Hetiang hunah chiah hian kan thla timuang em em tu leh chawlhni zinga tui taka sa hmeh ve thei a min siam thintu chu Pa Thara leh T-a te anni tih hi kan zep duh ta bik lo a ni e. Nia, he hmun hnawhkhah hi keini ang duang tan chuan a har ngiang mai, ‘keimahni’ ho hi helai hnawhkhahna tura rilru seng thiam lo, sen ai chuan thut tlaivar tawp pawh hniallo zawk rual kan ni si. Engtia kan hruaitute pawh hi hetiang mi anglo hlir min dahkhawm nge ni aw? Hauh erawh kan hawlo phian thung. T-a leh Pathara hian he hmun hi min hnawh sak ngun malh malh e. T-a phei hi chu, kan belh hram teh ang, zing dar 2 pawh nise kan ko kal thei reng! Heilo liama tlawmngaihna, ‘kemahni’ hi chuan Chanmari West tlangval tlawmngai berah chuh buaitu awm hauh lovin kan thlang.
Zirtawp zan a lo thlen hi chuan hlate khua atang pawhin kan bukte hi kan pan tak hlawm ang vawng vawng a, nupui ngai em em Pa Dinga meuh pawhin nupui fanau a theihnghilh fiam mai thin. Nia, he bukte hi kan lal lenna, kan duh duh kan rel a kan duh duh kan fakna hmun, sangha chi thar atanga computer virus, rulhut atanga nula hmeltha, thlanlaih atanga Pulpit thleng a kan sep rawtuina hmun, Aitawni a Lal hrawtna leh Masangtea hahchawlhna hmun a ni. Kan News Editor Ate-a thu leh hla chhumbung fing tak tak leh Aitawni a ‘englo’ chhen kan ngaihthlakna hmun kha a ni miau a, pan khawm vang vang pawh a phu a sin. Zankhat, Aitawnia’n handset a ‘Isua’ film en anga insawi a headphone thlawn palh thawm rawn chhuak ta ngher ngher kan nuih nasat zia te kha aw! Amah lah chu a nui duh der lova! Masangtea hi awmlo se chawlhni zingah hian kan veng mipuite hian he chanchinphek hi an chhiar hman angem le? A pendrive hi a va tangkai tak em, a chhuan lah a chhuang narawh! Nulate u, he tlangval hi a palian roh si a, pasal atan a tha viau lo’ng maw? (keini lam min zawt anih chuan- kan hre bik lo) ‘Keimahni’ ho hi a men kan thei em em, zing thawh erawh kan har. Inrinni zingah hnatlang kan hai ngun phian bawk. Pa Dinga zarah kan computer in hma a sawn tual tual a keini kan hnufum tual tual, hei kum a lo thar meuh chuan nikum chhung zawng a kan thuchhut sa zawng zawng hawn theih lohin (corrupted) kan siam thei hram! Pa Dinga a buai teh a sin! Chhiartute zingah lo thiam riau in awm em? Inpuang vat teh u. Mapuia (sam zuah mek) pawh hi thiam tura ngaih ni si engvang nge a lo lan duh miah loh le aw? A thiam an rawn lawr hma chu hrelo der hmiah te’ng. ‘Keimahni’ hian product kan nei tha kan in ti (mi in min ti ve em kan hre lo!), kan zinga tel ve ngar ngar Materem-a, UK ah kan aiawhin kan thawn liam a, kan News editor hi kuminah ‘Thalai Entu’ editorah kan chher chhuak bawk. Chu mai a ni hleinem, Aitawni-a leh Mahriata te Chanmari West tlangval tlawmngai ah an thlang chhuak bawk a sin! Hei aia sang tur chuan Aitawni-a hi tihngaihna kan hre hrih lo, krismas leh kum thar vuakvetah mi scooty hnungah chuangin mi inah a lo chheih lam vak mai a! a hmakhua a khawbaw leh zo tawh. Kan Production Manager Pa Tluanga’n khalh fal teh se.
Pa Tluanga sawi takah chuan min enkawlna hi nuam kan ti, min dah lal thiam em em a min duat viau bawk, pa fel tak chu a ni ve hrim hrim e, ‘kemahni’ zingah a tel khat mai pawh a! Tin, Mahriata thusep reng reng hi nula tel lovin tlip a ni ngailo, Angcha erawh a cool raih tawh mai. Lalfaka leh Aramliana hian thim leh zan rei an ngam em em mai hi chu(h), an rawng nen pawh a inhmeh viau tho e. Kan bengchheng thin tih erawh kan zep miah lo, kan bukte chhaka awm Pu Sawma te, Pa Thuama te leh Pu Romawia te hian min sawisel duh se chuan.... ngaihdam kan dil tlaikhawnhnu e. Pa Thuama hian min menpui ngun fu, tuitam viau e ti loin chanchinbu lama thu leh hla ah erawh a thawh hlawk hran miah lo! mahse kan thlamuanpui viau lawi si. Kan ei kan in min tum sak a min buaipuitute u, kan lawm em em e. Kumtharah hnahhlui chu hnah tharin a thlak ngei anga chumi hunah pawh theihtawp lo chhuah leh tang tang ta che u, nangmahni avangin khawtlang tana kan tih ve theih tlemte hi phuailuai mahse nangmahni avangin phur takin kan ti ve sauh sauh thin a nih kha