A kar awl hnawhkhat a ngai fo mai a, lehkha ziak turin kan sawm a che u. Tihkhah hi kan mawhphurhna a ni a, chutih laiin a ngai ngawr ngawrina hnawhkhah fo hi chhiartute tan pawh ninawm a ni thei. Mi dang lehkha ziak tel thin se duhthusam a ni a, phak tawkin tan la ve mah ila, a sang tawk zo lo thin.
Kan vei zawng eng pawh ni se, kan thiam emaw thiam lo deuh emaw pawh ni se, YMA AW-ah hian tute tan pawh thu ziak thehluh theih reng a ni. A chhuak ngei ngei ang tih kan tiam ngam chiah lo na a, politic rawn kai lo a nih phawt chuan fiamthu, mimal tana huatthlala leh pawisawi lo thlengin a leng vek.
Kum a la kal tam lo; YMA AW-ah hian thuchhuah tur tam tak a lut thin a, a enkawltute tan a zangkhai phah a, tunah erawh chuan thuziak peih kan awm ta lo nge ? chhuah mai tur a tam ta lo. Khawvel changkang zelah thu ziah leh chhiar lamin hmun a chang tlem tial tial a, keini veng pawh kan tla fual ve deuh hlek ta a ni mai thei. Tan kan lak tlan theih chuan thil lawmawm tak a ni ang.
Khawvel changkan zel mah se, thu ziak leh chhiar hi a bo mai dawn lo va, ziaka chhiar thin na na na hi chu an khaw hawi pawh a zau tlangpui. He chanchinbu hi kan veng hmel lanna pakhat a nih avangin, a chhiat leh that hian kawngro thui tak a su thei a, chhiar tur tha kan inhlui hnem chuan veng mipuite kan nihlawhin kan hawiher thlengin a nghawng thei. Chutih laiin tunlai khawvelah hi chuan engkim mai hi a zangkhai zawnga her rem a ngai tawh a, kan thu ziakte pawh chuti ang hawia kan her thiam a tul telh telh tih chu hriat sa a ni.
Lehkha ziah hi mi zawng zawng tih chi a ni hran lo na a, keini ang veng lianah hian ziak thei eng emaw zat awm tura ngaih kan ni. Engpawh, veng tana kan tih hi te lua a awm thei lo va, ruah mal far te tein tuifinriat a siam angin, kan theihna muala ke kan pen tlanna hian veng nuam leh tha a siam mai a, chanchinbu pawh chhiar manhla zawk a nih theih nan chuan a enkawltute mai bakah mi dang an tel hnem poh leh a hlutna a pung lo thei lo va, inchawm tawnin phurna nasa zawk a siam chhuak thei.
Veng chhung pawl hrang hrangten an theih ang zelin veng thatna turin hma an la thin a. Kan hriat loh hlanin hma kan sawnna tam tak a awm tawh. Aizawl Municipal Counsilor pakhat chuan “In veng hi ram pum huap thilah hian lang tawk in awm thei zel a, hma in sawn hle a ni,” tiin a sawi a. Thil lawmawm tak a ni a, kan awmna hmun theuhah, kan thiltih theuhah, kan chettlatna mual theuhah, veng aiawha kan feh chhuahna hmun ang zelah veng timawitu kan niin, tihmelhemtu kan ni theih tih a chiang.
Veng dang miten min tehna chu kan veng chhunga thil thleng leh kan thiltih ai mahin, kan chet chhuahna hmun emaw veng pela kan veng hming a lanna emaw, ram pum huap thila kan veng mi leh sa an telna emaw a ni fo va. He veng pela thangthat la tur chuan veng chhunga kan inelbawlna, inawp dan leh inkaihhruaina mai bakah, kan sukthlek leh khawsak dan a pawimawh thung. Mi nawlpuiin ram pum huap rilru pu a, khawi hmunah pawh mi dangte el tham kan nih theihna tur chuan veng chhunga thil thleng leh kan dinhmunin thui tak a hril.
Sum leh pai ngah hi changkan nana pawimawh tak a ni a. Sum nei lo tan fel a harsa a, dik leh rinawm pawh a awlsam chuang lo; thil te thama miten an ngaih pawh a lian fe zel. Khawvelah hian ram rethei apiangah eiruk a hluar a, dan bawhchhiatna, rukruk, inrawk leh tualthatna thlengin a tam em em. Retheihna avangin rualawhna a bo lo va, chhia leh tha hriatna fim hmang thei lovin mihring nun a sawisa thin a ni.
Mahse, sum hi mihring ropuina ber a ni lem lo. Keini hi veng thang lai, puitlin lam pan mek kan ni a. Sum leh pai, in leh lo leh kan nihna thlengin a tam zawk hi chuan chhuan tur kan nei lo mai thei. Hetih lai hian kan veng hi ruihhlo zuar tamna leh a ti thin fuankhawmna, rukruk tamna, insual buai ching leh rui inlulinna hmun, mipui hmaizah lova thawm bengchheng tak siam thin tamna ni ngat ila kan hma a thim lehzual ang. Kan tanrualna hmangin a te ber atanga a lian ber thlengin indawm kan dial dial a ngai zawk a. Dinhmun nghet lote tan pawh belhfakawm a nih theih nan, dinhmun tha zawkte pawhin veng rilru kan put thiam a la pawimawh hle zel a ni. A chhan chu changkang leh puitling tawhte nen engkimah inkhaikhin theih rem lo chin a awm