Zan rei tak dar 8:00 velah kan mu a, mumangah Leika a ding eu ang el awl in kan zung tau tau a; a takah a lum pup pup a, kan han harh chu le...Engvang nge tih hriat siloh in mutbu leh kekawr a lo huh dup a, a hing rum rum a! A sir deuh ah kan tawlh a, kan muhil zui leh mai a. Zingah Nute’n “Tho tawh r’u a tlai tawh” an ti a, dar engzatnge tih ah buai a ngai lo, kan tho a mahni phak ang tawk tawk ti in kan buai ve nak nak a; tukthuan eikham ah Sikul lam panin kan liam dial thin.
‘Pu Enga Sikul’ a kalte khan ‘Pu Lalkunga Sikul’ a kal te kha min hmu hniam deuh thin, engvang nge chu ka hre hlei lo! Kan lo tal pawl deuh thin ani mah na, Pu Dengthanga ngei mai khan,’Pawla pawl kan ni’ ti in min au rual tir fo mai. Mahni lam kan in en chuan kan balh vak pawh kan hre chuang bik lo!
Kumpui linglet a kan nghahfak ‘Sikul chawlh’ a lo thleng a, lungkham dang nei lek lovin ipte ah Sairawkherh kan ak a, Painar kawng (tuna Sairang kawng nita) ah lungte Motor chil mum kan chhar a,‘Hei hi vate perhna tur, hei hi a laihawl perhna tur, hei hi mu perhna tur’ ti in rit lawih tham kan ak a; sava han hmuh meuh chuan vate perhna tur leh mu perhna tur kha a lo awm hrang chuang hlek lo! Mahse ‘A thunawn chu lawmin a khat’ tih ang maiin lungte chhar apiangin a ngai kan sawi nawn chawk.
Pu Chala (a chawl ta) hmingpum kha Chalkhurbinga emaw ka lo ti char char pek, mawl theih haih haih tak chu a ni! Ani kha Health Dept. lama thawk a ni a, a antam huana Kel lut kan um a kan man chuan ‘Baloon hmur nei pakhat te te a pack’ min sem a,Hmeichhe naupang erawh chuan samtuak pawh in an hlawh ve thung a, lawm takin kan ham pung pung thin.
Kawngkawi a Pu Runa(a chawl ta) chhang urna a vai tlawn fuh chang a ‘S chhang’ han dawn kha chuan kan va intithei thin em! Van te pawh khi pit dawr tia lekin ania kan hmuh thin ni. Kamram lah chu an vang laileng khawp. Thei rah lai a nih loh phei chuan,‘Min hmuh palh a Sairawkherh a perh’ inhuamin Pu Khumsinga (a chawl ta) huana thelret kha kan han sawk ru ngei a, thianho in kan in thial chhawk laih laih thin.Tin, tuna Middle School dinna ah hian Di zung kan lai a, tualthu a chhe fo. Theihmu rah lai chuan sawhchek a lar hle a, Sikul lamah erawh Chithak, aieng telh leh Tuithak purun sen pawlh nei kha chu kan tlawn laih laih thin.
Kham hnuaia awm tih takah Motor lum te kha a va tam thin em! A nih loh vek leh Chaltlang kawng atangin lung an rawn lum a, zurui aw tih hriat fahran hian “In hlau eeeem? a delh che u eeeem? Zurui emaw min ti ange awwww, zurui kan ni lo aniaaaa, Ram(Rum) rui kan niaaa...” an rawn ti nem leh duai thin. Pa valai deuh leh tlangval in an han chang a,an chang chhuak thei bawk si lo.
Infiamna te kha kan han nei chau laileng khawp...Chenghnih bawl (Ball) kha chu tunhnu deuh a lo chhuak a ni a, a hma chuan Vawktalh an awm chang leh Krismas kumthar vela Saphing kan chan fuhin pet tur kan nei ve a, Inbihruksiak, inrallem chan leh inkhualtelem kha a langsar zual a ni a, in Bailem chhuan chu nute’n an phal leu.
Tawlailir, lehkhachaih leh marble thap lah kha YMA in min khap sak daih. Chaltlang kawng thlenga khampang a kan lawn chhuah kha chuan kan intithei viau zel. A chang leh sephung kan lai a, ‘Mihring ek ami a huai duh’ ti in kan kawm pherh tak hlawih hlawih a, chutah Helicopter a lo thlawk a, kekawr mawng leh khel ah kut kan tat nawk nawk a, ‘Kapuuuuu ka lo chuang veeeee...’ tih pah in chang kan han tum leh rih...E khai! lung a va leng ve...Chhimtir hum chunga ‘Kapu hei Sazu, min rawh sak rawh’ tih te kan hrechhuak mai dawn alawm le...
Han ngaihtuah mai chuan hmanlai thil emaw tih mai tur a ni ta, mahse a kum chhut chuan hmanni lawk ani si! Khatih lai a inthenawm khawvenna kawngah leh kawng dang dang a kan veng thianghlim zia ka ngaihtuah hi chuan lung a leng thin in, tun dinhmun nena khaikhin phei chuan rilru a na rum rum thin. Tunlai angin Computer, VCD, DVD, Cell phone te a la awmlo va, TV pawh tlem tak a la ni.Vawikhat pawh Pu Enga inah Wrestling an en laiin Verandah a chim a, na tak an awmlo na in an hliam deuh nual in ka hria.
Chutiang vel chu kan Khawvel chu a ni a, rethei leh hausa awm mah ila kawng tamzawk ah kan la inchen tlang a, kan inpeizawn dial dial a, Nun a nuam thin. Tunhnai ah hian vengchhung mi tawngkam ‘Pem thar an tam tawh a, kan veng pawh a nuam tawh lo’ tih leh, ‘Kan rawn pem luh hma chuan hetiang kan ni ngai lo’ tih ka hre zeuh zeuh a, rilru a va na duh em. Veng nuam thlahlel in, banphak reng ami ngai in kan tamchhawl lo chauh a nih hi.
Kan veng hi tinuam turin tunge kan beisei le? Mi tumah beisei tur an awm lo, a mawh chu kan zavai a kutah a innghat a ni. ‘Thing tak leh inchen tlangin awm leh ang u’ han ti ngawt ila, vut laka vawih ang chauh kan ni dawn a; Chuvangin veng nuam nei turin mitin in mahni mawhphurhna hlen theuh ila; rilru fim taka ngaihtuah a thalo ni a kan hriat te hi tilo ngam ila; mahni chauh inngaihtuah lo vin, khawtlang tana tha tur ni a kan hriat chu ti ngam ila, a hranpa a siam ngailo vin,‘Veng nuam’ chu amahin a lo chhuak mai dawn a lo ni.
Nun hlui ka’n phawrh a, tam tak tan chuan ‘thing lutuk’ a ni ngei ang. Mahse kei chuan thing hle mah se, thianghlim tak, inpawh leh zalen taka awm lai hun tlem ka lo tem ve kha, “Keini zawng kan chang bik hi kan vannei hle” ka la ti fan a ni