Central YMA President kal chhuak ta Pu Lalchungnunga'n Kum 2012 chhunga kan Branch hruaitu tur thlan zanah "Veng hrang hrangah thiltihna hrang hrangah hian ka kal tam tawh hle a, in veng aia YMA kalkhawm Discipline tha hi ka la hmu ngai lo" a ti a, mi hlim chu ni ila Halelui lo pek thawt na chi a ni. He thu hi vawi 1 mai ni lo vawi 2 Programme tan tir mai ni lo, ban dawnah ala sawi nawn leh thei ngat a ni. Ka rilru alo lawm ve veng veng mai a, mahni ngaihdan tlang taka sawi mi, zahpah leh mi mitmei veng miah lo, mahni ngaihdan a thling baw hawk a sawi thin mihring, mi dik ni a inchhal ngam, dik ni a a hriatah chuan tu pawi mah sawi hlau lo, Pu Chunga ka atanga chhuak ani kher kha a lawmawmin in fak derna a ni lo tih a chiang a ni. Banah khan fiamthu ti takin, "Ka Pu he thu hi Veng danga i kalnaah sawi chhuak thin teh", ka ti ang ka tih rilruk laiin kan Leader-in thil dangah mi lo be buai chhen a ka lo mangnghilh a, ka hrilh hman ta lo a ni. He thu hi reh hlen zui mai tur chuan a uihawm em avang leh kan nungchang mawi tak kan chhawm nun zui zelna kawng a min kaihruaitu anih beiseiin ka han tuihnih lawk a ni.
He a thusawi tawi te mai hian 'kan veng ze thar' hmanni lawk atanga ka lo hmuh, tha leh mawi ka lo tih ruk ve em em, mi’n engangin nge an hmuh ve ka lo tih ruk mai mai chu, veng dang mi Pu Chunga'n ka hmuh dan min rawn tawmpui vein ka lo thlir dan a dik chiah tih a rawn tilang chiang hlein ka hria. Kan Veng Thalai ten, kan veng kan chawimawiin "Award" ropui tak, a aia ropui thlan tur awm chuang lo kan inpe reng alo ni. Hemi zan mai ni lo ahma lawka veng pum huap a YMA in Carol kan neih zan, mi veng rawn tel ve lohnaah pawh khan he ze thar hi a lang chiang viauin ka hria, khati zat thalai leh nu leh pa kalkhawmah khan tlem a zu kam nam deuh pawh awm nual mah ila (ka nam ve miah lo ania) khawsa mawi lo deuh leh che mawl fal deuh pakhat mah ka hmu lo kha a mak ka ti, a tawp kan kharna Pasaltha Neuva In kawtah te khan nawr luih ni miah lo 'Discipline' kan nei. Kan Section kan inthlan zante thleng pawhin he discipline hi a awm tho. Chanmari West thalaite hian mi zinga awmdan mawi Manner and Etiquette kan lo hre chiang ve tawh khawp mai. Kan nungchang /ze mawi tak khan kan Veng thalaite kan in chawimawiin kan veng kan chawimawi tel bawk a ni. Kan veng hi automatic-in veng nuamah kan siam nghal a ni. Sap thufingin, 'The crown and glory of life is character' a tih angin kan mimal nungchang theuh kha kan veng chawimawitu leh ti hmingmawitu alo ni daih a ni...
Kan vengah YMA in Section tha tak 5 bakah Kohhran pawl hrang hrang ten Thalai pawl KTP,TKP, SAY, PYD etc. te kan nei a, hengte hian mahni Kohhran theuhah kawng hrang hranga rawngbawlna an neihna kawngah awmze mumal tak neiin an inkaihruai theuh a, heng bakah NGO leh NGO lo pawl hrang hrangte tum mumal tak neiin an ding fer fur bawk a, hengho mumal taka inkaihhruaina atang hian tu veng mah entawn ni chuangloin pawl lian ber leh huapzo YMA a kan han awmkhawmin kan invawnna / inthunnunna alo lang chhuak niin ka hmu. Kan hruaitute zir vang nge ni Mitthi in/ khawhar in a kan thalai kal khawm nungchang te hi a mawi ngawtin ka hria, Pathian Biakin a kan inkhawm ang tlukin kan khawhar in lengkhawm nungchang te hi a mawi ka ti, kum reilote hmun danga ka awm chhungin engtin nge kan hruaitute hian kan thalaite an lo zirtir thin te ka ti rilru. Nungchang mawi lo deuhte pawh lo awm zeuh zeuh mah se kan Veng thalai kal khawm zingah chuan a inthlahrung lo thei tawh lo, kan veng zia a ni tawh tlat lo. Lehkha thiam tih ringawt lam a ni lo, lehkha thiam sang ve ur si discipline nei lo, manner hre bawk si lo mihring chu a Education-ah a fail thak a ni. Lehkha thiam leh thiam lem lo mi hmantlak tak tak Thalai kan tam hi kan veng inkaihhruaina that vang hi a ni tih ka chiang. Kan veng inkaihhruaina hi awmdan mawi zirna Institution ropui tak alo ni reng a ni. Knowledge (thiamna/hriatna) hi Sap thufingin Power a ti a, Nungchang hi mahni tawkah Power a ni thei ka ti ve tlat a ni. Chanmari West Thalaite nungchang mawi taka kan nun a, aia Upate zah thiam (aia naupang zah thiam pawh a tul ) taka kan khawsak a, tihawm leh tihawm loh kan thliar thiam a, manner mawi taka kan khawsak zel chuan kan Veng hi veng hausa leh mi hausa mi thiam tamna ni lo mahse, Veng changkang leh nuam alo ni zel dawn a ni. Sap thufing bawkin ' The great hope of society is individual character' a tih angin punkhawmna mai ni lo, khawi hmuna kan awm pawhin kan mimal nun theuh hi kan veng ti nuamtu leh kan veng nghahfak a ni. Chanmari West dam reng rawh se.