Thutak ai chuan fiamthu hi kan hlimpui tlangpui. Ni 80 chhungin khawvel hrut chhuak ve ta ila, a nih loh pawhin Jules Verne-an "Around the World in Eighty Days" tih thawnthu a ziah hun lai ai khan khawvel a changkang nasa em em tawh a, kar khat pawh hrut chhuah nan a ngai kher lo thei.
Boruak lawng, tui hnuai lawng, van sang lawngte chu hmang pha kher lo mah ila hman sen lo a awm tawh. Lei hnuai lawng pawh a awm mai thei a, a awm leh awm loh ka hre bik chiah lo.
A awm leh awm loh hi a pawimawh ber lo va, Laljohny-a a awm tih kan hriat chuan chu chu a pawimawh lai tak a ni. Eng lirthei leh thlawhna emaw lawng pawhin khawvel hi hrut chhuak sawmsarih pawh ni ila, Laljohny-a ang hi an awm lo tih hi thla a lawn ve kher lo tan pawh hriat sa a ni a, khawvel hrut chhuak kher lo pawhin amah ang an awm chuang lo tih hi a chiang em em. Sam a zuah lai khan amah ang an awm lo va, a meh hnuah pawh amah ang an la awm chuang lo cheu.
Kan ziah tum lamah lut tan dawn ila; thu han chhuah mai tur hi a tam em em lai a awm a, a van viau hun a thleng thin. Huapzo leh mi tin ngaihnawm tih tur thu ziah chhuah hi thil harsa tak a ni a, infiamna lamah bawk luh a ngai. Khawvel hrut chhuak lo mah ila, a then a zar hrut tum mai ang.
Laljohny-a erawh kan tawng dawn chuang lo va, kan thupui luahtu ber ni mah se amah vei zui tawh lovin thil dang kan ziak tawh dawn a, hrethiam hram turah kan ngai. A tel ve lohna lam kan tuipui tan tawh dawn a, khawvela infiamna sang chanchin a nih tawh avangin Laljohny-a a tel ve lo tih hi sawi lang miah lo pawh ni ila a tel lohzia a chiang tawk.
Pathianni zan hian Europe-a football stadium lian ber Camp Nou (hman deuh kha chuan Nou Camp an ti thin)-ah Barcelona-in Real Madrid mikhualin La Liga inkhel pawimawh an hmachhawn dawn a, 11:20 atangin an tan ang. Tunah ngat phei chuan anni pahnih hi khawvela football club ropui leh tha ber pahniha chhal an ni a, hnial a har fu.
Clasico tiin he inkhel hi an sawi thin a, sap tawng chuan 'classic' tihna a ni ber awm e. Classic tih hi engnge a awmzia leh a kawh tum ber ka sawifiah thiam chiah lo. Hmanna chi hrang hrang a awm a, rimawiahte..., rimawi ni lovah pawh hmanna a tam a, hmana kan zuk ve thin sikret pawh kha a hmingah classic an ti a, tuna Lalhminglianate zuk thin pawh hi classic tho a ni a, Mahse, Lalhminglianate zuk ang classic quality ang lek hi kan sawi tum chu a ni lo va, classic zawng zawng hi a ropui lo tihte pawh a chiang thei viau mai thei.
Hman lai atanga tun thlenga thil hlu bik tak sawina angah ngai ila a fuh ber. Chu ai pawhin Barca leh Real inkhel hi en ila he clasico awmzia hi chu a chiang mai. Football khawvelin club fixture zinga a bengkhawn bera ngaih a ni a, Spain ram pum a tuam hneh hle thin. Spain mai ni lovin football khawvel a chiah a, clasico tuipui pha lovin football fan ka ni ti fo ila, engtin nge football chikmiten min ngaih ang le ?
Spanish hnama inpawm ve thei lo Catalonia hovin Spain laka inlakhrana zalenna neih an duh. Hman atanga tun thlengin Spanish sorkarin a pawm thei lo. Catalonia hi Spain rama hnam hlawm lian a ni a, englai mahin Madrid hi an khawpuiah an chhal ngai lo va, an pawm thei lo bur a ni ber.
