Kan hma lawkah kan khawtlang hruaitu tur kan thlang leh dawn a, Candidate pawh vote zawngin an hmanhlel ta hle mai, Candidate-te chau ni lovin an party mipuite leh an chhungkuate pawh an thu mai mai hman ta lo.
Hei lo chu “Ka Veng” tihtur kan nei lo, khawtlang hmasawnna tur atan leh veng dangten an entawn tur khawp a thianghlimna ngaina mi kan thlan chhuah theihna turin rilru fim tak pu a vote kan thlak a va tha em!
Khawtlang thatna tur kan duh a, veng hmasawn leh thianghlim tak kan neih theihna tur atan Candidate zawng zawngte khawsak dan thlenga kan zirchian a tul anih pawhin nakin lawka kan phun kan phun a ngaih dawn ai chuan tun atang hian taima takin i zir chiang hmasa ang u.
Candidate-te zingah Ui, Ar, Vawk etc vulh pawh an awm ang, an ran vulhte zun leh ek thlite vantlang tana rimchhia leh hnawk an ni em? Nge khawtlang zahthiam takin midang tana rimchhe lovin fel takin an luankhawm tir zawk, hengte thleng hian kan chhut tel a tul asin. Chutiang ni lova an Ui vulh te, an Ar vulh te leh an Vawk vulh te veng tana hnawksak leh rimchhiat pawh pawisa lo, sum a khawtlang ti lungawi leh mai thinte kan thlan chhuah leh mai chuan, a phun turte chu thlang tling tute bawk anni leh dawn a, chuvangin, veng tana thahnemngai tak rilru pu a, khawtlang hruaitu tur, veng hmangaih tak taktu, veng hmasawnna duh tu, veng thianghlimna ngai pawimawh tur, rilru zim ni lo, rilru zau tak pu mi kan thlan chhuah theih nan ngaihtuahna tak tak i seng theuh ang u. Kan “Veng” tan a ni si a.
DERDEP LEPLER
Ti-a
Tawn khatin tawn sawm a tawng tawh a,
Tang khatin tang sawm a bel nuam bawk;
Tawnsabawp tam tak a tawng zel a,
Tawntirh a tawn tin, a nel huam bawk.
A zunpuiin a uai diai duai;
Anka thlum tam a fah liai luai.
A rawn seih sak chu laikhum thlehnem,
A ngurchuai chuan ningzu a mamawh;
A biahthu di chu kuangkuah tangnem,
A sel che chuan thatna tih hre rawh.
(2000-a a phuah a ni a, mi dangte tan hla phuah a chhuah theih tih entir nan chhuah a ni.)
Ningzu rui Zodika Pa
Lalhmingliana T
Ami lengte’n raltiangah thiam run bel a,
Tinkim an dawn laiin, chheih raw! ZodikaPa’n;
A dawn sual senzu a dawn, eng dawn lovin.
Raltiangah hriat loh run laichhuat mam laiah,
Chham ang a zal, zal pui tur chu vana rah ang;
Thlarauva thar tawh, tisa a thar nawn chu!
Lengzawngte’n amte’n tang an belh lai khan,
Chhuatpui mam a bel lungsiin, Zodika Pa’n;
Awi maw! mahriakte’n run lam haw a zuam lo.
Tisa a siamthar chu senlai nau iangin,
Bawk vaka haw zai a rel! awi! Zodika Pa’n;
A meng phelh phung, a thle bur bur a thlunglu.
Theitui chu Uain a chang ta em ni?
Siktui an hung sual em ni?
Theitui an dah TENG a tin ni?
(2002-a a phuah a ni a, a phuahtu hian ningzu hi ning tawh se kan va ti em Ed)
BRIEF CASE HRANG
J.Nanga
“Sir chu a chhuak ta em ni a?
Aw chhuak ta anih kha.
A inkhai chhuak nghal em?
Aih, khai chhuak lo, a lo kir leh dawn a ni ang.
Inkhai chhuak nghal law law se tha tur aw.”
Ni e, inkhai chhuak nghal law law se chuan pisa atangin an haw ve nghal mai thei tur a ni a; mahse, pu ber room chu chu Brief case chuan a la luah tlat avangin nutling patling rual chu an la haw ngam lovin an la awm thup mai a ni.
Chu Brief case chuan thiltihtheihna ropui tak nei awm hmel a pu hran lova, hlauhawm awm tak pawhin a awm chuang hek lo. Brief case tha pangngai tak a ni a, a man pawh a neitu phu tawka tam chu a ni ngei ang, mawi tawk tak a ni. A that lehna riauna lai chu a neitu awm loh lai pawhin a nauteho a la thunun tha zel thei chu a ni.
Brief case chhungah chuan pawisa leh lehkha pawimawh hmel tak tak hlir mai lo chu thil dang a awm lova, ropui rapthlak pawh a ni lovang. Chutihlaiin, rap leh tihbaiawm hmel tak pawh ni chuang bawk si lo, hetia amaha a awm mai mai lai pawh a, pisa chhuahsan ngam lova an han awm ta tlat mai si hi chu a mak ngawt nia, he Brief case hi a hrang a ni chiang ang.
(Kan Adviser Pu Biakthanga leh Pu Rothuama te Brief Case pawh hi an naute tan chuan a hrang ve mai thei a ni!! Ed)