Thangkhat lian a lo ni dawn ta reng mai. Pa Thara Editor laia Circulation Manager atana ruat ka nih khan mak ka ti a, phu lo ka inti viau tawh kha a ni a. Mahse khatih hunlai kha chuan Type Writter kan hmang a, tu pawh khan thawh theih tawk kan nei a, kan \angkai em em vek mai kha a ni a. Pu Vanlawma (ani hian min boralsan tawh nghe nghe) te, Sakbawiha Ralte (tawngpawng England \an hlur ringawt mai) te, Rempuia (ani hian KTP lamah min pemsan ta emaw ni?), Akimtea (Badminton a khel \hin a, a dul a kiar tulh tulh mai emaw ni?) leh Rinmawia (MZP em em) te ho nena thukhat vua e ti lo chuan inhnial reng chunga inphutna tel miah lova kan thawhho laite thlir kir chuan tuna ka dinhmun hi chu awihawm loh tak a ni.
Kum hmasa lamah engtin tin emaw ni Editorial Board Member-ah ruat ka’n ni ve leh a, Computer hmanga engkim thawh a lo ni tawh sia, ka bozia mai chu a! A thiam bikte’n an buaipui a, a tiphur tur tawk vela an sira lo titi kha kan tih theih tawk ni mai khan ka hre \hin.
YMA AW chhuah \an atanga kum kal ta thlenga kan Editor lo ni tawhte ka chhui let a (hre thui lem lo mah ila), a bik takin Board member ka nih ve chhunga ka lo thawhpui tawhte- Pa Thara, Tv T-a leh Pu Nanga te, an taimakna leh inpekna piah lama an thiamna leh theihnate ka ngaihsan \hinzia mai chu(h)!!! He chanvo hi a na mai lo. Veng mipuite pawhin vantlang chunglam, thiamna bik leh thu leh hla lama mi ril zawkte thawh turah kan dah thin kha a nia. Chu chanvo ropui tak mai chu pek ka lo ni ve ta. Mi fing leh remhriate hian an daih ta lo mai nge? Branch Committee-in he thutlukna an siam lai hian eng thlarau sualin nge maw tibuai a, thu tlukna fuh lo ber mai, he mawhphurhna ka chunga an han keuh ngawt mai hi chu, a risk a sang chu ka ti deuh... Keimah a\ang hian miin YMA AW Editor an hmuh dan hi a hniam phah ang tih pawh ka hlau hlel lo ve.
Belval val a val, nupui la hmuh zawh loh vang chauhva tlangval ve ngawr ngawr, Mizo tlangvalin a tihtur ang pawh tlin lo, tlawmngaih chhuahna kawnga mi hnunga che chhuak chi, chhuan tur nei miah lo ka ni tih hrechiangtu ber chu he thu chhiar mektute hi in ni ngei ang. Chanchinbu buatsaih tura thiamna ka neih tlemzia lah chu ka thawhpuite hian sawi duh se chuan pem vang vangna tham khawpa zahthlak sawi tur pawh an hriat ka ring. Chanvo ruatna ka hmuh chiah khan ka rilruah thil pahnih a lo lut nghal. Pakhatnaah chuan “Chanmari West veng ropui taka chanchinbu enkawl tlaka min ngai hi ropui ka ti a, lawm takin ka pawm ang” A hnuhnung zawk chu “Ka tlin lo vang”?? tih hi a ni. A hnuhnung zawk hian min hneh ta tlat mai. Mahse, chutihlai tak chuan ka \hian \ha ber mai, kawng engkima min kaihruaitu leh kawng dik min kawhhmuh fotu U |haa, Vanapa Sect Leader-in pawm ngei turin thurawn min pe tlat mai, chu chuan ka ngaihtuahna min thlaktir nghal a, ani hi chuan ka tana \ha lo tur chu a duh ngai lo tih ka hrechiang tlat.
Ti hian ka rilru ka thlak ta a. Editor lo ni tawh zawng zawngte ai hian vannei bik tlatin ka inhre ve thung. A chhan chu, Editor lo ni tawh, ka tluk loh leh ka entawn ni reng Tv T-a leh Pu Nanga te an la awm dawn tlat. Computer hriatna lama ka tlakchham zawng zawngte min hrilh reng peihtu Mapuia leh CHDA te an la awm bawk nen. Chumai a la ni lo, an Kohhran Chanchinbu-a Editor ni mek CHMA a lo awm leh zel nen, ka tan harsatna a awm lo ka ti tawp mai. Masangtea chu sawi ngai lova lum, Editor-te a thlawp \hat \hinzia pawh kan hriat vek kha, a tel lo chuan YMA AW a chhuak thei lo tih hial khawpa \angkai kha a la tel leh zel. Ka va han nihlawh tak em! Production Manager inhawng tak mai leh kan harsatna sutkian dan kawng zawng reng mai \hin Pu Ngka lo awm leh zelte hi... Pheichham pawh man ila anni bak hi thawhpui tur chuan ka dil kher awm lo ve.
A tawp berah chuan, chhiartute finchhuah ka ngai dawn hle mai, ka tih dik lohte min hrilh hria a, a dik zawk min kawhhmuh zel turin ka sawm a che u. Kan thawhhona a \hat phawt chuan kan veng hi a mualpho ngai lo vang tih ka ring tlat. Hawh u, kan veng mawina’n hian i \angrual zel ang u.