Barcelona bak khawpui dang an nei lo va, Real leh Barca an inkhelh apiangin Spanish leh Catalonia indonaah a ni mai. Catalan thinlungah chuan Madrid hi tenawm leh huatthla la a ni a, Real Madrid hi Spanish inchhuanna leh an hnam chhinchhiahnaah an ngai. Catalonia hnam chhinchhiahna langsar berah Football Club Barcelona an pawm hmiah bawk a, sakhua ang hiala ngai pawl pawh an awm niin an sawi thin.
Chanchin a ngah a, sorkar inrelbawlna thlengin nghawng a nei thin. An inelna tur erawh khelmualah a ni a, tunah hian season tan atangin league khelh rukah Barca chak vekin Real erawh an che fuh lo va, point riatin hmahruaitu Catalan team an pha lo.
Hetih lai hian tunhnaiah Cristiano Ronaldo a che tha a, season kal mekah Real tan inelna hrang hrangah goal 12 thunin a khelh hnuhnun vawi hnihah hattrick a siam ve ve. A elpui Barca star Lionel Messi chuan goal 10 tilut tawhin inelna hrang hranga a khelh hnuhnun vawi thumah a thun lo vek.
Pathianni zan dar 12:15 atangin San Siro-ah Milan derby an khel tan ve dawn thung a, AC Milan-in Inter Milan an mikhual ang. Football chanchina thilmak tak chu club inhal leh inel em em thin Milan leh Inter hian stadium an intawm a, Milan derby hi Serie A fixture lian ber pawl a ni thin.
Mahse, Italian football-in harsatna tawkin a tlahniam a, tun season-ah Milan an talbuai em em a, season liam ta khan Inter-in harsatna thuk tak tawk ve thungin Milan club lian pahnih inkhel tur hian kum dang angin mipui a hip lo.
English Premier League-ah pawh zanin hian inkhel hmuhnawm tur a awm a, Newcastle United-in Manchester United mikhualin dar 8:30 atangin an khel tan ang. United hian thawhleh zan Champions League-ah Romanian champion Cluj tlawhin 2-1 in chak mah se, league an khelh hnuhnun berah Tottenham mikhualin 2-3 in an tlawm a, kum 23 chhunga Spurs laka an tlawm hmasak ber a ni.
Tlar hnungah United an buai hle a, Newcastle striker Demba Ba chet that vanglai a ni ve thung. Ba hian league goal ruk thun tawhin top scorer a ni a, a kawppui Papiss Cisse chuan ninga zan Europa League-a 3-0 a Bordeaux an hneh tumin goal a thun bawk.
Kumin April khan zanina an intumna tur Sports Direct Arena (St James Park)-ah hian team pahnihten league khelin, 3-0 in Newcastle-in United an hneh.
Khaw chhak lam hawi chho leh zawk ila, pathianni chaw hma dar 11:30 hian Japanese Grand Prix an tlan tan dawn. F1 title inchuha inbeihna san vanglai a ni a, Ferrari driver Fernando Alonso chuan hmahruaiin pahnihna Red Bull world champion Sebastian Vettel aiin point 29-in a sang.
Inelna tihmuhnawm turin Ferrari-in car an nei chak tawk lo va, zirtawpni inbuatsaihna an zawh hnuin team boss Stefano Domenicali chuan an car thuam that an tumna a hlawhtling lo tih a sawi.
Red Bull car a tha a, McLaren phei chu season chaw hnu lama car nei chak bera ngaih an ni bawk. Team lian pathum karah Lotus khalhtu Kimi Raikkonen chuan a vawi hnih nan title lak tumin tlo zetin season a hmachhawn a, driver hlauhawm zingah a tel reng.
Vettel chuan kum thum a zawna F1 champion naupang ber nih a tum a, Ferrari an talbuai miau avangin hun tha a neih phah thei tura ngaih a ni. McLaren driver Lewis Hamilton chuan season tharah Mercedes zawm dawn mah se, a vawi hnih nan world title la turin hun tha a nei thei bawk. Vannei lo viau mah se McLaren car a chak miau va, driver pakhat tan point 150 hmuh theih a la ni a, point 50 chuangin Alonso pha lo mah se beisei a la nei sang hle.