Kum leh nite lo in her chho zel hian thil mak tak tak, a tha lam, a chhe lamin a rawn her chhuahpui ve zel lo thei si lo va le. Kum 2012 pawh a inher muai muai a, zofate tan hun pui ber leh hun theng thaw nuam lai, Kristiante tan phei chuan hunpui December thla lo inher chhuak chhoin, December 2012 ni 11 zan a lo ni chu le !
Phawk hruin zan dar 9 velah chuan mumang nge a tak tih pawh hriat loh ruaiin kei atan chuan zan maksak tak a lo ni ta ! Mumangah pawh la tawn ngai loh leh mi dang tana ka lo dah thin, kei atan chuan khawvel tharah kan chuangkai hi a ni ber mai; Chanmari West veng lian leh ropui, khu ta mi, saw ta mi, khi ta mi chhunga YMA president-a min han hung ta mai hi chu khawvel thil mak pasarih zingah telh hial tlak niin ka hria.
Tichuan, hetia YMA President meuh a min han thlang ve ta chu lawmpuina phone call, SMS te leh hmaihmaa chibai leh lawmpuinate min hlan hlawm a, min lawmpui rual rualin kei atan chuan chhungril hrehawmna nen ka lawm lo rilru a ni ber awm e. Mahse hetianga YMA member ten min thlang ta a nih si chuan Pathianin rem a tih chuan kum 2013 chu hmang turin ka han inbuatsaih ve ta a ni.
Chuan le, kum 2013 chu a lo inher chhuak ta chu a nia le ! Tiril mur deuh sung sung chungin, ti hian ka rilruah chuan suangtuahna hlimthla chu kan nei chho ve ta. chhungtin leh YMA member zawng zawngte kum thar 2013 chibai ka buk a che u.
Chanmari West veng hi thianghlim tak leh nuam taka siam turin mi tin, a lian leh te, a tar a zurin tan la lehzual turin kan inchah a, chumi atan chuan kan mawhphurhna kan koah a awm a ni tih i lo hre theuh ang u. Chhungtin hian kan in leh lo, ram hi a tha emaw a chhia emaw pawh ni se faiin thianghlim se, kan septic tank, tui chhe paihna, ranvulhna, etc., te hi mite tan harsatna thlen lo turin vawn thianghlim theuh ni se. Kan tu leh fate’n khawtlangah harsatna an thlen lohna tur leh ruihhlo laka an fihlim theihna turin i fuihin i zilh sauh sauh teh ang u. Kan fate ho hian lehkha thiam vek se kan duh a, chutih ruala pawimawh chu an nunah Mizote tlawmngaihna vawng nung reng turin i fuih thar theuh ang u.
YMA member zawng zawngte YMA thil tum tihlawhtling turin kan theihna leh thiamnate hmang a, thahnemngai lehzual turin Pathian rawn chung zelin kal i tum theuh ang u. YMA hi ding zel se.