Kum nga awrha upa, kawng tinrenga insiam rem lai tan chuan tlangnel taka ram pum huap intihsiakna hmachhawn turin rilru lamah kim lo tam tak a la awm.
Tunah chuan tha, thei leh thiam ber huanga mi niin kan inhria a, he dinhmun kan luah theihna chhan hi a tira bultantu leh mi thahnemngaite thawh rah a ni lo thei lo.
Chanmari atanga branch YMA a indanna a la rei lo. AR Lammualah rawlthar Zosangliana'n fuh deuh deuhin ball a pet a, a thai nalh thei viau bawk. A bul maiah kum 20 vel bawr, tha za leh harh zet Samuel Zohmingliana awmin ball a khalh thei fu a, ball a chan tawh chuan zam lo zetin a tlanpui ngam deuh zel.
A hnung berah inthlahrun hmel zetin kum 20 la tling lo tih hriat tak Zohmingliana'n goal a veng a, mahse, a che vel a zeiin mit a la hle a, a tih tur a hria a, a hmaa ball chhuak lakah a tlawm duh lo.
Tunah chuan Mizorama tournament ngaihhlut hlawh YMA football-ah Chanmari West-in hnuhma thar hnutchhiahin, kan khelh tawha kan la thlen san ber kan tawng mek a, trophy la thei turin final kan lut.
Kan veng tana inkhel zingah hmana rawlthar duhawm tak Sangliana a la tel a, mahse, a tha a thum ve tawh; a taksain a rilu a um phak loh avangin a tisual va ta fo mai. Tournament tir lamah khel mah se, naupang leh zuanzang zawk phenah hun a hman a tul. Mahse, 1995 YMA tournament kan en lai kha mitthlaah a lo lang a, chiang taka lang chu kan branch YMA tan kum 17 chhung Sangliana a inkhel tawh a, trophy a nghak rei ve ta hle.
Tun tuma Kawnpui Vengthar nen kan inkhelh tum khan kan veng player zingah naupang rual kum 20 bawr leh a aia naupang - Lalremruata, Eric Zomuanpuia, Vanlalnunpuiaten hun tawp lamah hmuhnawm em emin an khel. Hmanah beiseina sang pawh nei ngam lova inkhel kan en lai a, rawlthar Sangliana, Mahmingte bakah Samuela (US-a awm ta)-te hovin thiam taka football an khel kha ka ngaihtuah chhuak a, engtin emaw tak chuan ka awm niin ka hria.
Football-a Chanmri boruak len vanglai 1990 kum tirah branch YMA a indang a, la naupang hle mah ila Chanmari nen veng khata kan awm lai boruak kha kan tem ve hman. Kan indan tirh laia football-a kan pachhiatzia leh hruaitute'n thahnem ngai taka team an kaihhruai dante pawh mitthlaah cham tawk a la awm.
1990 khan Chanmari West-in a vawi khat nan YMA tournament kan hmachhawn a, PHE striker hmingthang tak Pu F Lalrova hovin middle school kawtah theihtawp chhuahin an inbuatsaih. Football-ah la hniam hle mah ila, hemi kum hian AR Lammuala khel pha team tha 16 zingah kan tel nghal a, kan branch YMA office bearer hlui Pu C Lalthazuala'n Vaivakawn field-ah duh tawka ball a khalh lai leh kan veng goalkeeper hmasa ber Pu F Zohmingthanga'n nalh tak taka ball a zuan vel lai kha a hmute tan theihnghilh mai chi a ni lo.
Hemi kum hian team 68 an chhuak a, a che tha pawl kan ni a, kan inbeisei aia sang kan thleng ti ila kan sawi sual lo vang. Lammual ruahsur hnuaiah Chaltlang nen kan intum a, tihngaihna a awm tawh lo. Mahse, kan mi hmasate hian naupang zawkte thinlungah thil tam tak an hnutchhiah a, YMA tournament buatsaih a nih leh hmasak ber 1995-ah player naupang duhawm zawk Sangliana leh Mahmingate bak pawh an chhuak nual a, thleng sang lo mah ila mawi takin Lammualah an khel thei a, kan player thenkhat phei chu hetih hun laia Mizoram club thain an la nghal.
