Khawtlang Nun Siamthat YMA-in kumpuan atana a hmang hi khawtlang, hnam thatna leh ram dinchhuah duh vangah I pawm phawt teh ang. Kan khawtlang nun hi siamthat angaih chuan chhia a awm tihna chu a ni phawt mai a, chumi siamthat hna thawk tur chuan Mizo tawhphawt chuan mawhphurhna kan nei a, engtinnge ni ang tih chu mimal tinah leh a ngaihtuah peih leh peihlo pawh min huam vek a, rethei leh hausa, mifing leh mawl an dang chuang lo. Kan khawtlang nuna chhiat chuan ngaihtuah lovin thawk ve lo mah ila, a him chu kan ni bik kher awm love. Chuvang chuan tihtak meuhva tha kan thawh a kan ngaihtuah chuan kan hlawhtlin hun a thleng ngei ang tih ring chungin puanven i sawichhing ang u.
Khawtlang Nun Siamthat hi a hmasa berah chuan chhungkua-ah bul tan a pawimawh hle ang. Chhungkaw nei mek leh la din leh turte tan pawh hei hi a pawimawh hle awm e. Chhungkua ah chuan Pa mawhphurhna hi a pawimawh ber ah dah ta ila, a nupui fanaute a enkawl danah pawnlam langchhuak-in an chhungkaw mizia chu a tilang a, nupa lungruala fa enkawl leh chhungkaw nunna kawngah hma an lak dun zel a pawimawh. Nu in chhungkaw thil/fate thil tihdanah zepruk a neih fo chuan chhungkua a kal fuh duh vak lo. Chhungkua ah hian hmeichhiat mipat, ruihtheih thil tihloh leh hnam nun zemawi inzirtir kan uar a tul a, Kristian nundan tha kan inzirtir hi khawtlang nun siamthatna pawimawh a ni. Nu leh pa ten fate kan zilha thu tha kan hrilh duhtawk mai lova kan nunin a kaihhruai hi a pawimawh hle mai.
Chutiang bawk chuan fate’n mawhphurhna an hlenchhuah ve pawh a tul a, nu leh pa chu mimawlte pawh nise hmangaihna leh duhsakna nena an thusawi chu fate tan chuan nunna leh malsawmna a tling a ni. Bible-in nu leh pa thu awih tura min hrilh ang hian (damreina pawh a tel bawk). Nu leh pa chawimawi hi fate mawh a ni a, nungchang tha leh khawsak mawi hi nu leh pa chawimawina a ni. Mithatchhia leh zawm thaw, tihtur tilo leh kuttling lova thil neih chingte hi hlamchhiah ngam a tha.
Khawtlang nun siamtha tur chuan mahni chhungkua mil tawka inchei ngam, aia upa zah ngam, rui chunga ina haw lo ngam, hruaitu leh hotute thuawih ngam, hnatlanna a thawk hnem ber ni ngam, nupui ngamlo ngam, pasalte thuhnuaia dah tumlo ngam chunga mahni phaktawka Mizo nihna a chiang, mahni hnam nun leh ziarang vawng tlat chunga a hreawm lai leh hahthlak laiah tuma hmuh loh pawh a rinawmna nena taima ngam leh a ruk arala thil neih Pathian malsawmna a puhlo ngam nih a tha ang.
Information Technology khawvelah hian Committee leh hun pawimawh inkhawm etc, laia Mobile/Cell phone kheuh neuh neuh loh a mawi a, reilote nawm duh avanga mipat hmeichhiatna hman a mahni nunna pawh tawi loh a tha. Changkang nih duh vanga mahni hnam nun leh zia zahpui ang hrima hnamdang tihdan lak vak hi a changkang lo zawk. Nu emaw pa emaw ni chunga midang SMS hmanga tunlai tleirawl ho tih dan takin ‘CK’ pui tur zawn reng hi siamthat ngai pakhat chu a ni. Kawppui te nena hlimna zawn hi a finthlakin chhungkaw hlimna thuruk a ni a, damreina pawh a ni ngei ang. Hmanlaia mipa ten nula kawm tam thei nih ropuina a an ngaih thin kha tunlai chuan ...........thih hma-na a ni tawh zawk. Sum leh pai kan zawnna kawngah hian duham luat lutuk a pawi. Chiahpuam, etc, hian mi tamtak rilru a tina, nupa inthen leh chhungkaw tlakranna a tam phah a, thih phah an tam ta fimkhur a tul e. Sorkar atanga hnathawh tur kan hmuh, sum an phal zat nen inmillo lutuk a hlawh duh vanga thawhchhiat leh a ti thei nih vanga midang rilru tihnat leh mahni in hah pui lo leh hmuh tur reng nilo sum hmuh thin te hi ‘ ka takin engchawilo kan thla in ngun bun chhing chheng’ tih ang vel a ni. Tin, vengchhung Gas semna mai ah pawh hian kan khawsak phung hi siamthat a ngai lo maw?
