi hmasate hmalak tawhna chhunzawm duh lova hma thar reh fo hi hmasawnna daltu-ah a tang duh thin.
Ram leh veng hmasawnna tur anih phawt chuan Sorkar budget bakah Central leh NEC sum hai chhuah thiam a tangkai hle ang. Hetiang kawnga hmala thiam Local Council kan neih theih nan duhsakna sang ber mipuiin i hlan theuh ang u. Khawtlang rorelna tha siam tur hian thlan tlinte chauh ni lovin, mipuite pawh hi a mawhphurtu kan ni tih i hre reng ang u. Mahni theihna kawng kawnga tanpui leh thurawn pek hreh lovin i tawiawm theuh ang u.