A hnuah Pu Vanlalchhandama'n beihpuithlakin Chanmari West football chawikan tumin kum nga chuang rim takin player a kaihruai. First division-ah hial inhlangkaiin 2002 khan veng hlang deuhthawin Lungleiah club inelna sang MFA Cup kan khel thei a, mahse, YMA football-ah quarterfinal kal pel khawpin hnuhma kan nei zo lo. Aizawl district inter village-ah semifinal lutin uiawm takin kan tla a, kan vengah football boruak a lian.
2000 bawr vel kha Chanmari West football boruak len vanglai tak tiin a sawi ngam mai thei. Hetih hun lai vel hian kan vengah mipa kum 12-15 inkar vel inkhel thin leh phur an tam em em a, an u-te entawna an puitlin huna veng aiawha Lammuala inkhelh chak an nih bakah, eizawnna kawng a inhawng tih hre tel chunga football khelh nuam ti em em an ni.
Awmze neia kaihhruai an tul nia ka hriat avangin eng mah nei lovin club ka din ve ringawt a, mumal takin football khel thei se tih ka duh vang a ni. Rei pawh ka kalpui thei lo; chutih lai chuan kan kawmthlang lamah Pu Zarate'n naupang rual tan Ote-i club an siam bawk a, inthununa leh inzirtirna tha tak nen rei tak changtlung zawkin an kalpui a, player eng emaw zat an chher puitling.
Tunah chuan Chanmari West YMA team chhuanawm tak a lo piang ta. He team-a player pawimawhte hi an naupang laia Ote-i club tana awmze neia vawi tam football khel tawh leh ka club-a ka enkawl ve tawhte an awm nual. Thawhrimna, inhlanna, khawthlir thui leh inthununna tha an neih avang a ni a, ka hriat chian em em chu ka club-a an khelh lai khan K Lalrinchhana leh H Lalnunzirate hi a thiam ber an ni lo va, a tir lamah phei chuan a tikimtu ang chauhin an tel ve.
Champion thei kan ni tiin kum 10 kal ta atang khan kan venga football tuipuitute chuan au hla an nei tawh a, kan thleng sang thei si lo va, anchhia inlawh leh insawiselna thawm pawh a tam. Football a tlahniam leh hman a, mahse, Pu Malalaten thahnem ngai takin an bei a, a chhiat ber lai pawhin an kalsan duh lo va, sawiselna karah tun hi kan thleng.
1997-a third division champion kan nih atang khan football-in min chiah hneh tan. Tunah hian 2000 bawra kan player rinrawl, tuna kum 30 chuang tawh Sangliana, Mangheta, Laltanate an la awm a, an teirei peih avangin an thian hlui leh an khelhpui thin tam takte thik tham hlawhtlinna changtu zingah an tel mek.
Footballer vanglai, kum 22-28 inkar Ziona, Itana, Zirtea, Racy, Zorama-te an awm bawk a, anni hi tuna kan team neih mekah hian rinrawl an ni tak meuh. Player naupang zawk, nakin lawka kan inngahna la ni mai tur Maruata, Lalrinsanga,Eric-a, Rinzuala, Buanga, Lalnunpuiate an awm leh bawk. Kan squad hi en ila, a funkim em em a, naupang, vanglai leh upa zawkte nen kan inpawlh tha hle. Heti ang squad hi neih zen zen theih a ni lo.
YMA football tournament vawi 17-na final-ah hian Armed Veng hneha kan champion thei a nih chuan trophy la thei 11-na kan ni dawn a, kuminah team 134 telin champion tawh chu team 10 chauh an ni. A din atanga kum 22-naah branch YMA-in football-a hlawhtlinna ropui a chang dawn tihna a ni a, 2015-a silver jubillee kan lawm hma ngeia champion theih hi thil chakawm tawpkhawk a tling hrim hrim.
YMA volleyball-ah kan champion tawh a, tuna football team hian a vawrtawp an chuang chhuak a nih chuan YMA football chanchinah phek ropuia nemkai tur an ni dawn. Chu mai bakah kan veng football tan 'chhuan rangkachak' tia kan hriat zui turte an ni.