Sawi awm tam tak awm mahse a tawp berah chuan midangte tana malsawmna nih hi a ropui a, hmangaihten malsawmna an chan theih nana hmangaih tun a tuar a tul si thin a. He khawvelah hian khawtlang nun siamtha tur hian nu leh pa nih a pawimawh a, nula tlangval nih leh naupang nih pawh a pawimawh vek mai. Lehkhathiam a kalsan chi a ni lova, politics khelhsana sorkar hnathawhsan chi pawh a ni lo, fawrsan mai mai chi pawh a ni lo. YMA hruaitute tihtur bik a ni lova mihring / mizo ka nih vanga Khawtlang Nun Siamthat hi ka mawhphurhna a ni ti chunga hma la theuh tur kan ni zawk lo maw.
Infiamna ngainatute tan en tur a tam dawn
T-a
Tun pathianni hi infiamna khawvel zau takin thlriin, a tui mite tan chuan mittlai ni tak a ni dawn a, en tur a tam hle. Lords Cricket Ground, London-ah India leh England-in Test khel mekin, he inkhel hi Test satliah mai a ni lo va, No. 1 nih inchuhna a nih bakah, Test khelh tan a nih atanga vawi 2000-na niin India leh England intum vawi 100-na chiah a ni bawk a, tunlaia Test team tha ber pahnih an la ni cheu.
Khawvela infiamna hautak bera chhal thin, thirsakawr intlansiak hmingthang Tour de France hmawr bawkna hun a ni cho mek bawk. Kum kal taa he intihsiaka champion Alberto Contador chuan damdawi khawih chungchangah puhna nasa tak tuarin a fihlimzia a sawi ve thung. Contador hi kumin hian a title kawl mek humhim thei turin a tel phalsak ni mah se, a champion zo dawn lo niin a hriat.
Professional boxing hmunpui United States-ah inhnek ngaihven hlawh tak awmin, boxing khawpui pawimawh ber Las Vegas-ah tunlai fighter naupang zinga tha bera ngaih WBA champion Amir Khan leh IBF champion Zab Judah-ten junior-welterweight title an kawl ve ve inlaksak tumin an inbei dawn a, zing dar 8-9 inkarah inhnek hman tura ngaih an ni.
Kum 24 mi Khan hi kg 63 vel huang, junior-welterweight-ah No. 2-a ngaih a ni a, WBC leh WBO title kawl kawp mek American Timothy Bradley chu No. 1 ni lai niin, Khan leh Bradley-te hi inhnek turin an inbe rem thei lo va, junior-welterweight No.6, kum 33 mi Judah nen thuthlung an siam fel ta zawk. Khan hian welterweight-a insawn chhoha kum tharah Floyd Mayweather Jr hmachhawn tumin ruahmanna a siam lawk a, kum 28 a nih hunah khawvela pound-for-pound fighter tha ber a nih ngei a inringtawk hle.
Vawiin tlai dar 5:30 hian F1 championship round 10-na German Grand Prix, Nurburgring-ah an tlan dawn. World champion Sebastian Vettel chuan hma a hruai fal tawh hle a, Red Bull driver hi a pumpuia pahnihna leh a teammte Mark Webber aiin point 80-in a sang a, an ram Germany-ah pakhatna nih ngei a tum ruh lehzual hle tih a sawi.
Hetih lai hian Ferrari-in hma an sawn a, an tlan hnuhnun berah Fernando Alonso chak berin, kumina Italian team leh Spaniard driver-in pakhatna dinhmun an luah hmasak ber a ni. McLaren-in an car thuam tha bawkin pakhatna nih theih an inbeisei ve mek a, intlansiak hmuhnawm tak a thlen theih rin a ni a, kumin hian dan thar avangin vawi kua an tlan tawhah lap khatnaa inlehpelh chhiar tel lovin tum 620 chuang tlankawngah an in tlan pel tawh a, kum dang zawng aiin thil thleng a tam.
Zanin zan lai dar 12:30 hian Copa America final Uruguay leh Paraguay-in an khel dawn bawk. Uruguay hian hnehna an chang a nih chuan Argentina nen champion ngun ber an nih dunna kal pelin, a vawi 15 nan trophy an la dawn. International football tournament zinga upa ber Copa America hi 1916 khan khelh tan a ni a, champion hmasa ber chu Uruguay niin tournament tir lamah an che tha hle. Mahse, 1995 hnuah Uruguay an champion leh tawh lo va, nikum khan World Cup-ah rin loh takin semifinal an lut a, kumin tournament-ah team tha an ni tih an lantir nawn leh.
Vawi hnih champion tawh Paraguay-in a tum thum nan trophy lak an tum ve thung a, 1979 hnua final an khelh leh hmasak ber tur a ni. Paraguay hian group stage-ah vawi thum khelin an inhnehtawkpui vek a, quarterfinal-ah Brazil nen 0-0 nin semifinal-ah 0-0 in Venezuela nen an inhnehtawk leh a, penalty petah an chak ve ve. Final-ah hian penalty petah Uruguay hneh leh ta se, football kalphung pangngai anga chhutin chak nei miah lovin an champion dawn a, a chhan chu minute 120 chhunga chak an awm loh chuan inhnehtawk anga chhinchhiah a ni.