Khawvelah football league tam tak a awm a, chung zingah chuan English Premier League leh German Bundesliga-te hi tun dinhmunah a nung thain hma pawh a sawn; chutih laiin UEFA ranking-a sang ber chu Spanish La Liga a ni.
Premier League leh Bundesliga hi mipui ngah an ni a, chawhruala season khat chhunga a hmuna entu ngah ve ve niin, khawvel football league-a kum khat chhunga sum hui hnem ve ve an ni bawk. Mahse, league pahnih hi kalphung danglam hlak nei an ni a, European club inelnaah English club liante an hlawhtlin em em laiin, tun kum 10 chhungin German club zingah European title la thei an awm lo. hutih laiin English club lianten leiba an ngah a, German club liante erawh suma ngelnghet tha leh leiba nei lo deuh vek an ni thung.
Premier League-ah a duh duhin club an nei thei a, mi hausain sumdawnna leh intihlar nan club lian an lei. Germany-ah hnam dang club pakhat mah a awm ve lo va, an club zawng zawng fan-te ta vek a ni.
English leh German league hian harsatna lian tak pakhat ve ve a nei a, Premier League-ah chuan club lianten leiba an ngah lutuk an buaipui. Tunah hian United-in pound maktaduai 515 vel ba an nei a, hei hi German league-a first leh second division club 36-te leibat belhkhawm aiin a la tam zawk hial ang.
Premier League-ah player tha an lut tam zel a, television atanga entu an tam zel a, season khat chhunga club-te sum hmuh belhkhawm pawh pound maktaduai 2,000 a tling tawh. Sum la luh hnem ber dawttu Bundesliga hui luh let aiin a tam. Mahse, Premier League club-ten la lut teuh teuh mah se, an hman ral a tam zawk a, club 20 zingah season khat chhunga sum hloh lo pathum vel chauh an awm.
Bundesliga-ah chuan an lak luh atangin 30% vel an hlep thei a, German league hi kalphung tha ber anga sawi a ni a, mahse, league lian dang an el phak loh avangin an an kalphung sawisel pawl an awm ve tho va, player tha an lak luh theih loh bakah hlawhah club nawlpuiin sum an seng hnem thei lo bawk a, English league angin hlut a hlawh zo lo.
Chutih laiin Bundesliga-ah fan an thu em em a, European league lian zinga inkhel en man tlawmna ber niin, chawhrualin euro 20.79 inkhel a en theih a, Premier League-ah chuan a let hnih sen a ngai. Bundesliga-in football league zinga a hmuna entu tam ber nihna season kua a zawnin an hauh tawh a, inkhel apiang mipui 42,000 velin en ziah ang an nih laiin, entu tam ber dawttu Premier League-ah 36,000 vel an ni.
Premier League club-ten an sum hmuh 62% vel player hlawhah an seng ral laiin Bundesliga-ah hlawh atan 50% aia tlem an hmang. UEFA chuan season thar atang hian Financial Fair Play a kalpui tan dawn a, season hnih chhung club sum hlohte hriatthiamna thui tak neiin 2014 atang chuan fir takin a kalpui ang a, season khat chhunga mahni sum lak luh aia hmang tamten European club inelna an hmachhawn thei dawn lo.
English league-ah eng hnam pawh ni se mi hausain an duh phawt chuan club an lei thei a, hei hian an leibat tipungin man to tak takin player an lei bakah hlawh tam tak tak an pe a, ram dang atangin an chaw lut nasa bawk. League boruak lian chak hle mah se, leibat a pun nasat mai bakah England national team-in a tuar phah hle niin an ngai a, 1996 hnua atangin international tournament-ah an thleng sang ngai tawh lo.
Germany-ah chuan member (fan)-ten club-ah neitu nihna tam ber an neih ngei ngei a ngai a, dan khirh tak an nei. 50+1 model tiin an sawi a, club member-ten 51% neitu nihna an nei tur a ni a, chuti a nih chuan mi dangin 49% aia tam neitu nihna an nei thei lo. Hei hian uchuak taka sum hman a, ‘risk’ lak vak vak a veng. Chubakah club leibat ngah leh sum dinhmun him lote chu top flight khel thei lo hialin an hrem thei a, club-in an neih bak sum an hmang ve chiam chiam lo.
Dan khirh tak an neih avangin tualchhung player an chhawr nasa a, Germany hian player langsar nei tam lo mah se international tournament-ah tlang rin aiin an che tha ziah a, chumi piah lamah an league-ah player tha tam lo mah se mipuiin an hlut em em. Fan-te an ngai pawimawh em em bawk a, training-na hmun thlengin an tel ve an phalsak vek. Inkhel entu an nei tlem ngai lo va, khelmual an nei thain a lian em em deuh vek bawk a, fan-te zalenna leh nuam an tihna ber league niin an sawi.